ಮೈಸೂರು: ಸಾಂಸ್ಕೃತಿಕ ನಗರಿಯ ಅಂದಗೆಡಿಸುವ ‘ಫ್ಲೆಕ್ಸ್ ಸಂಸ್ಕೃತಿ’ಗೆ ಅಂತ್ಯ ಹಾಡಲು ಮೈಸೂರು-ಕೊಡಗು ಲೋಕಸಭಾ ಕ್ಷೇತ್ರದ ಸಂಸದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಮಹತ್ವದ ಹೆಜ್ಜೆ ಇಟ್ಟಿದ್ದಾರೆ. ಮಾರ್ಚ್ 24ರಂದು ತಮ್ಮ ಜನ್ಮದಿನದ ಅಂಗವಾಗಿ ನಗರದಾದ್ಯಂತ ಯಾವುದೇ ಬ್ಯಾನರ್ ಅಥವಾ ಪ್ಲೆಕ್ಸ್ಗಳನ್ನು ಅಳವಡಿಸಬಾರದು ಎಂದು ಅವರು ಅಭಿಮಾನಿಗಳಿಗೆ ಕಟ್ಟುನಿಟ್ಟಿನ ಮನವಿ ಮಾಡಿದ್ದಾರೆ.
ನನ್ನ ಕನಸು ‘ಫ್ಲೆಕ್ಸ್ ಮುಕ್ತ ಮೈಸೂರು’:
“ಮೈಸೂರಿನ ಸೌಂದರ್ಯ ಕಾಪಾಡುವುದು ನಮ್ಮೆಲ್ಲರ ಹೊಣೆ. ಪ್ಲೆಕ್ಸ್ಗಳಿಂದ ನಗರದ ಅಂದಗೆಡುವುದಲ್ಲದೆ ಪರಿಸರಕ್ಕೂ ಹಾನಿಯಾಗುತ್ತಿದೆ. ‘ಫ್ಲೆಕ್ಸ್ ಮುಕ್ತ ಮೈಸೂರು’ ಎಂಬುದು ನನ್ನ ಕನಸು. ಈ ಸಂಕಲ್ಪಕ್ಕೆ ನನ್ನ ಜನ್ಮದಿನದಂದೇ ಚಾಲನೆ ಸಿಗಲಿ,” ಎಂದು ಯದುವೀರ್ ಆಶಿಸಿದ್ದಾರೆ. ಅಭಿಮಾನಿಗಳು ನೀಡುವ ಈ ಸಹಕಾರವೇ ತಮಗೆ ನಿಜವಾದ ಜನ್ಮದಿನದ ಉಡುಗೊರೆ ಎಂದು ಅವರು ಭಾವನಾತ್ಮಕವಾಗಿ ನುಡಿದಿದ್ದಾರೆ.
ಸಮಾಜಮುಖಿ ಕಾರ್ಯಕ್ಕೆ ಆದ್ಯತೆ:
ಜನ್ಮದಿನದ ಹೆಸರಿನಲ್ಲಿ ದುಬಾರಿ ವೆಚ್ಚ ಅಥವಾ ಅದ್ದೂರಿ ಆಚರಣೆ ಮಾಡುವ ಬದಲು, ಸಮಾಜಕ್ಕೆ ಉಪಯುಕ್ತವಾಗುವ ಕೆಲಸಗಳನ್ನು ಮಾಡುವಂತೆ ಅವರು ಕರೆ ನೀಡಿದ್ದಾರೆ.
ರಕ್ತದಾನ ಶಿಬಿರಗಳ ಆಯೋಜನೆ.
ಬಡವರಿಗೆ ಅನ್ನದಾನ ಮಾಡುವುದು.
ಪರಿಸರ ರಕ್ಷಣೆಗಾಗಿ ಸಸಿ ನೆಡುವ ಕಾರ್ಯಕ್ರಮ.
ಜನೋಪಕಾರಿ ಹಾಗೂ ಸಮಾಜಮುಖಿ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳುವಂತೆ ತಿಳಿಸಿದ್ದಾರೆ.
ಒಂದು ವೇಳೆ ಅಭಿಮಾನಿಗಳು ಉತ್ಸಾಹದಿಂದ ಎಲ್ಲಾದರೂ ಪ್ಲೆಕ್ಸ್ ಅಳವಡಿಸಿರುವುದು ಕಂಡುಬಂದಲ್ಲಿ, ಅದನ್ನು ತಕ್ಷಣವೇ ತೆರವುಗೊಳಿಸುವಂತೆ ಸಂಸದರು ಈಗಾಗಲೇ ತಮ್ಮ ಕಚೇರಿಯ ಸಿಬ್ಬಂದಿಗೆ ಸೂಚನೆ ನೀಡಿದ್ದಾರೆ. ರಾಜಕೀಯ ನಾಯಕರ ಜನ್ಮದಿನ ಎಂದರೆ ನಗರವಿಡೀ ಪ್ಲೆಕ್ಸ್ಗಳಿಂದ ತುಂಬಿ ಹೋಗುವ ಇಂದಿನ ಕಾಲದಲ್ಲಿ, ಯದುವೀರ್ ಅವರ ಈ ನಿರ್ಧಾರ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಪ್ರಶಂಸೆಗೆ ಪಾತ್ರವಾಗಿದೆ.