ನವದೆಹಲಿ/ಲೇಹ್: ಚೀನಾ ಗಡಿಯ ನೈಜ ನಿಯಂತ್ರಣ ರೇಖೆಗೆ (LAC) ಅತ್ಯಂತ ಸಮೀಪದಲ್ಲಿರುವ ಪೂರ್ವ ಲಡಾಖ್‌ನ ನ್ಯೋಮಾ ವಾಯುನೆಲೆಯಲ್ಲಿ ಭಾರತೀಯ ವಾಯುಪಡೆಯು (IAF) ಹೊಸ ಇತಿಹಾಸ ಸೃಷ್ಟಿಸಿದೆ. ವಾಯುಪಡೆಯ ಬೃಹತ್ ಹೆವಿ-ಲಿಫ್ಟ್ ಸ್ಟ್ರಾಟೆಜಿಕ್ ಸಾರಿಗೆ ವಿಮಾನವಾದ ‘ಇಲ್ಯುಶಿನ್ IL-76MD’ ಅನ್ನು ಭೂಮಿಯಿಂದ ಬರೋಬ್ಬರಿ 13,629 ಅಡಿ ಎತ್ತರದ ರನ್‌ವೇನಲ್ಲಿ ಯಶಸ್ವಿಯಾಗಿ ಇಳಿಸುವ ಮೂಲಕ ಜಾಗತಿಕ ದಾಖಲೆ ಬರೆಯಲಾಗಿದೆ.
ಜಗತ್ತಿನ ಯಾವುದೇ ಭಾಗದಲ್ಲಿ ಈ ಮಾದರಿಯ ದೈತ್ಯ ವಿಮಾನವೊಂದು ಇಷ್ಟು ಎತ್ತರದ ಪ್ರದೇಶದಲ್ಲಿ ಸುರಕ್ಷಿತವಾಗಿ ಲ್ಯಾಂಡಿಂಗ್ ಆಗಿರುವುದು ವಾಯುಯಾನ ಇತಿಹಾಸದಲ್ಲೇ ಇದೇ ಮೊದಲು. ಇದು ಭಾರತೀಯ ವಾಯುಪಡೆಯ ಪೈಲಟ್‌ಗಳ ಅದ್ಭುತ ಕೌಶಲ್ಯ, ನಿಖರತೆ ಮತ್ತು ವೃತ್ತಿಪರತೆಗೆ ಸಾಕ್ಷಿಯಾಗಿದೆ.
ಕಾರ್ಯತಂತ್ರದ ದೃಷ್ಟಿಯಿಂದ ಅತ್ಯಂತ ಮಹತ್ವದ ಸಾಧನೆ:
ಚೀನಾ ಗಡಿಯಿಂದ ಕೇವಲ 25 ರಿಂದ 35 ಕಿಲೋಮೀಟರ್ ದೂರದಲ್ಲಿರುವ ನ್ಯೋಮಾ ವಾಯುನೆಲೆಯಲ್ಲಿ ಇಂತಹ ಬೃಹತ್ ವಿಮಾನವನ್ನು ಇಳಿಸಿರುವುದು ಭಾರತೀಯ ಸೇನೆಗೆ ಗಡಿ ಭಾಗದಲ್ಲಿ ದೀರ್ಘಾವಧಿಯ ‘ಸ್ಟ್ರಾಟೆಜಿಕ್ ಏರ್‌ಲಿಫ್ಟ್’ (ಯುದ್ಧ ಸಾಮಗ್ರಿ ರವಾನೆ) ಸಾಮರ್ಥ್ಯವನ್ನು ತಂದುಕೊಟ್ಟಿದೆ. ತುರ್ತು ಪರಿಸ್ಥಿತಿಗಳಲ್ಲಿ ಯುದ್ಧ ಟ್ಯಾಂಕ್‌ಗಳು, ಶಸ್ತ್ರಸಜ್ಜಿತ ವಾಹನಗಳು ಹಾಗೂ ನೂರಾರು ಯೋಧರನ್ನು ಗಡಿಯ ಮುಂಚೂಣಿ ರೇಖೆಗೆ ಅತ್ಯಂತ ವೇಗವಾಗಿ ರವಾನಿಸಲು ಈ ಯಶಸ್ಸು ದಾರಿ ಮಾಡಿಕೊಟ್ಟಿದೆ.
ಪ್ರತಿಕೂಲ ವಾತಾವರಣದ ಸವಾಲು:
ಸಮುದ್ರ ಮಟ್ಟದಿಂದ 13 ಸಾವಿರ ಅಡಿಗೂ ಅಧಿಕ ಎತ್ತರವಿರುವ ಈ ಪ್ರದೇಶದಲ್ಲಿ ಗಾಳಿಯ ಸಾಂದ್ರತೆ ತೀರಾ ಕಡಿಮೆ ಇರುತ್ತದೆ (Thin Air). ಇಂತಹ ಪರಿಸ್ಥಿತಿಯಲ್ಲಿ ವಿಮಾನದ ಇಂಜಿನ್ ಕಾರ್ಯಕ್ಷಮತೆ ಮತ್ತು ವಿಮಾನವನ್ನು ಸಮತೋಲನದಲ್ಲಿಡುವ ‘ಲಿಫ್ಟ್ ಸಾಮರ್ಥ್ಯ’ ಗಣನೀಯವಾಗಿ ಕುಂಠಿತಗೊಳ್ಳುತ್ತದೆ. ಇಂತಹ ಕಠಿಣ ಸವಾಲು ಹಾಗೂ ತಾಂತ್ರಿಕ ಮಿತಿಗಳನ್ನು ಮೆಟ್ಟಿ ನಿಂತು ವಾಯುಪಡೆಯ ಸಿಬ್ಬಂದಿ ಈ ಸಾಹಸವನ್ನು ಯಶಸ್ವಿಗೊಳಿಸಿದ್ದಾರೆ.
ಕಳೆದ ವರ್ಷವಷ್ಟೇ ನ್ಯೋಮಾದಲ್ಲಿ ಸುಧಾರಿತ ಕಾಂಕ್ರೀಟ್ ರನ್‌ವೇಯನ್ನು ಪೂರ್ಣ ಪ್ರಮಾಣದ ಫೈಟರ್-ಕ್ಯಾಪಬಲ್ ಏರ್‌ಬೇಸ್ ಆಗಿ ಅಭಿವೃದ್ಧಿಪಡಿಸಲಾಗಿತ್ತು. ಈ ಮೊದಲು ಕೇವಲ ಹೆಲಿಕಾಪ್ಟರ್‌ಗಳು ಮತ್ತು ಸಣ್ಣ ಸಾರಿಗೆ ವಿಮಾನಗಳ ಕಾರ್ಯಾಚರಣೆಗೆ ಸೀಮಿತವಾಗಿದ್ದ ಈ ವಾಯುನೆಲೆ, ಇದೀಗ ಜಾಗತಿಕ ಮಟ್ಟದ ಹೆವಿ-ಲಿಫ್ಟ್ ವಿಮಾನಗಳ ನಿಲ್ದಾಣವಾಗಿ ಮಾರ್ಪಟ್ಟಿರುವುದು ಭಾರತದ ರಕ್ಷಣಾ ವಲಯದಲ್ಲಿ ಹೊಸ ಮೈಲಿಗಲ್ಲಾಗಿದೆ. ಈ ಹೆಮ್ಮೆಯ ಕ್ಷಣವನ್ನು ಭಾರತೀಯ ವಾಯುಪಡೆಯು ಅಧಿಕೃತವಾಗಿ ಹಂಚಿಕೊಂಡಿದ್ದು, “ಗಡಿಗಳನ್ನು ವಿಸ್ತರಿಸುವುದು, ಮಿತಿಗಳನ್ನು ಮರು ವ್ಯಾಖ್ಯಾನಿಸುವುದು ಮತ್ತು ಇತಿಹಾಸ ಸೃಷ್ಟಿಸುವುದು” ಎಂದು ಈ ಯಶೋಗಾಥೆಯನ್ನು ಬಣ್ಣಿಸಿದೆ.