ಮಸಾಲೆ ದೋಸೆಯಿಂದ ಮಷೀನ್ ಲರ್ನಿಂಗ್‌ವರೆಗೆ:ಬೆಂಗಳೂರಿನಲ್ಲಿ ಅಮೆರಿಕ ರಾಯಭಾರಿ, ತೇಜಸ್ವಿ ಸೂರ್ಯ ಸಂವಾದ

ಬೆಂಗಳೂರು:ಭಾರತಕ್ಕೆ ಅಮೆರಿಕದ ನೂತನ ರಾಯಭಾರಿಯಾಗಿ ನೇಮಕಗೊಂಡಿರುವ ಸೆರ್ಗಿಯೋ ಗೋರ್ (H.E. Sergio Gor) ಅವರನ್ನು ಬೆಂಗಳೂರು ದಕ್ಷಿಣ ಸಂಸದ ತೇಜಸ್ವಿ ಸೂರ್ಯ ಅವರು ಇಂದು ನಗರಕ್ಕೆ ಆತ್ಮೀಯವಾಗಿ ಸ್ವಾಗತಿಸಿದರು.

ನಗರದ ಇಂದಿರಾನಗರದಲ್ಲಿರುವ ಪ್ರಖ್ಯಾತ ‘ಫಿಲ್ಟರ್ ಕಾಫಿ’ ಉಪಹಾರ ಗೃಹದಲ್ಲಿ ನಡೆದ ಈ ಭೇಟಿಯಲ್ಲಿ, ಸಾಂಪ್ರದಾಯಿಕ ಮಸಾಲೆ ದೋಸೆ ಮತ್ತು ಸ್ಟ್ರಾಂಗ್ ಫಿಲ್ಟರ್ ಕಾಫಿ ಸವಿಯುತ್ತಾ ಉಭಯ ನಾಯಕರು ಗಹನವಾದ ಚರ್ಚೆ ನಡೆಸಿದರು. ಪ್ರಮುಖವಾಗಿ, ಭಾರತ ಮತ್ತು ಅಮೆರಿಕ ನಡುವಿನ ಮಧ್ಯಂತರ ವ್ಯಾಪಾರ ಒಪ್ಪಂದದ ನಂತರದ ಬೆಳವಣಿಗೆಗಳು, ತಂತ್ರಜ್ಞಾನ, ನಾವೀನ್ಯತೆ ಹಾಗೂ ದ್ವಿಪಕ್ಷೀಯ ವ್ಯಾಪಾರ ಸಂಬಂಧಗಳನ್ನು ವೃದ್ಧಿಸುವ ಕುರಿತು ಸಮಾಲೋಚನೆ ನಡೆಸಲಾಯಿತು.

ಈ ಸಂದರ್ಭದಲ್ಲಿ ಮಾತನಾಡಿದ ಸಂಸದ ತೇಜಸ್ವಿ ಸೂರ್ಯ, “ಬೆಂಗಳೂರು ನಿಜವಾಗಿಯೂ ‘ಮಸಾಲೆ ದೋಸೆಯಿಂದ ಮಷೀನ್ ಲರ್ನಿಂಗ್‌’ ವರೆಗಿನ ಅದ್ಭುತ ಪ್ರಯಾಣವನ್ನು ಪ್ರತಿನಿಧಿಸುತ್ತದೆ. ನಮ್ಮ ನಗರವು ಸಂಪ್ರದಾಯದ ಬೇರುಗಳನ್ನು ಉಳಿಸಿಕೊಂಡೇ ಅತ್ಯಾಧುನಿಕ ತಂತ್ರಜ್ಞಾನದ ಜಾಗತಿಕ ಕೇಂದ್ರವಾಗಿ ಬೆಳೆದಿದೆ. ಎರಡು ಬಲಿಷ್ಠ ಪ್ರಜಾಪ್ರಭುತ್ವಗಳ ನಡುವಿನ ಆರ್ಥಿಕ ಮತ್ತು ಸಾಂಸ್ಕೃತಿಕ ಬಂಧವನ್ನು ಗಟ್ಟಿಗೊಳಿಸುವಲ್ಲಿ ಬೆಂಗಳೂರು ಪ್ರಮುಖ ಕೊಂಡಿಯಾಗಿದೆ,” ಎಂದು ಅಭಿಪ್ರಾಯಪಟ್ಟರು.

ಭಾರತ-ಅಮೆರಿಕ ಸಂಬಂಧದ ಕೇಂದ್ರಬಿಂದು ಬೆಂಗಳೂರು:

700ಕ್ಕೂ ಹೆಚ್ಚು ಅಮೆರಿಕನ್ ಕಂಪನಿಗಳಿಗೆ ಬೆಂಗಳೂರು ನೆಲೆಯಾಗಿದೆ.

ಭಾರತದ ಒಟ್ಟು ಸಾಫ್ಟ್‌ವೇರ್ ರಫ್ತಿನಲ್ಲಿ ಶೇ. 43ರಷ್ಟು ಪಾಲು ಬೆಂಗಳೂರಿನದ್ದೇ ಆಗಿದ್ದು, ಇದು ಯುಎಸ್-ಭಾರತ ಆರ್ಥಿಕ ಸಂಬಂಧದ ಶಕ್ತಿಯನ್ನು ತೋರಿಸುತ್ತದೆ.

ದೇಶದ ಶೇ. 40ರಷ್ಟು ಜಾಗತಿಕ ಸಾಮರ್ಥ್ಯ ಕೇಂದ್ರಗಳು (GCCs) ಇಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಆವಿಷ್ಕಾರ ಆಧಾರಿತ ಸಹಭಾಗಿತ್ವಕ್ಕೆ ಬೆಂಗಳೂರು ಮುಂಚೂಣಿಯಲ್ಲಿದೆ.

ಉಪಹಾರದ ನಂತರ, ರಾಯಭಾರಿ ಸೆರ್ಗಿಯೋ ಗೋರ್ ಅವರಿಗೆ ಬೆಂಗಳೂರಿನ ಹೆಮ್ಮೆಯ ‘ನಮ್ಮ ಆಟೋ’ ಸವಾರಿಯನ್ನು ಪರಿಚಯಿಸಲಾಯಿತು. ಆಟೋದಲ್ಲಿ ಪ್ರಯಾಣಿಸಿದ ರಾಯಭಾರಿಯವರು ಬೆಂಗಳೂರಿನ ಸಾಮಾನ್ಯ ಜನರ ಸಾರಿಗೆ ವ್ಯವಸ್ಥೆ ಮತ್ತು ತಂತ್ರಜ್ಞಾನದ ಬಳಕೆಯನ್ನು ಕಂಡು ಮೆಚ್ಚುಗೆ ವ್ಯಕ್ತಪಡಿಸಿದರು.

ಈ ಭೇಟಿಯು ಬೆಂಗಳೂರು ಮತ್ತು ಅಮೆರಿಕ ನಡುವಿನ ಹೂಡಿಕೆ ಹಾಗೂ ತಾಂತ್ರಿಕ ಸಹಕಾರಕ್ಕೆ ಹೊಸ ವೇಗ ನೀಡಲಿದೆ ಎಂದು ಸಂಸದರು ವಿಶ್ವಾಸ ವ್ಯಕ್ತಪಡಿಸಿದರು.