ಅಯೋಧ್ಯಾ: ದೀಪಾವಳಿ ಹಬ್ಬದ ಪವಿತ್ರ ಪರ್ವಕಾಲದ ಹಿನ್ನೆಲೆಯಲ್ಲಿ ಇಡೀ ದೇಶವೇ ಸಂಭ್ರಮದ ವಾತಾವರಣದಲ್ಲಿದ್ದು, ತನ್ನ ಆರಾಧ್ಯ ದೈವ ಪ್ರಭು ಶ್ರೀರಾಮನನ್ನು ಸ್ವಾಗತಿಸಲು ಇಡೀ ಶ್ರೀರಾಮ ಜನ್ಮಭೂಮಿ ಸಂಕೀರ್ಣವು ಸಂಪೂರ್ಣವಾಗಿ ಸಜ್ಜಾಗಿದೆ.
ಭವ್ಯ ಮಂದಿರದ ನಿರ್ಮಾಣದ ನಂತರದ ದೀಪೋತ್ಸವ ಇದಾಗಿರುವುದರಿಂದ, ಈ ಬಾರಿಯ ದೀಪಾವಳಿಯು ಅಯೋಧ್ಯೆಯಲ್ಲಿ ಹಿಂದೆಂದೂ ಕಾಣದಷ್ಟು ಭಕ್ತಿ ಮತ್ತು ಸಾಂಸ್ಕೃತಿಕ ವೈಭವದೊಂದಿಗೆ ಮೇಳೈಸಿದೆ.
ಸಂಪೂರ್ಣ ಶ್ರೀರಾಮ ಜನ್ಮಭೂಮಿ ಆವರಣವು ಅಲೌಕಿಕ ಕಳೆಯಿಂದ ಕಂಗೊಳಿಸುತ್ತಿದ್ದು, ಮಂದಿರದ ಪ್ರತಿಯೊಂದು ಮೂಲೆ ಮೂಲೆಗಳೂ ದೀಪಗಳ ಸಾಲಿನಿಂದ ದಿವ್ಯ ಆಭೆಯನ್ನು ಸೂಸುತ್ತಿವೆ. ಆಧುನಿಕ ಬೆಳಕಿನ ವಿನ್ಯಾಸ ಮತ್ತು ಸಾಂಪ್ರದಾಯಿಕ ಹಣತೆಗಳ ದೀಪಾಲಂಕಾರದಿಂದ ಜಗಮಗಿಸುತ್ತಿರುವ ಭವ್ಯ ಶ್ರೀರಾಮ ಮಂದಿರದ ನೋಟ ಭಕ್ತರ ಕಣ್ಮನ ಸೆಳೆಯುತ್ತಿದೆ. ಮಂದಿರದ ಗೋಪುರಗಳು, ಕೆತ್ತನೆಗಳು ಮತ್ತು ಪ್ರಾಂಗಣಗಳು ನವಿರಾದ ವರ್ಣರಂಜಿತ ದೀಪಗಳ ಬೆಳಕಿನಲ್ಲಿ ಮಿಂದೇಳುತ್ತಿದ್ದು, ಇಲ್ಲಿನ ಧಾರ್ಮಿಕ ವಾತಾವರಣ ಭಕ್ತರಲ್ಲಿ ಆಧ್ಯಾತ್ಮಿಕ ಪರವಶತೆಯನ್ನು ಉಂಟುಮಾಡುತ್ತಿದೆ. ಸರಯೂ ನದಿಯ ತೀರದಿಂದ ಹಿಡಿದು ಮುಖ್ಯ ಮಂದಿರದವರೆಗೂ ಲಕ್ಷಾಂತರ ದೀಪಗಳನ್ನು ಬೆಳಗಿಸಲು ಸಕಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ.
ಈ ಪವಿತ್ರ ಕಾಲದಲ್ಲಿ ಇಡೀ ರಾಮನಗರಿಯು ದೀಪಗಳ ಬೆಳಕಿನಲ್ಲಿ ಮಿಂದೇಳುತ್ತಿದ್ದು, ಭಕ್ತರು ಹಾಗೂ ಪ್ರವಾಸಿಗರು ಈ ಅಪೂರ್ವ ಕ್ಷಣವನ್ನು ಕಣ್ತುಂಬಿಕೊಳ್ಳಲು ದೇಶದ ಮೂಲೆ ಮೂಲೆಗಳಿಂದ ಆಗಮಿಸುತ್ತಿದ್ದಾರೆ. ನಯನಮನೋಹರ ಬೆಳಕಿನ ಚಿತ್ತಾರದಿಂದ ಕಂಗೊಳಿಸುತ್ತಿರುವ ಈ ಪವಿತ್ರ ಧಾಮದಲ್ಲಿ, ಪ್ರತಿಯೊಬ್ಬ ಭಕ್ತನೂ ಶ್ರದ್ಧೆ, ಭಕ್ತಿ ಮತ್ತು ಮಮತೆಯ ಒಂದು ದೀಪವನ್ನು ತನ್ನ ಮನದಲ್ಲೂ ಹಾಗೂ ಮಂದಿರದ ಆವರಣದಲ್ಲೂ ಪ್ರಜ್ವಲಿಸುವ ಮೂಲಕ ಈ ಐತಿಹಾಸಿಕ ಮತ್ತು ಭವ್ಯ ದೀಪೋತ್ಸವ ಸಂಭ್ರಮದ ಭಾಗವಾಗಲು ಆಹ್ವಾನಿಸಲಾಗಿದೆ. ಈ ದಿವ್ಯ ದೃಶ್ಯವು ಪ್ರಭು ಶ್ರೀರಾಮನ ಭವ್ಯ ಇತಿಹಾಸ ಮತ್ತು ಸಂಸ್ಕೃತಿಯನ್ನು ಮರುಸೃಷ್ಟಿಸಿದಂತೆ ಭಾಸವಾಗುತ್ತಿದೆ.
(ಚಿತ್ರ ಕೃಪೆ: ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್, ಅಯೋಧ್ಯಾ)