ಬೆಂಗಳೂರು: ಸಿಲಿಕಾನ್ ಸಿಟಿಯ ಮೂಲಸೌಕರ್ಯಗಳನ್ನು ಸರಿಪಡಿಸಲು ಜಿಬಿಎ (Greater Bengaluru Authority) ಅಧಿಕಾರಿಗಳೊಂದಿಗೆ ಸಾಲು ಸಾಲು ಪ್ರಗತಿ ಪರಿಶೀಲನಾ ಸಭೆಗಳು, ಬಿಡುವಿಲ್ಲದ ರಾಜಕೀಯ ಓಡಾಟಗಳ ನಡುವೆಯೂ ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೃಷ್ಣಬೈರೇಗೌಡ ಅವರು ನಗರದ ಸಾಂಪ್ರದಾಯಿಕ ಆಹಾರದ ರುಚಿ ಸವಿಯಲು ಸಮಯ ಮಾಡಿಕೊಂಡಿದ್ದಾರೆ. ಬೆಂಗಳೂರಿನ ಹೆಮ್ಮೆಯ ಗುರುತಾಗಿರುವ ಐತಿಹಾಸಿಕ ಮಾವಳ್ಳಿ ಟಿಫಿನ್ ರೂಮ್ (MTR) ಹೋಟೆಲ್ಗೆ ಭೇಟಿ ನೀಡಿರುವ ಸಚಿವರು, ಅಲ್ಲಿನ ಉಪಹಾರದ ರುಚಿಗೆ ಮನಸೋತಿದ್ದಾರೆ.
ಬೆಂಗಳೂರು ನಗರಾಭಿವೃದ್ಧಿ ಎಂಬ ಅತ್ಯಂತ ಜವಾಬ್ದಾರಿಯುತ ಹಾಗೂ ಸವಾಲಿನ ಖಾತೆಯನ್ನು ವಹಿಸಿಕೊಂಡ ದಿನದಿಂದಲೂ ಕೃಷ್ಣಬೈರೇಗೌಡ ಅವರು ನಗರದ ರಸ್ತೆಗಳು ಮತ್ತು ಫುಟ್ಪಾತ್ಗಳ ಸುಧಾರಣೆಗೆ ಜಿಬಿಎ ಮತ್ತು ಮಹಾನಗರ ಪಾಲಿಕೆಗಳ ಅಧಿಕಾರಿಗಳ ಸರಣಿ ಸಭೆಗಳನ್ನು ನಡೆಸುತ್ತಾ ಫುಲ್ ಬ್ಯುಸಿಯಾಗಿದ್ದಾರೆ. ಈ ಕಠಿಣ ಆಡಳಿತಾತ್ಮಕ ಕಾರ್ಯಸೂಚಿಯ ನಡುವೆಯೂ ಸಾಮಾನ್ಯ ಗ್ರಾಹಕರಂತೆ ಹೋಟೆಲ್ಗೆ ಭೇಟಿ ನೀಡಿರುವ ಸಚಿವರು ಸಾರ್ವಜನಿಕರ ಗಮನ ಸೆಳೆದಿದ್ದಾರೆ.
‘ಬೆಸ್ಟ್ ರವೆ ಇಡ್ಲಿ, ಅನ್ಬೀಟಬಲ್ ಕಾಫಿ’
ಹೋಟೆಲ್ನಲ್ಲಿ ಸಾರ್ವಜನಿಕರೊಂದಿಗೆ ಕುಳಿತು ತಿಂಡಿ ಸವಿಯುತ್ತಿರುವ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಸಚಿವರು, “ಇಲ್ಲಿನ ರವೆ ಇಡ್ಲಿ ಅತ್ಯಂತ ಉತ್ಕೃಷ್ಟವಾಗಿದೆ ಮತ್ತು ಇಲ್ಲಿ ಸಿಗುವ ಫಿಲ್ಟರ್ ಕಾಫಿಯ ರುಚಿಯನ್ನು ಯಾವುದಕ್ಕೂ ಹೋಲಿಸಲು ಸಾಧ್ಯವಿಲ್ಲ. ಎಲ್ಲಕ್ಕಿಂತ ಹೆಚ್ಚಾಗಿ ಇಲ್ಲಿಗೆ ಬರುವ ಪ್ರೀತಿಯ ಬೆಂಗಳೂಿಗರು ತುಂಬಿದ್ದಾರೆ. ಎಂಟಿಆರ್ ನಿಜಕ್ಕೂ ನಮ್ಮ ಬೆಂಗಳೂರಿನ ಹೆಮ್ಮೆ” ಎಂದು ಮುಕ್ತವಾಗಿ ಕೊಂಡಾಡಿದ್ದಾರೆ.
ಸಚಿವರ ಪೋಸ್ಟ್ಗೆ ಸಿಕ್ಕ ನಗರಾಭಿವೃದ್ಧಿಯ ಆಂಗಲ್!
ಬೆಂಗಳೂರು ನಗರಾಭಿವೃದ್ಧಿ ಸಚಿವರಾಗಿ ಕೃಷ್ಣಬೈರೇಗೌಡ ಅವರು ಅಧಿಕಾರ ವಹಿಸಿಕೊಂಡ ಬೆನ್ನಲ್ಲೇ ಈ ಭೇಟಿ ನಡೆದಿರುವುದು ರಾಜಕೀಯ ವಲಯದಲ್ಲಿ ಭಾರಿ ಕುತೂಹಲ ಮೂಡಿಸಿದೆ. ನಗರದ ಸಂಚಾರ ದಟ್ಟಣೆ ನಿವಾರಣೆ, ಐದು ಹೊಸ ನಗರ ಪಾಲಿಕೆಗಳ ಉಸ್ತುವಾರಿ ಹಾಗೂ ಜಿಬಿಎ ವ್ಯಾಪ್ತಿಯಲ್ಲಿ ಆಡಳಿತ ಸುಧಾರಣೆ ತರುವ ಮಹತ್ತರ ಜವಾಬ್ದಾರಿ ಈಗ ಅವರ ಹೆಗಲಿಗೇರಿದೆ. ಇಂತಹ ಕಟ್ಟುನಿಟ್ಟಿನ ಅಧಿಕಾರಶಾಹಿ ಸಭೆಗಳ ನಡುವೆ, ಹಳೇ ಬೆಂಗಳೂರಿನ ಅಸ್ಮಿತೆಯಾಗಿರುವ ಎಂಟಿಆರ್ನಂತಹ ಸ್ಥಳಕ್ಕೆ ಭೇಟಿ ನೀಡಿರುವುದು ಅವರು ಕೇವಲ ಕಚೇರಿ ಆಡಳಿತಕ್ಕಷ್ಟೇ ಸೀಮಿತವಾಗದೆ, ಬೆಂಗಳೂರಿನ ಸ್ಥಳೀಯ ಸಂಸ್ಕೃತಿ ಮತ್ತು ಜನಸಾಮಾನ್ಯರ ನಾಡಿಮಿಡಿತವನ್ನು ಹತ್ತಿರದಿಂದ ಅರಿಯಲು ಪ್ರಯತ್ನಿಸುತ್ತಿದ್ದಾರೆ ಎಂಬ ಸಂದೇಶವನ್ನು ರವಾನಿಸಿದೆ.
ನಗರದ ಆಧುನಿಕ ಐಟಿ ಸಂಸ್ಕೃತಿಯ ಜೊತೆಗೆ ಇಲ್ಲಿನ ಸಾಂಪ್ರದಾಯಿಕ ಆಹಾರದ ಬ್ರ್ಯಾಂಡ್ಗಳನ್ನು ಗೌರವಿಸುವ ಸಚಿವರ ಈ ನಡೆಗೆ ರಾಜಧಾನಿಯ ಆಹಾರ ಪ್ರಿಯರು ಮತ್ತು ಸಾರ್ವಜನಿಕರಿಂದ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.