ಬೆಂಗಳೂರು: ಚಿತ್ರನಟ ಹಾಗೂ ಸಾಮಾಜಿಕ ಆಂದೋಲನಗಳಲ್ಲಿ ಸಕ್ರಿಯರಾಗಿರುವ ಚೇತನ್ ಅಹಿಂಸಾ ಅವರು ರಾಜ್ಯ ರಾಜಕಾರಣದಲ್ಲಿ ಹೊಸ ಸಂಚಲನ ಮೂಡಿಸಲು ಸಜ್ಜಾಗಿದ್ದಾರೆ. ಪ್ರಸಕ್ತ ರಾಜಕೀಯ ವಿದ್ಯಮಾನಗಳ ನಡುವೆ ಅವರು ವಿವಿಧ ಜಿಲ್ಲೆಗಳ ಒಟ್ಟು 20 ವಿಧಾನಸಭಾ ಕ್ಷೇತ್ರಗಳಲ್ಲಿ ಜುಲೈ 14ರಿಂದ ಜುಲೈ 17ರವರೆಗೆ ಬೃಹತ್ ‘ರಾಜಕೀಯ ಮುನ್ನೋಟ ಸಭೆ’ಗಳನ್ನು (Political Preview Meets) ಆಯೋಜಿಸಿದ್ದು, ಅಧಿಕೃತ ವೇಳಾಪಟ್ಟಿಯನ್ನು ಬಿಡುಗಡೆ ಮಾಡಿದ್ದಾರೆ.
ಪ್ರತಿದಿನ ಬೆಳಿಗ್ಗೆ 10:30, ಮಧ್ಯಾಹ್ನ 1:00, 3:00, ಸಂಜೆ 5:00 ಹಾಗೂ ರಾತ್ರಿ 7:00 ಗಂಟೆಗೆ ನಿಗದಿಪಡಿಸಲಾದ ಕ್ಷೇತ್ರಗಳಲ್ಲಿ ಈ ಸಭೆಗಳು ಹಾಗೂ ಸಾರ್ವಜನಿಕ ಸಂವಾದಗಳು ಜರುಗಲಿವೆ. ನಾಲ್ಕು ದಿನಗಳ ಪ್ರವಾಸದ ಸಂಪೂರ್ಣ ವಿವರ ಇಲ್ಲಿದೆ:
ಜುಲೈ 14: ಚಿತ್ರದುರ್ಗ ಜಿಲ್ಲೆಯ ಪ್ರವಾಸ
ಚೇತನ್ ಅವರ ಪ್ರವಾಸದ ಮೊದಲ ದಿನ ಹಿರಿಯೂರು ಕ್ಷೇತ್ರದಿಂದ ಆರಂಭವಾಗಲಿದ್ದು, ನಂತರ ಚಿತ್ರದುರ್ಗ, ಚಳ್ಳಕೆರೆ, ಮೊಳಕಾಲ್ಮೂರು ಹಾಗೂ ಜಗಳೂರು ಕ್ಷೇತ್ರಗಳಲ್ಲಿ ಮುನ್ನೋಟ ಸಭೆಗಳು ನಡೆಯಲಿವೆ.
ಜುಲೈ 15: ದಾವಣಗೆರೆ ಜಿಲ್ಲೆಯ ಪ್ರವಾಸ
ಎರಡನೇ ದಿನ ಹರಪನಹಳ್ಳಿಯಿಂದ ಸಭೆಗಳು ಮುಂದುವರಿಯಲಿದ್ದು, ಹರಿಹರ, ದಾವಣಗೆರೆ ನಗರ, ಮಾಯಕೊಂಡ ಮತ್ತು ಹೊನ್ನಾಳಿ ಕ್ಷೇತ್ರಗಳ ಸಾರ್ವಜನಿಕರೊಂದಿಗೆ ಚೇತನ್ ಸಂವಾದ ನಡೆಸಲಿದ್ದಾರೆ.
ಜುಲೈ 16: ವಿವಿಧ ಕ್ಷೇತ್ರಗಳ ಪ್ರವಾಸ
ಮೂರನೇ ದಿನದ ಪ್ರವಾಸದಲ್ಲಿ ಚನ್ನಗಿರಿ, ಹೊಳಲ್ಕೆರೆ, ಹೊಸದುರ್ಗ, ತರೀಕೆರೆ ಹಾಗೂ ಕಡೂರು ವಿಧಾನಸಭಾ ಕ್ಷೇತ್ರಗಳಲ್ಲಿ ರಾಜಕೀಯ ಮುನ್ನೋಟದ ಚರ್ಚೆಗಳು ನಿಗದಿಯಾಗಿವೆ.
ಜುಲೈ 17: ಚಿಕ್ಕಮಗಳೂರು ಜಿಲ್ಲೆಯ ಪ್ರವಾಸ
ಪ್ರವಾಸದ ಕೊನೆಯ ದಿನ ಮಲೆನಾಡು ಭಾಗದ ಕೊಪ್ಪ, ಶೃಂಗೇರಿ, ಬಾಳೆಹೊನ್ನೂರು, ಮೂಡಿಗೆರೆ ಹಾಗೂ ಚಿಕ್ಕಮಗಳೂರು ಕ್ಷೇತ್ರಗಳಲ್ಲಿ ಸಭೆಗಳನ್ನು ನಡೆಸುವ ಮೂಲಕ ನಾಲ್ಕು ದಿನಗಳ ಸರಣಿ ಪ್ರವಾಸ ಮುಕ್ತಾಯಗೊಳ್ಳಲಿದೆ.
ಚೇತನ್ ಅಹಿಂಸಾ ಅವರ ಈ ಪ್ರವಾಸವು ಕೇವಲ ಸಮಾಜಮುಖಿ ಚಿಂತನೆಗಾಗಿಯೇ ಅಥವಾ ಮುಂದಿನ ದಿನಗಳಲ್ಲಿ ಹೊಸ ರಾಜಕೀಯ ವೇದಿಕೆ ರಚಿಸುವ ಮುನ್ಸೂಚನೆಯೇ ಎಂಬ ಕುತೂಹಲ ಸದ್ಯ ರಾಜಕೀಯ ವಲಯದಲ್ಲಿ ಮೂಡಿದೆ.