ದಶಕದ ಕನಸು ನನಸು:ರಾಮೇಶ್ವರಂ – ಮಂಗಳೂರು ನಡುವೆ ಹೊಸ ರೈಲು ಸಂಚಾರ ಆರಂಭ

ರಾಮೇಶ್ವರಂ: ದಕ್ಷಿಣ ಭಾರತದ ಪ್ರಮುಖ ಧಾರ್ಮಿಕ ಕೇಂದ್ರವಾದ ರಾಮೇಶ್ವರಂ ಮತ್ತು ಕರ್ನಾಟಕದ ಕರಾವಳಿ ನಗರಿ ಮಂಗಳೂರು ನಡುವೆ ನೇರ ರೈಲು ಸಂಪರ್ಕದ ದಶಕಗಳ ಕನಸು ಇಂದು ನನಸಾಗಿದೆ. ‘ರಾಮೇಶ್ವರಂ – ಮಂಗಳೂರು ಸೆಂಟ್ರಲ್ ಎಕ್ಸ್‌ಪ್ರೆಸ್’ ಉದ್ಘಾಟನಾ ವಿಶೇಷ ರೈಲಿಗೆ ಇಂದು ಸಂಜೆ 5:30ಕ್ಕೆ ರಾಮೇಶ್ವರಂ ನಿಲ್ದಾಣದಲ್ಲಿ ಅದ್ಧೂರಿ ಚಾಲನೆ ನೀಡಲಾಯಿತು.

ಹೂವುಗಳಿಂದ ಅಲಂಕೃತಗೊಂಡಿದ್ದ ಈ ರೈಲು ತಮಿಳುನಾಡು, ಕೇರಳ ಮತ್ತು ಕರ್ನಾಟಕ ರಾಜ್ಯಗಳನ್ನು ಬೆಸೆಯುವ ಹೊಸ ಕರಾವಳಿ ಕಾರಿಡಾರ್‌ಗೆ ನಾಂದಿ ಹಾಡಿದೆ.

ಸಂಚಾರದ ಸಮಯ:

ಉದ್ಘಾಟನಾ ವಿಶೇಷ ರೈಲು ಇಂದು ಸಂಜೆ ಹೊರಟಿದ್ದು, ನಾಳೆ ಬೆಳಿಗ್ಗೆ 10:15ಕ್ಕೆ ಮಂಗಳೂರು ಸೆಂಟ್ರಲ್ ತಲುಪಲಿದೆ. ಇನ್ನು ಮುಂದೆ ನಿಯಮಿತವಾಗಿ ಸಂಚರಿಸಲಿರುವ ಈ ರೈಲು ರಾಮೇಶ್ವರಂನಿಂದ ಮಧ್ಯಾಹ್ನ 3:30ಕ್ಕೆ ಹೊರಟು, ಮರುದಿನ ಬೆಳಿಗ್ಗೆ 6:55ಕ್ಕೆ ಮಂಗಳೂರನ್ನು ತಲುಪಲಿದೆ.

ಮಾರ್ಗ ಮತ್ತು ನಿಲುಗಡೆ:

ಈ ರೈಲು ಮಧುರೈ, ಪಳನಿ, ಪೊಲ್ಲಾಚಿ, ಪಾಲಕ್ಕಾಡ್, ಕೋಝಿಕೋಡ್ ಮತ್ತು ಕಾಸರಗೋಡು ಮಾರ್ಗವಾಗಿ ಸಂಚರಿಸಲಿದ್ದು, ಭಕ್ತಾದಿಗಳಿಗೆ ಮತ್ತು ಪ್ರವಾಸಿಗರಿಗೆ ವರದಾನವಾಗಲಿದೆ. ವಿಶೇಷವಾಗಿ ಪಳನಿ ಮುರುಗನ್ ದೇವಸ್ಥಾನ ಮತ್ತು ರಾಮೇಶ್ವರಂಗೆ ತೆರಳುವ ಕನ್ನಡಿಗರಿಗೆ ಈ ರೈಲು ಹೆಚ್ಚು ಅನುಕೂಲಕರವಾಗಿದೆ.

ಬೋಗಿಗಳ ವಿವರ:

ಪ್ರಯಾಣಿಕರ ಅನುಕೂಲಕ್ಕಾಗಿ ಈ ರೈಲಿನಲ್ಲಿ ಎಸಿ ಟೂ-ಟೈರ್, ಎಸಿ ತ್ರೀ-ಟೈರ್, ಸ್ಲೀಪರ್ ಕ್ಲಾಸ್ ಹಾಗೂ ಸಾಮಾನ್ಯ ದರ್ಜೆಯ ಬೋಗಿಗಳ ವ್ಯವಸ್ಥೆ ಮಾಡಲಾಗಿದೆ. ದಕ್ಷಿಣ ರೈಲ್ವೆಯ ಈ ಹೊಸ ಹೆಜ್ಜೆಯಿಂದಾಗಿ ವ್ಯಾಪಾರ ಮತ್ತು ಪ್ರವಾಸೋದ್ಯಮ ಕ್ಷೇತ್ರಕ್ಕೆ ದೊಡ್ಡ ಮಟ್ಟದ ಉತ್ತೇಜನ ಸಿಗುವ ನಿರೀಕ್ಷೆಯಿದೆ.