ವೀರಲೋಕ ಪುಸ್ತಕ ಸಂತೆ: ಲೇಖಕರು ಹಾಗೂ ಪ್ರಕಾಶಕರ ಪುಸ್ತಕಗಳ ಉಚಿತ ಪ್ರದರ್ಶನ ಮತ್ತು ಮಾರಾಟಕ್ಕೆ ಸುವರ್ಣಾವಕಾಶ

ಬೆಂಗಳೂರು: ಕನ್ನಡ ಪುಸ್ತಕ ಪ್ರಕಾಶನ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ‘ವೀರಲೋಕ’ ಸಂಸ್ಥೆಯು ತನ್ನ ಬಹುನಿರೀಕ್ಷಿತ 6ನೇ ಆವೃತ್ತಿಯ ‘ವೀರಲೋಕ ಪುಸ್ತಕ ಸಂತೆ’ಯನ್ನು ನವೆಂಬರ್ 20, 21 ಮತ್ತು 22 ರಂದು ಮೂರು ದಿನಗಳ ಕಾಲ ಬೆಂಗಳೂರಿನ ಜಯನಗರದಲ್ಲಿರುವ ಚಂದ್ರಗುಪ್ತ ಮೌರ್ಯ ಆಟದ (ಶಾಲಿನಿ) ಮೈದಾನದಲ್ಲಿ ಹಮ್ಮಿಕೊಂಡಿದೆ.

ಕನ್ನಡ ರಾಜ್ಯೋತ್ಸವದ ವಿಶೇಷ ಸಂಭ್ರಮದ ಅಂಗವಾಗಿ ಹಮ್ಮಿಕೊಳ್ಳಲಾಗಿರುವ ಈ ಸಂತೆಯಲ್ಲಿ, ಬರಹಗಾರರು ಮತ್ತು ಪ್ರಕಾಶಕರಿಗೆ ತಮ್ಮ ಪುಸ್ತಕಗಳನ್ನು ಉಚಿತವಾಗಿ ಪ್ರದರ್ಶಿಸಲು ಹಾಗೂ ಮಾರಾಟ ಮಾಡಲು ಸುವರ್ಣಾವಕಾಶವನ್ನು ಕಲ್ಪಿಸಲಾಗಿದೆ. ತಾವು ಬರೆದ ಅಥವಾ ಪ್ರಕಟಿಸಿದ ಪುಸ್ತಕಗಳು ಕೇವಲ ಮನೆಯಲ್ಲಿ ಉಳಿಯದೆ, ಹೊಸ ಓದುಗರ ಕೈ ಸೇರಬೇಕು ಹಾಗೂ ಕನ್ನಡ ಪುಸ್ತಕಗಳ ಮೂಲಕ ಕನ್ನಡವನ್ನು ಕಟ್ಟಬೇಕು ಎಂಬ ಉದಾತ್ತ ಉದ್ದೇಶದಿಂದ ವೀರಲೋಕ ಸಂಸ್ಥೆಯ ವೀರಕಪುತ್ರ ಶ್ರೀನಿವಾಸ ಅವರು ಈ ವಿಶಿಷ್ಟ ವೇದಿಕೆಯನ್ನು ಸಿದ್ಧಪಡಿಸಿದ್ದಾರೆ.

ಪುಸ್ತಕ ಸಂತೆಯ ಪ್ರಮುಖ ನಿಯಮಗಳು:

ಈ ಪ್ರದರ್ಶನದಲ್ಲಿ ಇಡಲಾಗುವ ಯಾವುದೇ ಪುಸ್ತಕದ ಮಾರಾಟದ ಬೆಲೆ ಕೇವಲ ₹100 ಆಗಿರಬೇಕು.

ಸಂತೆ ಅಥವಾ ಮೇಳದಲ್ಲಿ ಮಾರಾಟವಾದ ಪುಸ್ತಕಗಳಿಗೆ ಮಾತ್ರ ಲೇಖಕರಿಗೆ/ಪ್ರಕಾಶಕರಿಗೆ ಹಣವನ್ನು ಪಾವತಿಸಲಾಗುತ್ತದೆ.

ಮಾರಾಟವಾಗದೆ ಉಳಿಯುವ ಪುಸ್ತಕಗಳನ್ನು ಸುರಕ್ಷಿತವಾಗಿ ಅವರಿಗೆ ಹಿಂತಿರುಗಿಸಲಾಗುತ್ತದೆ.

ಪುಸ್ತಕಗಳನ್ನು ಸಲ್ಲಿಸಲು ಕೊನೆಯ ದಿನಾಂಕ:

ಆಸಕ್ತ ಬರಹಗಾರರು ಮತ್ತು ಪ್ರಕಾಶಕರು ತಮ್ಮ ಪುಸ್ತಕಗಳನ್ನು ನವೆಂಬರ್ 19ರ ಗುರುವಾರ ಸಂಜೆ 7 ಗಂಟೆಯ ಒಳಗಾಗಿ ಜಯನಗರದ ಚಂದ್ರಗುಪ್ತ ಮೌರ್ಯ ಮೈದಾನಕ್ಕೆ ತಲುಪಿಸಿ, ಅಧಿಕೃತ ರಶೀದಿಯನ್ನು ಪಡೆದುಕೊಳ್ಳಬಹುದು.

ಪುಸ್ತಕ ಸಂತೆಯು ಆಯೋಜಿತ ದಿನಗಳಂದು (ನವೆಂಬರ್ 20 ರಿಂದ 22) ಬೆಳಿಗ್ಗೆ 10 ಗಂಟೆಯಿಂದ ರಾತ್ರಿ 9 ಗಂಟೆಯವರೆಗೆ ಸಾರ್ವಜನಿಕರಿಗೆ ಮುಕ್ತವಾಗಿರುತ್ತದೆ. ಕನ್ನಡದ ಎಲ್ಲಾ ಪುಸ್ತಕ ಪ್ರೇಮಿಗಳು, ಸಾರ್ವಜನಿಕರು ಈ ಮಾಹಿತಿಯನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುವ ಮೂಲಕ ಪುಸ್ತಕ ಸಂತೆಯ ಯಶಸ್ಸಿಗೆ ಕೈಜೋಡಿಸಬೇಕು ಎಂದು ಆಯೋಜಕರು ಕೋರಿದ್ದಾರೆ. ಹೆಚ್ಚಿನ ವಿವರಗಳಿಗಾಗಿ ಮತ್ತು ಪುಸ್ತಕಗಳನ್ನು ತಲುಪಿಸುವ ಕುರಿತು ಮಾಹಿತಿ ಪಡೆಯಲು ಆಯೋಜಕರ ಸಂಪರ್ಕ ಸಂಖ್ಯೆಗಳಾದ 7022122121 ಅಥವಾ 8861212172 ಅನ್ನು ಸಂಪರ್ಕಿಸಬಹುದಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.