ಬಡವರಿಗೆ ನಿವೇಶನ ಬೇಡ, ನೇರವಾಗಿ ಮನೆ ಕಟ್ಟಿ ಕೊಡಿ: ಸಿಎಂ ಖಡಕ್ ಸೂಚನೆ, ಹರಾಜು ವ್ಯವಸ್ಥೆ ರದ್ದುಪಡಿಸಲು ಆದೇಶ

ಬೆಂಗಳೂರು:ರಾಜ್ಯದ ಬಡ ಜನರಿಗೆ ಕೇವಲ ಖಾಲಿ ನಿವೇಶನಗಳನ್ನು ನೀಡುವ ಬದಲಿಗೆ ನೇರವಾಗಿ ವಾಸಯೋಗ್ಯ ಮನೆಗಳನ್ನು ನಿರ್ಮಿಸಿಕೊಡಲು ಮೊದಲ ಆದ್ಯತೆ ನೀಡಬೇಕು ಎಂದು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರು ವಸತಿ ಇಲಾಖೆಯ ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ನಿರ್ದೇಶನ ನೀಡಿದ್ದಾರೆ.

ವಿಧಾನಸೌಧದಲ್ಲಿ ಬುಧವಾರ ನಡೆದ ವಸತಿ ಇಲಾಖೆಯ ಸುದೀರ್ಘ ಪ್ರಗತಿ ಪರಿಶೀಲನಾ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು,”ಖಾಲಿ ನಿವೇಶನಗಳನ್ನು ಹಂಚಿಕೆ ಮಾಡಿದಷ್ಟೂ ಅವುಗಳು ಹಾಗೆಯೇ ಉಳಿದು, ಆ ಜಾಗಗಳಲ್ಲಿ ಸ್ಲಂಗಳು (ಕೊಳಚೆ ಪ್ರದೇಶಗಳು) ತಲೆ ಎತ್ತಲು ದಾರಿಯಾಗುತ್ತದೆ. ಇದಕ್ಕೆ ಯಾವುದೇ ಕಾರಣಕ್ಕೂ ಅಧಿಕಾರಿಗಳು ಅವಕಾಶ ಕೊಡಬಾರದು” ಎಂದು ಸಿಎಂ ಎಚ್ಚರಿಸಿದ್ದಾರೆ.

ಹರಾಜು ಪ್ರಕ್ರಿಯೆ ಬಂದ್, ಲಾಟರಿ ವ್ಯವಸ್ಥೆ ಜಾರಿ:

ಸಭೆಯ ಅವಧಿಯಲ್ಲಿ ವಸತಿ ಮಂಡಳಿಯ ಹರಾಜು ಪ್ರಕ್ರಿಯೆಯ ಕುರಿತು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಮುಖ್ಯಮಂತ್ರಿಗಳು, “ನಾವು ಹರಾಜು ಹಾಕಿದರೆ ಆ ಸೌಲಭ್ಯ ನಿಜವಾದ ಬಡವರಿಗೆ ಸಿಗುತ್ತದೋ ಅಥವಾ ಕೇವಲ ಹಣವಿದ್ದವರಿಗೆ ಮಾತ್ರ ಸಿಗುತ್ತದೋ?” ಎಂದು ಪ್ರಶ್ನಿಸಿದಾಗ ಅಧಿಕಾರಿಗಳು ಉತ್ತರಿಸಲಾಗದೆ ತಬ್ಬಿಬ್ಬಾದರು. ಇದಕ್ಕೆ ತಕ್ಷಣವೇ ಬ್ರೇಕ್ ಹಾಕಿದ ಸಿಎಂ, ಇನ್ಮುಂದೆ ಹರಾಜು ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ನಿಲ್ಲಿಸಿ, ಸಾರ್ವಜನಿಕರ ಸಮ್ಮುಖದಲ್ಲೇ ಪಾರದರ್ಶಕವಾಗಿ ಲಾಟರಿ ಎತ್ತುವ (Lottery System) ಮೂಲಕವೇ ಅರ್ಹ ಫಲಾನುಭವಿಗಳನ್ನು ಆಯ್ಕೆ ಮಾಡಬೇಕು ಎಂದು ಆದೇಶಿಸಿದರು.

ಮುಂಬೈ ಮಾದರಿಯ ಸ್ಲಂ ಮರುಅಭಿವೃದ್ಧಿ ಯೋಜನೆ:

ಬೆಂಗಳೂರಿನ ಸ್ಲಂ ನಿವಾಸಿಗಳ ಪುನರ್ವಸತಿಗಾಗಿ ಮಹಾರಾಷ್ಟ್ರದ ಮುಂಬೈ ಮಾದರಿಯನ್ನು ಅಳವಡಿಸಿಕೊಳ್ಳಲು ಸರ್ಕಾರ ನಿರ್ಧರಿಸಿದೆ. “ಅಧಿಕಾರಿಗಳ ತಂಡವು ಮುಂಬೈಗೆ ಖುದ್ದಾಗಿ ಭೇಟಿ ನೀಡಿ, ಅಲ್ಲಿನ ಸ್ಲಂ ಮರುಅಭಿವೃದ್ಧಿ ಯೋಜನೆಗಳನ್ನು ಸಮಗ್ರವಾಗಿ ಅಧ್ಯಯನ ಮಾಡಿಕೊಂಡು ಬರಬೇಕು. ಆದರೆ ನಾವು ಮುಂಬೈಗಿಂತಲೂ ವಿಸ್ತೀರ್ಣದಲ್ಲಿ ದೊಡ್ಡದಾದ ಮತ್ತು ಗುಣಮಟ್ಟದ ಮನೆಗಳನ್ನು ನಮ್ಮ ಬಡವರಿಗೆ ಕಟ್ಟಿಕೊಡಬೇಕು. ಇದಕ್ಕಿಂತ ಉತ್ತಮವಾಗಿ ನಾವೇನು ಮಾಡಲು ಸಾಧ್ಯ ಎಂಬ ಬಗ್ಗೆ ಮುಂದಿನ ಸಚಿವ ಸಂಪುಟ (Cabinet) ಸಭೆಯ ಒಳಗಾಗಿ ಸಮಗ್ರ ವರದಿಯನ್ನು ಸಿದ್ಧಪಡಿಸಬೇಕು” ಎಂದು ಗಡುವು ವಿಧಿಸಿದರು.

ಗ್ರಾಮೀಣ ವಸತಿ ವಿಳಂಬಕ್ಕೆ ಸಿಎಂ ಗರಂ:

ಹಳ್ಳಿಗಳಿಂದ ನಗರಕ್ಕೆ ಬಂದು ನೆಲೆಸಿರುವ ಬಡವರು ಮನೆಗಾಗಿ ಅರ್ಜಿ ಸಲ್ಲಿಸುವ ಕಾಗದದ ಪ್ರಕ್ರಿಯೆಗಳನ್ನು ಅತ್ಯಂತ ಸರಳಗೊಳಿಸಬೇಕು ಎಂದು ಸೂಚಿಸಿದ ಸಿಎಂ, ಗ್ರಾಮೀಣ ಭಾಗದ ವಸತಿ ಯೋಜನೆಗಳು ಮತ್ತು ನಿವೇಶನ ಹಂಚಿಕೆಯಲ್ಲಿ ಆಗುತ್ತಿರುವ ತಡಕ್ಕೆ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು. ಸರ್ಕಾರದಿಂದ ಅತ್ಯಂತ ಕಡಿಮೆ ದರದಲ್ಲಿ ನಿವೇಶನ ಪಡೆದವರು ಕಡ್ಡಾಯವಾಗಿ 3 ರಿಂದ 5 ವರ್ಷಗಳ ಒಳಗೆ ಮನೆ ನಿರ್ಮಿಸಿಕೊಳ್ಳುವ ನಿಬಂಧನೆಯನ್ನು ಕಟ್ಟುನಿಟ್ಟಾಗಿ ಮರುಪರಿಶೀಲಿಸುವಂತೆ ತಿಳಿಸಿದರು.

ಕರ್ನಾಟಕ ಗೃಹ ಮಂಡಳಿ (KHB) ವತಿಯಿಂದ ಅನುಮೋದನೆಗೊಂಡಿರುವ 568 ಯೋಜನೆಗಳ ಪೈಕಿ ಕೇವಲ 280 ಮಾತ್ರ ಅನುಷ್ಠಾನಕ್ಕೆ ಬಂದಿದ್ದು, ಉಳಿದ 288 ಯೋಜನೆಗಳು ಬಾಕಿ ಉಳಿದಿರುವ ಬಗ್ಗೆ ಸಿಎಂ ಅಸಮಾಧಾನ ವ್ಯಕ್ತಪಡಿಸಿದರು. ಈ ಬಾಕಿ ಇರುವ ಯೋಜನೆಗಳಿಗೆ ತಡೆ ಒಡ್ಡಿರುವ ಎಲ್ಲಾ ತಾಂತ್ರಿಕ ಅಡಚಣೆಗಳನ್ನು ತಕ್ಷಣವೇ ನಿವಾರಿಸಿ, ಸರ್ಕಾರಿ ಜಾಗಗಳು ದುರುಪಯೋಗ ಆಗದಂತೆ ಕಾಯಬೇಕು ಎಂದು ಎಚ್ಚರಿಸಿದ ಸಿಎಂ, ಯಾವುದೇ ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಮುನ್ನ ತಮ್ಮೊಂದಿಗೆ ಚರ್ಚಿಸುವುದು ಕಡ್ಡಾಯ ಎಂದು ಸ್ಪಷ್ಟಪಡಿಸಿದರು.

ಠೇವಣಿ ಕಟ್ಟಿ ಕಾಯುತ್ತಿರುವವರಿಗೆ ತಕ್ಷಣ ಮನೆ ಹಂಚಿ:

“ಸ್ವಂತ ಜೀವಿತಾವಧಿಯಲ್ಲಿ ಒಂದು ಪುಟ್ಟ ಮನೆ ಹೊಂದಬೇಕು ಎನ್ನುವುದು ಬಡವರು ಮತ್ತು ಮಧ್ಯಮ ವರ್ಗದ ಜನರ ಬದುಕಿನ ಅತಿ ದೊಡ್ಡ ಕನಸು. ವರ್ಷಗಳ ಹಿಂದೆಯೇ ಹಣ ಕಟ್ಟಿ ಅರ್ಜಿ ಸಲ್ಲಿಸಿದವರನ್ನು ಇನ್ನೂ ಕಾಯಿಸುತ್ತಿರುವುದು ಸರಿಯಲ್ಲ” ಹಲವು ವರ್ಷಗಳ ಹಿಂದೆಯೇ ವಸತಿ ಯೋಜನೆಯಡಿ ಮನೆಗಾಗಿ ಬಡವರು ಅರ್ಜಿ ಸಲ್ಲಿಸಿ, ನಿಯಮಾವಳಿಗಳ ಪ್ರಕಾರ ಠೇವಣಿ ಹಣವನ್ನೂ ಪಾವತಿಸಿದ್ದಾರೆ. “ಆ ಹಳೆಯ ಅರ್ಜಿಗಳ ಮೇಲೆ ಹಿಂದಿನ ಸರ್ಕಾರದ ವಸತಿ ಸಚಿವರಾಗಿದ್ದ ವಿ. ಸೋಮಣ್ಣ ಅವರ ಫೋಟೋಗಳೂ ಇವೆ! ಆದರೆ ಜನರಿಗೆ ಇನ್ನೂ ಮನೆ ಹಸ್ತಾಂತರವಾಗಿಲ್ಲ. ಆ ಬಡವರು ಇನ್ನೂ ಎಷ್ಟು ವರ್ಷ ಕಾಯಬೇಕು? ತಕ್ಷಣವೇ ಈ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿ ಮನೆಗಳನ್ನು ವಿತರಿಸಿ” ಎಂದು ಮುಖ್ಯಮಂತ್ರಿಗಳು ಕಟ್ಟುನಿಟ್ಟಿನ ಗಡುವು ನೀಡಿದರು. ಅರ್ಹ ಫಲಾನುಭವಿಗಳ ಪಟ್ಟಿಯನ್ನು ಶೀಘ್ರವಾಗಿ ಅಂತಿಮಗೊಳಿಸಲು ತಾವು ಸ್ವತಃ ಶಾಸಕರೊಂದಿಗೆ ಚರ್ಚಿಸುವುದಾಗಿ ಅವರು ತಿಳಿಸಿದರು.

ಶಿವರಾಮ ಕಾರಂತ ಬಡಾವಣೆ ಜವಾಬ್ದಾರಿ ಬಿಡಿಎಗೆ:

ಬೆಂಗಳೂರಿನ ಡಾ. ಶಿವರಾಮ ಕಾರಂತ ಬಡಾವಣೆಯಲ್ಲಿ ರಾಜೀವ್ ಗಾಂಧಿ ವಸತಿ ಯೋಜನೆಯಡಿ ನಿರ್ಮಾಣವಾಗಲಿರುವ ಮನೆಗಳ ಸಂಪೂರ್ಣ ಜವಾಬ್ದಾರಿಯನ್ನು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರಕ್ಕೆ (BDA) ವಹಿಸಲು ಸಿಎಂ ಸೂಚನೆ ನೀಡಿದರು. ಇದೇ ವೇಳೆ ಸಂಡೂರು ಭಾಗದಲ್ಲಿ ರಾಜೀವ್ ಗಾಂಧಿ ವಸತಿ ಯೋಜನೆಯಡಿ ನಿರ್ಮಿಸಲಾಗಿರುವ ಮನೆಗಳ ಅತ್ಯುತ್ತಮ ಗುಣಮಟ್ಟವನ್ನು ಮುಖ್ಯಮಂತ್ರಿಗಳು ಮುಕ್ತವಾಗಿ ಶ್ಲಾಘಿಸಿದರು.

ಮೂಲಸೌಕರ್ಯ ಕಡ್ಡಾಯ ಹಾಗೂ ಅರ್ಹರಿಗೇ ಮಣೆ:

“ಯಾವುದೇ ಹೊಸ ವಸತಿ ಯೋಜನೆಯನ್ನು ಕೈಗೆತ್ತಿಕೊಳ್ಳುವ ಮುನ್ನ ಅದು ಕಡ್ಡಾಯವಾಗಿ ಯೋಜನಾ ವಿಭಾಗದ (Planning Wing) ಒಪ್ಪಿಗೆಯನ್ನು ಪಡೆದುಕೊಂಡಿರಬೇಕು. ಕೇವಲ ಗೋಡೆಗಳನ್ನು ಕಟ್ಟಿ ಮನೆ ನಿರ್ಮಿಸಿದರೆ ಸಾಲದು, ಅಲ್ಲಿಗೆ ಹೋಗಲು ಸೂಕ್ತ ರಸ್ತೆ ಸಂಪರ್ಕ, ಕುಡಿಯುವ ನೀರು ಮತ್ತು ವಿದ್ಯುತ್‌ನಂತಹ ಅಗತ್ಯ ಮೂಲಭೂತ ಸೌಕರ್ಯಗಳನ್ನು ಕಲ್ಪಿಸುವುದು ಸರ್ಕಾರದ ಕರ್ತವ್ಯ” ಎಂದು ಅಧಿಕಾರಿಗಳಿಗೆ ನೆನಪಿಸಿದರು.

ಮನೆ ಹಂಚಿಕೆಯ ಪಾರದರ್ಶಕತೆಯ ಕುರಿತು ಕಟ್ಟುನಿಟ್ಟಿನ ನಿಲುವು ತಳೆದ ಸಿಎಂ, “ನೀವು ಲಾಟರಿ ಮೂಲಕ ಮನೆಗಳನ್ನು ವಿತರಿಸುತ್ತೀರೋ ಅಥವಾ ಹರಾಜು ಪ್ರಕ್ರಿಯೆಯನ್ನೇ ಬಳಸುತ್ತೀರೋ ಎನ್ನುವುದಕ್ಕಿಂತ, ಸೌಲಭ್ಯಗಳು ಕಡ್ಡಾಯವಾಗಿ ನೈಜ ಹಾಗೂ ಅತ್ಯಂತ ಅರ್ಹ ಬಡವರಿಗೇ ಸಿಗಬೇಕು. ಈ ನಿಟ್ಟಿನಲ್ಲಿ ಅರ್ಹರನ್ನು ಗುರುತಿಸಲು ನೀವು ಮಾಡಿಕೊಂಡಿರುವ ತಾಂತ್ರಿಕ ಸುರಕ್ಷತಾ ವ್ಯವಸ್ಥೆಗಳೇನು ಎಂಬುದರ ಸಂಪೂರ್ಣ ವರದಿಯನ್ನು ತಮಗೆ ಸಲ್ಲಿಸಬೇಕು” ಎಂದು ವಸತಿ ಇಲಾಖೆಯ ಉನ್ನತಾಧಿಕಾರಿಗಳಿಗೆ ಆದೇಶಿಸಿದರು.