ಬೆಂಗಳೂರು: ರೈಲ್ವೆ ಇಲಾಖೆಯು ವಿವಿಧ ಮಾರ್ಗಗಳಲ್ಲಿ ಸಂಚರಿಸುವ ಪ್ರಮುಖ ರೈಲುಗಳ ವರ್ಗ, ಸಂಖ್ಯೆ ಹಾಗೂ ನಿಲುಗಡೆಗೆ ಸಂಬಂಧಿಸಿದಂತೆ ಮಹತ್ವದ ಬದಲಾವಣೆಗಳನ್ನು ಪ್ರಕಟಿಸಿದೆ.
1. ಮುಂಬೈ–ಹೊಸಪೇಟೆ ರೈಲಿನ ವರ್ಗ ಬದಲಾವಣೆ:
ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ (ಸಿಎಸ್ಎಂಟಿ) ಮುಂಬೈ ಮತ್ತು ಹೊಸಪೇಟೆ ನಡುವೆ ಸಂಚರಿಸುವ ಸೂಪರ್ಫಾಸ್ಟ್ ರೈಲನ್ನು (ಸಂಖ್ಯೆ 11139/11140) ಮೇಲ್/ಎಕ್ಸ್ಪ್ರೆಸ್ ರೈಲಾಗಿ ಪರಿವರ್ತಿಸಲು ಮಧ್ಯ ರೈಲ್ವೆ ನಿರ್ಧರಿಸಿದೆ. ಈ ಹೊಸ ನಿಯಮವು 2027ರ ಜನವರಿ 1ರಿಂದ ಎರಡೂ ಮಾರ್ಗಗಳಿಂದ ಆರಂಭವಾಗುವ ಪ್ರಯಾಣಕ್ಕೆ ಅನ್ವಯವಾಗಲಿದೆ. ಆದರೆ, ರೈಲು ಸಂಖ್ಯೆಗಳಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.
2. ಕಾಚಿಗುಡ–ಅಶೋಕಪುರಂ ರೈಲಿನ ಸಂಖ್ಯೆ ಪರಿಷ್ಕರಣೆ:
ಕಾಚಿಗುಡ ಮತ್ತು ಮೈಸೂರಿನ ಅಶೋಕಪುರಂ ನಡುವೆ ಪ್ರತಿದಿನ ಸಂಚರಿಸುವ ಸೂಪರ್ಫಾಸ್ಟ್ ಎಕ್ಸ್ಪ್ರೆಸ್ ರೈಲನ್ನು (ಸಂಖ್ಯೆ 12785/12786) ಮೇಲ್/ಎಕ್ಸ್ಪ್ರೆಸ್ ವರ್ಗಕ್ಕೆ ಬದಲಾಯಿಸಲಾಗಿದೆ. ಇದರೊಂದಿಗೆ ರೈಲಿನ ಸಂಖ್ಯೆಯನ್ನು 17685/17686 ಎಂದು ಪರಿಷ್ಕರಿಸಲಾಗಿದೆ ಎಂದು ದಕ್ಷಿಣ ಮಧ್ಯ ರೈಲ್ವೆ ತಿಳಿಸಿದೆ. ಈ ಪರಿಷ್ಕೃತ ಸಂಖ್ಯೆ ಹಾಗೂ ವರ್ಗವು 2027ರ ಜನವರಿ 2ರಿಂದ ಎರಡೂ ನಿಲ್ದಾಣಗಳಿಂದ ಹೊರಡುವ ರೈಲುಗಳಿಗೆ ಜಾರಿಗೆ ಬರಲಿದೆ.
3. ಉಂಜಲೂರು ನಿಲ್ದಾಣದಲ್ಲಿ ತಾತ್ಕಾಲಿಕ ನಿಲುಗಡೆ:
ಪ್ರಯಾಣಿಕರ ಅನುಕೂಲಕ್ಕಾಗಿ ಟುಟಿಕೋರಿನ್–ಮೈಸೂರು–ಟುಟಿಕೋರಿನ್ ದೈನಂದಿನ ಎಕ್ಸ್ಪ್ರೆಸ್ ರೈಲಿಗೆ (ಸಂಖ್ಯೆ 16235/16236) ಉಂಜಲೂರು ನಿಲ್ದಾಣದಲ್ಲಿ ಒಂದು ನಿಮಿಷದ ತಾತ್ಕಾಲಿಕ ನಿಲುಗಡೆ ಕಲ್ಪಿಸಲು ದಕ್ಷಿಣ ರೈಲ್ವೆ ತೀರ್ಮಾನಿಸಿದೆ.
ಟುಟಿಕೋರಿನ್–ಮೈಸೂರು (16235): 2026ರ ಡಿಸೆಂಬರ್ 31 ಹಾಗೂ 2027ರ ಜನವರಿ 1ರಂದು ಹೊರಡುವ ಈ ರೈಲು ರಾತ್ರಿ 11:13ಕ್ಕೆ (23:13) ಉಂಜಲೂರು ನಿಲ್ದಾಣಕ್ಕೆ ಬಂದು, 11:14ಕ್ಕೆ (23:14) ನಿರ್ಗಮಿಸಲಿದೆ.
ಮೈಸೂರು–ಟುಟಿಕೋರಿನ್ (16236): 2026ರ ಡಿಸೆಂಬರ್ 30 ಹಾಗೂ 31ರಂದು ಹೊರಡುವ ಈ ರೈಲು ಬೆಳಗಿನ ಜಾವ 4:09ಕ್ಕೆ ಉಂಜಲೂರು ನಿಲ್ದಾಣ ತಲುಪಿ, 4:10ಕ್ಕೆ ಹೊರಡಲಿದೆ.

