ಮನೆಬಾಗಿಲಿಗೆ ಮಹಾಲಕ್ಷ್ಮಿ ಮಾತ್ರವಲ್ಲ, ಈಗ ‘ಮನೆಬಾಗಿಲಿಗೆ ಆರೋಗ್ಯ’!

ಬೆಂಗಳೂರು:ಗ್ರಾಮೀಣ ಭಾಗದ ಲಕ್ಷಾಂತರ ಜನರ ಪಾಲಿಗೆ ಸಂಜೀವಿನಿಯಾದ ಕರ್ನಾಟಕ ಸರ್ಕಾರದ ಮಹತ್ವಾಕಾಂಕ್ಷೆಯ ‘ಗೃಹ ಆರೋಗ್ಯ’ ಯೋಜನೆ ಈಗ ಮತ್ತೊಂದು ಮೈಲಿಗಲ್ಲು ಸ್ಥಾಪಿಸಲು ಸಜ್ಜಾಗಿದೆ. ಹಳ್ಳಿಗಳಲ್ಲಿ ಯಶಸ್ವಿಯಾಗಿ ಒಂದು ಕೋಟಿಗೂ ಅಧಿಕ ಜನರ ತಪಾಸಣೆ ನಡೆಸಿ ಭರವಸೆ ಮೂಡಿಸಿದ ನಂತರ, ಈ ಯೋಜನೆ ಈಗ ‘ಗೃಹ ಆರೋಗ್ಯ 2.0’ ರೂಪದಲ್ಲಿ ನಗರ ಪ್ರದೇಶಗಳಿಗೂ ಕಾಲಿಡುತ್ತಿದೆ.

ಇಂದು ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ನಿವಾಸದಲ್ಲಿ ಆರೋಗ್ಯ ಸಚಿವ ದಿನೇಶ್ ಗುಂಡೂರಾವ್ ನಡೆಸಿದ ಮಹತ್ವದ ಸಮಾಲೋಚನೆಯಲ್ಲಿ, ಬೆಂಗಳೂರು ಸೇರಿದಂತೆ ರಾಜ್ಯದ ಪ್ರಮುಖ ನಗರ ಪ್ರದೇಶಗಳಿಗೆ (GBA areas) ಈ ಸೇವೆಯನ್ನು ವಿಸ್ತರಿಸಲು ತೀರ್ಮಾನಿಸಲಾಗಿದೆ.

ಈ ಯೋಜನೆಯ ವಿಶೇಷತೆ ಏನು?

ಮನೆಬಾಗಿಲಿಗೆ ತಪಾಸಣೆ: ಇನ್ನು ಮುಂದೆ ನಗರವಾಸಿಗಳು ಆಸ್ಪತ್ರೆಗೆ ಅಲೆಯಬೇಕಿಲ್ಲ; ಆರೋಗ್ಯ ಸಿಬ್ಬಂದಿಯೇ ನಿಮ್ಮ ಮನೆಗೆ ಬಂದು ಬಿಪಿ, ಶುಗರ್ ಸೇರಿದಂತೆ ಪ್ರಮುಖ ಆರೋಗ್ಯ ತಪಾಸಣೆ ನಡೆಸಲಿದ್ದಾರೆ.

ಉಚಿತ ಚಿಕಿತ್ಸೆ: ತಪಾಸಣೆ ಮಾತ್ರವಲ್ಲದೆ, ಅಗತ್ಯವಿರುವವರಿಗೆ ಸ್ಥಳದಲ್ಲೇ ಉಚಿತವಾಗಿ ಔಷಧಿಗಳನ್ನು ವಿತರಿಸುವ ವ್ಯವಸ್ಥೆಯೂ ಇದೆ.

ಬಲಿಷ್ಠ ಸಾರ್ವಜನಿಕ ಆರೋಗ್ಯ: ಯಾರೂ ಚಿಕಿತ್ಸೆಯಿಂದ ವಂಚಿತರಾಗಬಾರದು ಎಂಬ ಸಂಕಲ್ಪದೊಂದಿಗೆ ಸರ್ಕಾರವು ಆರೋಗ್ಯ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುತ್ತಿದೆ.

ಗ್ರಾಮೀಣ ಭಾರತದ ಯಶಸ್ಸಿನ ಕಥೆ ಈಗ ಸಿಲಿಕಾನ್ ಸಿಟಿ ಸೇರಿದಂತೆ ನಗರ ಪ್ರದೇಶಗಳ ಜನರ ಜೀವನದಲ್ಲೂ ಹೊಸ ಬದಲಾವಣೆ ತರಲಿದೆ. ಆರೋಗ್ಯವಂತ ಸಮಾಜವೇ ಸದೃಢ ರಾಜ್ಯದ ಅಡಿಪಾಯ ಎಂಬ ಆಶಯದೊಂದಿಗೆ ‘ಗೃಹ ಆರೋಗ್ಯ 2.0’ ಜಾರಿಗೆ ಬರಲಿದೆ.

ಸಚಿವರ ಅಧಿಕೃತ ಹೇಳಿಕೆ:

“ಗ್ರಾಮೀಣ ಭಾಗದಲ್ಲಿ ‘ಗೃಹ ಆರೋಗ್ಯ’ ಯೋಜನೆಗೆ ಅಭೂತಪೂರ್ವ ಯಶಸ್ಸು ದೊರೆತಿದೆ. ಈವರೆಗೆ ಒಂದು ಕೋಟಿಗೂ ಅಧಿಕ ಜನರನ್ನು ತಲುಪಿ, ಅವರ ಮನೆಬಾಗಿಲಿಗೇ ಆರೋಗ್ಯ ತಪಾಸಣೆ ಮತ್ತು ಚಿಕಿತ್ಸೆ ತಲುಪಿಸಿರುವುದು ನಮ್ಮ ಸರ್ಕಾರದ ಬದ್ಧತೆಗೆ ಸಾಕ್ಷಿ. ಗ್ರಾಮೀಣ ಜನರ ಜೀವನದಲ್ಲಿ ಹೊಸ ಭರವಸೆ ಮೂಡಿಸಿದ ಈ ಯೋಜನೆಯನ್ನು ಈಗ ‘ಗೃಹ ಆರೋಗ್ಯ 2.0’ ಮೂಲಕ ನಗರವಾಸಿಗಳ ಮನೆಬಾಗಿಲಿಗೂ ತರಲಿದ್ದೇವೆ. ಪ್ರತಿ ಕುಟುಂಬಕ್ಕೂ ಗುಣಮಟ್ಟದ ಆರೋಗ್ಯ ಸೇವೆ ಸಿಗಬೇಕು, ಯಾರೂ ಚಿಕಿತ್ಸೆಯಿಂದ ವಂಚಿತರಾಗಬಾರದು ಎನ್ನುವುದೇ ನಮ್ಮ ಸಂಕಲ್ಪ” ಎಂದು ಸಚಿವ ದಿನೇಶ್ ಗುಂಡೂರಾವ್ ತಿಳಿಸಿದರು.