ಬೆಂಗಳೂರು: ದೇಶದ ಕೃಷಿ ವಲಯದ ಜೀವನಾಡಿಯಾಗಿರುವ ನೈಋತ್ಯ ಮುಂಗಾರು (Southwest Monsoon) ಮಾರುತಗಳ ಪ್ರವೇಶಕ್ಕೆ ದಿನಾಂಕ ನಿಗದಿಯಾಗಿದೆ. ಹವಾಮಾನ ವೈಪರೀತ್ಯಗಳಿಂದಾಗಿ ಕೊಂಚ ತಡವಾಗಿದ್ದ ಮುಂಗಾರು, ಜೂನ್ 4ರ ಸುಮಾರಿಗೆ ಅಧಿಕೃತವಾಗಿ ಕೇರಳ ಕರಾವಳಿಯನ್ನು ತಲುಪಲಿದೆ ಎಂದು ಹವಾಮಾನ ಇಲಾಖೆ ದೃಢಪಡಿಸಿದೆ. ಕೇರಳಕ್ಕೆ ಮುಂಗಾರು ಪ್ರವೇಶ ಪಡೆದ ನಂತರ, ಮುಂದಿನ 2-3 ದಿನಗಳಲ್ಲಿ ಮಾರುತಗಳು ಕರ್ನಾಟಕದ ಕಡೆಗೆ ಮುನ್ನಡೆಯಲಿವೆ.
ಹವಾಮಾನ ಇಲಾಖೆಯ ಇತ್ತೀಚಿನ ಮುನ್ಸೂಚನೆ ಪ್ರಕಾರ, ಕರ್ನಾಟಕಕ್ಕೆ ಜೂನ್ 5 ರಿಂದ ಜೂನ್ 10ರ ಒಳಗಾಗಿ ಮುಂಗಾರು ಅಧಿಕೃತವಾಗಿ ಪ್ರವೇಶಿಸಲಿದೆ. ಕರಾವಳಿ ಜಿಲ್ಲೆಗಳಾದ ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳ ಮೂಲಕ ರಾಜ್ಯವನ್ನು ಪ್ರವೇಶಿಸಲಿರುವ ಮುಂಗಾರು, ತದನಂತರ ಮಲೆನಾಡು ಹಾಗೂ ಒಳನಾಡಿನ ಜಿಲ್ಲೆಗಳಿಗೆ ವಿಸ್ತರಿಸಲಿದೆ.
ಆರಂಭದಲ್ಲಿ ಮುಂಗಾರು ಕೊಂಚ ದುರ್ಬಲ:
ಈ ಬಾರಿ ಮುಂಗಾರು ಮಾರುತಗಳ ಆರಂಭವು ನಿರೀಕ್ಷಿತ ಪ್ರಮಾಣದಲ್ಲಿ ಆರ್ಭಟದಿಂದ ಕೂಡಿರದೆ, ಅತ್ಯಂತ ಶಾಂತ ಹಾಗೂ ದುರ್ಬಲವಾಗಿರಲಿದೆ ಎಂದು ಹವಾಮಾನ ತಜ್ಞರು ತಿಳಿಸಿದ್ದಾರೆ. ದಕ್ಷಿಣ ಭಾರತದಾದ್ಯಂತ ಮಾನ್ಸೂನ್ ಮಾರುತಗಳು ಬಲಗೊಳ್ಳಲು ಅಗತ್ಯವಿರುವ ಪ್ರಬಲ ಪಶ್ಚಿಮ ಮಾರುತಗಳು ಜೂನ್ 5 ಅಥವಾ 6 ರ ನಂತರವಷ್ಟೇ ಸಕ್ರಿಯಗೊಳ್ಳಲಿವೆ. ಪ್ರಸ್ತುತ ಪಶ್ಚಿಮ ದಿಕ್ಕಿನಿಂದ ಬರುತ್ತಿರುವ ಪಾಶ್ಚಿಮಾತ್ಯ ವಿಕ್ಷೋಭೆಯು ಭಾರತದ ಭೂಭಾಗದಿಂದ ಸಂಪೂರ್ಣವಾಗಿ ನಿರ್ಗಮಿಸಿದ ಬಳಿಕವಷ್ಟೇ ಪೂರ್ವ ಮಾರುತಗಳು ಬಲಗೊಂಡು ಮಳೆಯ ತೀವ್ರತೆ ಹೆಚ್ಚಾಗಲಿದೆ.
ಕರಾವಳಿ ಮತ್ತು ಒಳನಾಡಿನಲ್ಲಿ ಸಾಧಾರಣ ಮಳೆ:
ಮುಂಗಾರು ಪ್ರವೇಶಿಸುವ ಹಿನ್ನೆಲೆಯಲ್ಲಿ ಮುಂದಿನ ಒಂದು ವಾರದ ಕಾಲ ಕೇರಳ, ತಮಿಳುನಾಡು ಮತ್ತು ಕರ್ನಾಟಕದ ಕರಾವಳಿ ಭಾಗಗಳಲ್ಲಿ ಸಾಧಾರಣದಿಂದ ಭಾರಿ ಮಳೆಯ ಮುನ್ಸೂಚನೆ ನೀಡಲಾಗಿದೆ. ಈಗಾಗಲೇ ರಾಜ್ಯದ ಹಲವು ಭಾಗಗಳಲ್ಲಿ ಮುಂಗಾರು ಪೂರ್ವ ಮಳೆ (Pre-Monsoon Rains) ಸಕ್ರಿಯವಾಗಿದ್ದು, ಸಾರ್ವಜನಿಕರಿಗೆ ಬಿಸಿಲಿನ ಬೇಗೆಯಿಂದ ಮುಕ್ತಿ ಸಿಕ್ಕಿದೆ. ಆದರೆ ಜೂನ್ ತಿಂಗಳ ಒಟ್ಟಾರೆ ಮಳೆ ಪ್ರಮಾಣವು ಈ ಬಾರಿ ದೇಶಾದ್ಯಂತ ‘ಸಾಧಾರಣಕ್ಕಿಂತ ಕಡಿಮೆ’ ಇರಬಹುದು ಎಂದು ಅಂದಾಜಿಸಲಾಗಿದ್ದು, ಕೃಷಿ ಚಟುವಟಿಕೆಗಳ ಮೇಲೆ ಇದು ಬೀರುವ ಪ್ರಭಾವದ ಕುರಿತು ತಜ್ಞರು ನಿಗಾ ವಹಿಸಿದ್ದಾರೆ