ಬೆಂಗಳೂರು: ನೀವು ರಾತ್ರಿ ಹೊತ್ತು ಸ್ಲೀಪರ್ ಬಸ್ಗಳಲ್ಲಿ ಹಾಯಾಗಿ ಮಲಗಿ ಪ್ರಯಾಣಿಸುತ್ತೀರಾ? ಇನ್ಮುಂದೆ ನಿಮ್ಮ ಪ್ರಯಾಣ ಕೇವಲ ಆರಾಮದಾಯಕ ಮಾತ್ರವಲ್ಲ, ಅತೀ ಹೆಚ್ಚು ಸುರಕ್ಷಿತವೂ ಆಗಿರಲಿದೆ. ರಾಜ್ಯ ಸಾರಿಗೆ ಇಲಾಖೆಯು ಸ್ಲೀಪರ್ ಬಸ್ಗಳ ಸುರಕ್ಷತೆಗೆ ಸಂಬಂಧಿಸಿದಂತೆ ಹೊಸ ನಿಯಮಗಳನ್ನು ಜಾರಿಗೆ ತಂದಿದ್ದು, ಇದಕ್ಕೆ ಮಾರ್ಚ್ 31, 2026 ರನ್ನು ಅಂತಿಮ ಗಡುವು ಎಂದು ಘೋಷಿಸಿದೆ.
ಏನಿದು ಹೊಸ ಕಟ್ಟುನಿಟ್ಟು?
ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗದ (NHRC) ಕಠಿಣ ಸೂಚನೆಯ ಮೇರೆಗೆ, ಕೇಂದ್ರ ಮೋಟಾರು ವಾಹನ ನಿಯಮಗಳ ಅಡಿಯಲ್ಲಿ ಸ್ಲೀಪರ್ ಬಸ್ಗಳಿಗೆ ವಿಶೇಷ ಸುರಕ್ಷತಾ ಮಾನದಂಡಗಳನ್ನು (AIS:119) ಕಡ್ಡಾಯಗೊಳಿಸಲಾಗಿದೆ. ಈ ಹಿಂದೆ ಫೆಬ್ರವರಿ ಅಂತ್ಯಕ್ಕೆ ನೀಡಲಾಗಿದ್ದ ಗಡುವನ್ನು ಇದೀಗ ಮಾರ್ಚ್ 31 ರವರೆಗೆ ವಿಸ್ತರಿಸಲಾಗಿದ್ದು, ಇದು ಬಸ್ ಮಾಲೀಕರಿಗೆ ಸಿಕ್ಕಿರುವ ‘ಕೊನೆಯ ಎಚ್ಚರಿಕೆ’ಯಾಗಿದೆ.
ಸ್ಲೀಪರ್ ಬಸ್ಗಳಲ್ಲಿ ಏನಿರಬೇಕು? (ಪ್ರಮುಖ 11 ಬದಲಾವಣೆಗಳು):
ಕೇವಲ ಸೀಟುಗಳನ್ನು ಬೆಡ್ಗಳಾಗಿ ಮಾರ್ಪಡಿಸಿದರೆ ಸಾಲದು, ಅದರಲ್ಲಿ ಪ್ರಯಾಣಿಕರ ಪ್ರಾಣ ರಕ್ಷಣೆಗೆ ಪೂರಕವಾದ ವ್ಯವಸ್ಥೆಗಳಿರಬೇಕು.
ತುರ್ತು ನಿರ್ಗಮನ ದ್ವಾರ: ಸ್ಲೀಪರ್ ಕೋಚ್ಗಳಲ್ಲಿ ಸುಲಭವಾಗಿ ತೆರೆಯಬಹುದಾದ ಎಮರ್ಜೆನ್ಸಿ ಎಕ್ಸಿಟ್ಗಳು ಇರಲೇಬೇಕು.
ಅಗ್ನಿಶಾಮಕ ವ್ಯವಸ್ಥೆ: ಬೆಂಕಿ ಅವಘಡ ಸಂಭವಿಸಿದರೆ ತಕ್ಷಣ ಎಚ್ಚರಿಸುವ ಅಲಾರಂ ಮತ್ತು ನಂದಿಸುವ ಉಪಕರಣಗಳು.
ಬಾಡಿ ಬಿಲ್ಡಿಂಗ್ ಕೋಡ್: AIS:119 ಮಾನದಂಡದಂತೆ ಬಸ್ಸಿನ ಬಾಡಿ ನಿರ್ಮಾಣವಾಗಿರಬೇಕು.
ಸುತ್ತಿಗೆಗಳು (Hammers): ತುರ್ತು ಸಂದರ್ಭದಲ್ಲಿ ಗಾಜು ಒಡೆಯಲು ಅಗತ್ಯವಿರುವ ಸುತ್ತಿಗೆಗಳನ್ನು ನಿಗದಿತ ಜಾಗದಲ್ಲಿ ಇರಿಸಿರಬೇಕು.
ಏಪ್ರಿಲ್ 1 ರಿಂದ ಬಸ್ ಹಿಡಿಯೋದು ಗ್ಯಾರಂಟಿ!
ಸರ್ಕಾರದ ಆದೇಶ ಸಂಖ್ಯೆ (ಟಿಡಿ 18 ಟಿಡಿಒ 2026) ಪ್ರಕಾರ, ಮಾರ್ಚ್ 31 ರೊಳಗೆ ಈ 11 ಸುರಕ್ಷತಾ ಕ್ರಮಗಳನ್ನು ಅಳವಡಿಸಿಕೊಳ್ಳದ ಸ್ಲೀಪರ್ ಬಸ್ಗಳು ರಸ್ತೆಗೆ ಇಳಿಯುವಂತಿಲ್ಲ. ಏಪ್ರಿಲ್ 1 ರಿಂದ ಸಾರಿಗೆ ಇಲಾಖೆಯ ವಿಶೇಷ ತಂಡಗಳು ಹೈವೇಗಳಲ್ಲಿ ಹದ್ದಿನ ಕಣ್ಣಿಡಲಿದ್ದು, ನಿಯಮ ಉಲ್ಲಂಘಿಸುವ ಬಸ್ಗಳ ಪರವಾನಗಿ ರದ್ದು ಮಾಡುವ ಸಾಧ್ಯತೆಯೂ ಇದೆ.
ಬಸ್ ಮಾಲೀಕರ ಗಮನಕ್ಕೆ:
ಲಕ್ಷಾಂತರ ರೂಪಾಯಿ ವೆಚ್ಚ ಮಾಡಿ ಬಸ್ ಓಡಿಸುವ ಮಾಲೀಕರು, ಪ್ರಯಾಣಿಕರ ಜೀವದ ರಕ್ಷಣೆಗಾಗಿ ಈ ಸಣ್ಣ ಬದಲಾವಣೆಗಳನ್ನು ಮಾಡಿಕೊಳ್ಳುವುದು ಅನಿವಾರ್ಯ. ತಾಂತ್ರಿಕ ತಪಾಸಣೆಯಲ್ಲಿ ವಿಫಲವಾದರೆ ಭಾರೀ ದಂಡ ತೆರಬೇಕಾಗಬಹುದು.
