ಬೆಂಗಳೂರು: 2026-27ನೇ ಸಾಲಿನ ಎಸ್.ಎಸ್.ಎಲ್.ಸಿ (SSLC) ಮತ್ತು ದ್ವಿತೀಯ ಪಿಯುಸಿ (II PUC) ಪರೀಕ್ಷೆ-1 ಮತ್ತು ಪರೀಕ್ಷೆ-2 ರ ತಾತ್ಕಾಲಿಕ ವೇಳಾಪಟ್ಟಿಯನ್ನು ಕರ್ನಾಟಕ ಶಾಲಾ ಪರೀಕ್ಷೆ ಮತ್ತು ಮೌಲ್ಯ ನಿರ್ಣಯ ಮಂಡಲಿಯು ತನ್ನ ಅಧಿಕೃತ ಜಾಲತಾಣದಲ್ಲಿ ಗುರುವಾರ ಅಧಿಕೃತವಾಗಿ ಪ್ರಕಟಿಸಿದೆ.
ವೇಳಾಪಟ್ಟಿಗೆ ಸಂಬಂಧಿಸಿದಂತೆ ವಿದ್ಯಾರ್ಥಿಗಳು, ಪೋಷಕರು ಹಾಗೂ ಸಾರ್ವಜನಿಕರು ಆಕ್ಷೇಪಣೆಗಳನ್ನು ಸಲ್ಲಿಸಲು ದಿನಾಂಕ 08-10-2026 ರಿಂದ 22-10-2026 ರವರೆಗೆ 15 ದಿನಗಳ ಕಾಲಾವಕಾಶ ನೀಡಲಾಗಿದೆ. ಆಕ್ಷೇಪಣೆಗಳನ್ನು ಎಸ್.ಎಸ್.ಎಲ್.ಸಿ ಗೆ ಸಂಬಂಧಿಸಿದಂತೆ dpikseab@gmail.com ಹಾಗೂ ಪಿಯುಸಿಗೆ ಸಂಬಂಧಿಸಿದಂತೆ directorpuekseab@gmail.com ಇ-ಮೇಲ್ ವಿಳಾಸಗಳಿಗೆ ನಿಗದಿತ ಸಮಯದೊಳಗೆ ಕಳುಹಿಸಬೇಕಾಗಿದ್ದು, ತದನಂತರ ಬರುವ ಆಕ್ಷೇಪಣೆಗಳನ್ನು ಪರಿಗಣಿಸಲಾಗುವುದಿಲ್ಲ ಎಂದು ಮಂಡಲಿಯ ಅಧ್ಯಕ್ಷರು ಸುತ್ತೋಲೆಯಲ್ಲಿ ತಿಳಿಸಿದ್ದಾರೆ.
ಪ್ರಕಟಿಸಲಾಗಿರುವ ತಾತ್ಕಾಲಿಕ ವೇಳಾಪಟ್ಟಿಯ ಮುಖ್ಯ ವಿವರಗಳು ಈ ಕೆಳಗಿನಂತಿವೆ:
1. ದ್ವಿತೀಯ ಪಿಯುಸಿ ಪರೀಕ್ಷಾ ವೇಳಾಪಟ್ಟಿ (II PUC Time Table)
ಪರೀಕ್ಷೆ – 1: 2027ರ ಫೆಬ್ರವರಿ 27 ರಿಂದ ಮಾರ್ಚ್ 17 ರವರೆಗೆ ನಡೆಯಲಿದೆ. ಫೆಬ್ರವರಿ 27 ರಂದು ಕನ್ನಡ/ಅರೇಬಿಕ್ ಪರೀಕ್ಷೆಯೊಂದಿಗೆ ಆರಂಭವಾಗಿ, ಮಾರ್ಚ್ 17 ರಂದು ಹಿಂದಿ ಪರೀಕ್ಷೆಯೊಂದಿಗೆ ಮುಕ್ತಾಯಗೊಳ್ಳಲಿದೆ. ಪರೀಕ್ಷಾ ಸಮಯ ಬೆಳಗ್ಗೆ 10:00 ರಿಂದ ಮಧ್ಯಾಹ್ನ 1:00 ಗಂಟೆಯವರೆಗೆ ಇರಲಿದೆ. (ಮಾರ್ಚ್ 6 ರಂದು ಮಹಾಶಿವರಾತ್ರಿ ಹಾಗೂ ಮಾರ್ಚ್ 10 ರಂದು ರಂಜಾನ್ ನಿಮಿತ್ತ ಪರೀಕ್ಷೆ ಇರುವುದಿಲ್ಲ).
ಪರೀಕ್ಷೆ – 2: 2027ರ ಮೇ 3 ರಿಂದ ಮೇ 15 ರವರೆಗೆ ಜರುಗಲಿದೆ. ಮೇ 3 ರಂದು ಕನ್ನಡ/ಅರೇಬಿಕ್/ಲೆಕ್ಕಶಾಸ್ತ್ರ ಪರೀಕ್ಷೆಯೊಂದಿಗೆ ಆರಂಭವಾಗಿ ಮೇ 15 ರಂದು ಭಾಷಾ ವಿಷಯಗಳು ಹಾಗೂ ಎನ್.ಎಸ್.ಕ್ಯೂ.ಎಫ್ ವಿಷಯಗಳೊಂದಿಗೆ ಮುಕ್ತಾಯವಾಗಲಿದೆ.
2. ಎಸ್.ಎಸ್.ಎಲ್.ಸಿ ಪರೀಕ್ಷಾ ವೇಳಾಪಟ್ಟಿ (SSLC Time Table)
ಪರೀಕ್ಷೆ – 1: 2027ರ ಮಾರ್ಚ್ 22 ರಿಂದ ಏಪ್ರಿಲ್ 5 ರವರೆಗೆ ನಿಗದಿಪಡಿಸಲಾಗಿದೆ. ಮಾರ್ಚ್ 22 ರಂದು ಪ್ರಥಮ ಭಾಷೆ ಪರೀಕ್ಷೆ ನಡೆಯಲಿದ್ದು, ಮಾರ್ಚ್ 25 ರಂದು ವಿಜ್ಞಾನ, ಮಾರ್ಚ್ 27 ರಂದು ದ್ವಿತೀಯ ಭಾಷೆ (ಇಂಗ್ಲಿಷ್/ಕನ್ನಡ), ಮಾರ್ಚ್ 30 ರಂದು ಗಣಿತ/ಸಮಾಜಶಾಸ್ತ್ರ, ಏಪ್ರಿಲ್ 2 ರಂದು ತೃತೀಯ ಭಾಷೆ ಹಾಗೂ ಏಪ್ರಿಲ್ 5 ರಂದು ಸಮಾಜ ವಿಜ್ಞಾನ ಪರೀಕ್ಷೆಗಳು ನಡೆಯಲಿವೆ. (ಮಾರ್ಚ್ 26 ರಂದು ಗುಡ್ ಫ್ರೈಡೆ ಪ್ರಯುಕ್ತ ರಜೆ ಇರಲಿದೆ).
ಪರೀಕ್ಷೆ – 2: 2027ರ ಮೇ 24 ರಿಂದ ಮೇ 31 ರವರೆಗೆ ತಾತ್ಕಾಲಿಕವಾಗಿ ನಿಗದಿಯಾಗಿದೆ. ಮೇ 24 ರಂದು ಪ್ರಥಮ ಭಾಷೆ, ಮೇ 25 ರಂದು ವಿಜ್ಞಾನ, ಮೇ 26 ರಂದು ದ್ವಿತೀಯ ಭಾಷೆ, ಮೇ 27 ರಂದು ಗಣಿತ, ಮೇ 28 ರಂದು ತೃತೀಯ ಭಾಷೆ, ಮೇ 29 ರಂದು ಸಮಾಜ ವಿಜ್ಞಾನ ಹಾಗೂ ಮೇ 31 ರಂದು ಜೆ.ಟಿ.ಎಸ್ ವಿಷಯಗಳ ಪರೀಕ್ಷೆಗಳು ನಡೆಯಲಿವೆ.
ರಾಜ್ಯದ ಎಲ್ಲಾ ಪ್ರೌಢಶಾಲೆಗಳ ಮುಖ್ಯ ಶಿಕ್ಷಕರು ಹಾಗೂ ಪದವಿ ಪೂರ್ವ ಕಾಲೇಜುಗಳ ಪ್ರಾಂಶುಪಾಲರುಗಳು ತಮ್ಮ ಶಾಲಾ/ಕಾಲೇಜುಗಳ ಪ್ರಕಟಣಾ ಫಲಕದಲ್ಲಿ ಈ ವೇಳಾಪಟ್ಟಿಯನ್ನು ಕಡ್ಡಾಯವಾಗಿ ಪ್ರಕಟಿಸಿ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡುವಂತೆ ಮಂಡಲಿ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
