ಬೆಂಗಳೂರು: ಮೂಗು ಮುಚ್ಚಿಕೊಂಡು ಓಡಾಡುತ್ತಿದ್ದ ರಸ್ತೆಯಲ್ಲಿ ಈಗ ಸುವಾಸನೆ ಬೀರುತ್ತಿದೆ! ಅಸಹ್ಯ ಹುಟ್ಟಿಸುತ್ತಿದ್ದ ಕಸದ ಗುಡ್ಡೆಗಳ ಜಾಗದಲ್ಲಿ ಈಗ ಚಿತ್ತಾರಗಳು ಅರಳಿವೆ. ಇದು ಬೆಂಗಳೂರು ಸೌತ್ ಸಿಟಿ ಕಾರ್ಪೊರೇಷನ್ (BSCC) ತಂಡವು ಬೊಮ್ಮನಹಳ್ಳಿಯ ಭಗತ್ ಸಿಂಗ್ ಮುಖ್ಯ ರಸ್ತೆಯಲ್ಲಿ ನಡೆಸಿದ ಮ್ಯಾಜಿಕ್!
ಕಪ್ಪು ಚುಕ್ಕೆಯಿಂದ… ಬಣ್ಣದ ಲೋಕಕ್ಕೆ!
ನಗರದ ಅದೆಷ್ಟೋ ಬಡಾವಣೆಗಳಲ್ಲಿ ‘ಬ್ಲಾಕ್ ಸ್ಪಾಟ್’ಗಳದ್ದೇ ದೊಡ್ಡ ಕಾಟ. ಆದರೆ ಬೊಮ್ಮನಹಳ್ಳಿಯಲ್ಲಿ ಈ ಕಪ್ಪು ಚುಕ್ಕೆಗೆ ಬಿಳಿ ಬಣ್ಣ ಬಳಿದು, ರಂಗು ರಂಗಿನ ಹೂಗಿಡಗಳ ಲೋಕವನ್ನೇ ಸೃಷ್ಟಿಸಲಾಗಿದೆ. ಬಿಎಸ್ಸಿಸಿ ತಂಡದ ಹಗಲಿರುಳು ಶ್ರಮದಿಂದಾಗಿ ಈ ರಸ್ತೆ ಇಂದು ಸೆಲ್ಫಿ ಸ್ಪಾಟ್ನಂತೆ ಕಂಗೊಳಿಸುತ್ತಿದೆ.
ನಮ್ಮ ಬೆಂಗಳೂರು, ನಮ್ಮ ಹೆಮ್ಮೆ:
ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ‘ಬ್ರಾಂಡ್ ಬೆಂಗಳೂರು’ ಪರಿಕಲ್ಪನೆಗೆ ಈ ರೂಪಾಂತರವು ಹೊಸ ರೆಕ್ಕೆ ನೀಡಿದೆ. ಕಸ ಹಾಕುತ್ತಿದ್ದ ಜಾಗದಲ್ಲಿ ಈಗ ಹೂಕುಂಡಗಳು ನಗುತ್ತಿವೆ. ಗೋಡೆಗಳ ಮೇಲೆ ಪರಿಸರ ಮತ್ತು ಸ್ವಚ್ಛತೆಯ ಸಂದೇಶ ಸಾರುವ ಸುಂದರ ಚಿತ್ರಗಳು ಸಾರ್ವಜನಿಕರ ಗಮನ ಸೆಳೆಯುತ್ತಿವೆ.
ಸಾರ್ವಜನಿಕರ ಹರ್ಷ:
“ನಮ್ಮ ಏರಿಯಾ ರಸ್ತೆ ಇಷ್ಟು ಬೇಗ ಸುಂದರವಾಗುತ್ತದೆ ಅಂದುಕೊಂಡಿರಲಿಲ್ಲ. ಬೊಮ್ಮನಹಳ್ಳಿ ಈಗ ನಿಜಕ್ಕೂ ಸ್ಮಾರ್ಟ್ ಆಗಿದೆ” ಎನ್ನುತ್ತಾರೆ ಇಲ್ಲಿನ ನಿವಾಸಿಗಳು. ಕೇವಲ ಕಸ ತೆರವು ಮಾಡುವುದಷ್ಟೇ ಅಲ್ಲದೆ, ಆ ಜಾಗವನ್ನು ಸಾರ್ವಜನಿಕ ಸ್ನೇಹಿ ತಾಣವನ್ನಾಗಿ ಪರಿವರ್ತಿಸಿರುವುದು ಬಿಎಸ್ಸಿಸಿ ತಂಡದ ವಿಶೇಷತೆ.
ಒಟ್ಟಿನಲ್ಲಿ, ‘ಬೆಂಗಳೂರು ಸೌತ್ ಸಿಟಿ ಕಾರ್ಪೊರೇಷನ್’ ತನ್ನ ಕೆಲಸದ ಮೂಲಕ “ಕಾಯಕವೇ ಕೈಲಾಸ” ಎಂಬುದನ್ನು ಸಾಬೀತುಪಡಿಸಿದೆ. ಈಗ ಈ ಸೌಂದರ್ಯವನ್ನು ಕಾಪಾಡಿಕೊಳ್ಳುವ ಹೊಣೆಗಾರಿಕೆ ನಮ್ಮೆಲ್ಲರ ಮೇಲಿದೆ.