ಬೆಂಗಳೂರು: ಸ್ವಚ್ಛತಾ ಕಾರ್ಮಿಕರ ಸ್ವಾಭಿಮಾನಕ್ಕೆ ಧಕ್ಕೆ ತಂದ ಘಟನೆಯೊಂದಕ್ಕೆ ತೀವ್ರವಾಗಿ ಸ್ಪಂದಿಸಿರುವ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು, ಪೌರಕಾರ್ಮಿಕರ ದಿನಾಚರಣೆಯ ಅಧಿಕೃತ ಕಾರ್ಯಕ್ರಮದ ವೇದಿಕೆಯ ಮೇಲೆಯೇ ಸ್ವತಃ ಪೌರಕಾರ್ಮಿಕರ ಸಮವಸ್ತ್ರ ಧರಿಸುವ ಮೂಲಕ ಸಮಾಜಕ್ಕೆ ದೊಡ್ಡ ಮಾನವೀಯ ಸಂದೇಶ ನೀಡಿದ್ದಾರೆ.
ಮನ ಕಲಕುವ ಘಟನೆ:
ನಗರದ ಖಾಸಗಿ ಶಾಲೆಯೊಂದರಲ್ಲಿ ಓದುತ್ತಿರುವ ಪೌರಕಾರ್ಮಿಕ ಮಹಿಳೆಯ ಮಗಳಿಗೆ ಆಕೆಯ ಸಹಪಾಠಿಯೊಬ್ಬಳು ಸಾರ್ವಜನಿಕವಾಗಿ ಅವಮಾನ ಮಾಡಿದ್ದಾಳೆ. ತಾಯಿ ತನ್ನ ಕರ್ತವ್ಯದ ಸಮವಸ್ತ್ರದಲ್ಲೇ ಮಗಳನ್ನು ಬಿಡಲು ಶಾಲೆಗೆ ಬಂದಿದ್ದನ್ನು ಕಂಡ ಸಹಪಾಠಿ, “ನಿಮ್ಮಮ್ಮ ಕಾರ್ಪೋರೇಷನ್ ಬಟ್ಟೆ ಹಾಕಿದ್ದಾರೆ, ವಾಸನೆ ಬರುತ್ತದೆ, ನನ್ನ ಹತ್ತಿರ ಬರಬೇಡ” ಎಂದು ಹೀಯಾಳಿಸಿ ದೂರ ತಳ್ಳಿದ್ದಾಳೆ. ಶಾಲಾ ಮಗುವಿನ ಈ ವರ್ತನೆಯಿಂದ ಮನನೊಂದ ತಾಯಿ, ತಮಗಾದ ಕಹಿ ಅನುಭವವನ್ನು ನೆನೆದು ಕಣ್ಣೀರು ಹಾಕಿದ್ದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡಿತ್ತು.
ನಾಯಕನ ನಡೆ:
ಬೆಂಗಳೂರಿನಲ್ಲಿ ನಡೆದ ಪೌರಕಾರ್ಮಿಕರ ದಿನಾಚರಣೆ ಸಮಾವೇಶದಲ್ಲಿ ಪಾಲ್ಗೊಂಡಿದ್ದ ಡಿ.ಕೆ. ಶಿವಕುಮಾರ್ ಅವರ ಗಮನಕ್ಕೆ ಈ ಭಾವುಕ ವಿಡಿಯೋ ಬಂದಿದೆ. ತಕ್ಷಣವೇ ಕಾರ್ಯಕ್ರಮದ ವೇದಿಕೆಯ ಮೇಲೆಯೇ ಪೌರಕಾರ್ಮಿಕರ ಸಮವಸ್ತ್ರವನ್ನು ತರಿಸಿಕೊಂಡ ಅವರು, ಎಲ್ಲರ ಸಮ್ಮುಖದಲ್ಲೇ ಅದನ್ನು ಧರಿಸಿದರು.
ಬಳಿಕ ಮಾತನಾಡಿದ ಅವರು, “ಯಾವ ವೃತ್ತಿಯೂ ಕೀಳಲ್ಲ. ನಮ್ಮ ನಗರ, ನಮ್ಮ ಬೀದಿಗಳನ್ನು ಸ್ವಚ್ಛವಾಗಿಡುವ ಶ್ರಮಜೀವಿಗಳ ಬೆವರಿನ ವಾಸನೆ ಸಮಾಜದ ಸ್ವಾಸ್ಥ್ಯವನ್ನು ಕಾಯುತ್ತದೆ. ಈ ಸಮವಸ್ತ್ರ ನಮಗೆ ಹೆಮ್ಮೆ” ಎಂದು ಹೇಳುವ ಮೂಲಕ ಕಾರ್ಮಿಕರಲ್ಲಿ ಆತ್ಮವಿಶ್ವಾಸ ತುಂಬಿದರು. ನಾಯಕರ ಈ ಅಪರೂಪದ ನಡೆಗೆ ಸಾರ್ವಜನಿಕ ವಲಯದಲ್ಲಿ ಭಾರಿ ಶ್ಲಾಘನೆ ವ್ಯಕ್ತವಾಗುತ್ತಿದೆ.