ಬೆಂಗಳೂರು:ದಿನವೂ ಶಾಲೆಯ ನಾಲ್ಕು ಗೋಡೆಗಳ ಮಧ್ಯೆ ಸಂವಿಧಾನ, ಶಾಸಕಾಂಗ, ಜನಪ್ರತಿನಿಧಿಗಳ ಬಗ್ಗೆ ಓದುತ್ತಿದ್ದ ಆ ಪುಟಾಣಿ ಕಣ್ಣುಗಳಿಗೆ ಇಂದು ಪ್ರಜಾಪ್ರಭುತ್ವದ ಜೀವಂತ ದರ್ಶನವಾಗಿತ್ತು. ಮಂಡ್ಯ ತಾಲೂಕಿನ ಕೊತ್ತತ್ತಿ ಗ್ರಾಮದ ಶ್ರೀ ವಿದ್ಯಾ ಗಣಪತಿ ಪ್ರೌಢಶಾಲೆಯ ವಿದ್ಯಾರ್ಥಿಗಳು ಇಂದು ವಿಧಾನಸೌಧದ ಭವ್ಯ ಕಟ್ಟಡದೊಳಗೆ ಹೆಜ್ಜೆಯಿಟ್ಟಾಗ ಅವರ ಮುಖದಲ್ಲಿ ಅಚ್ಚರಿ ಮತ್ತು ಕುತೂಹಲ ಎದ್ದು ಕಾಣುತ್ತಿತ್ತು.
ರಾಜ್ಯದ ಭವಿಷ್ಯವನ್ನು ನಿರ್ಧರಿಸುವ ವಾದ-ವಿವಾದಗಳು, ಜನಪ್ರತಿನಿಧಿಗಳ ಗಂಭೀರ ಚರ್ಚೆಗಳು ನಡೆಯುವ ವಿಧಾನಸಭೆಯ ಗ್ಯಾಲರಿಯಲ್ಲಿ ಕುಳಿತು ಕಲಾಪವನ್ನು ಕಣ್ಣಾರೆ ವೀಕ್ಷಿಸಿದ ಮಕ್ಕಳಿಗೆ, ತಾವೇನೋ ಹೊಸ ಲೋಕಕ್ಕೆ ಬಂದಂತ ಅನುಭವವಾಗಿತ್ತು.
ಸಚಿವರ ಕೊಠಡಿಯಲ್ಲಿ ತೆರೆದುಕೊಂಡ ಹೊಸ ಪಾಠ:
ಕಲಾಪ ವೀಕ್ಷಿಸಿದ ಬಳಿಕ ವಿದ್ಯಾರ್ಥಿಗಳ ದಂಡು ನೇರವಾಗಿ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯ ಸಚಿವರಾದ ಮಧು ಬಂಗಾರಪ್ಪ ಅವರ ಕಚೇರಿಗೆ ತಲುಪಿತು. ಅಲ್ಲಿ ಮಕ್ಕಳಿಗೆ ಕಾಯುತ್ತಿದ್ದುದು ಕೇವಲ ಔಪಚಾರಿಕ ಭೇಟಿಯಲ್ಲ, ಬದಲಾಗಿ ಒಂದು ಜೀವಂತ ತರಗತಿ! ಸಚಿವರು ಮಕ್ಕಳನ್ನು ಅತ್ಯಂತ ಆಪ್ತವಾಗಿ ಬರಮಾಡಿಕೊಂಡು, ಮುಕ್ತವಾಗಿ ಮಾತನಾಡಲು ಪ್ರೇರೇಪಿಸಿದರು.
ಸದನದ ಕಲಾಪವನ್ನು ತದೇಕಚಿತ್ತದಿಂದ ಗಮನಿಸಿದ್ದ ಮಕ್ಕಳು, ತಮಗಾದ ರೋಮಾಂಚನವನ್ನು ಹಂಚಿಕೊಳ್ಳುತ್ತಲೇ, “ಸರ್, ಅಲ್ಲಿ ಶಾಸಕರು ಅಷ್ಟೊಂದು ಜೋರಾಗಿ ಯಾಕೆ ಮಾತನಾಡುತ್ತಾರೆ?”, “ಪ್ರಶ್ನೋತ್ತರ ಅವಧಿ ಅಂದರೆ ಏನು?” ಎಂದು ಸಾಲು ಸಾಲು ಪ್ರಶ್ನೆಗಳನ್ನು ಕೇಳಲು ಶುರುಮಾಡಿದರು. ಮಕ್ಕಳ ಈ ಮುಗ್ಧ ಕೌತುಕಕ್ಕೆ ಸಚಿವರು ಅಷ್ಟೇ ತಾಳ್ಮೆಯಿಂದ ಉತ್ತರಿಸಿದರು.
ಸರಳವಾಗಿ ಮೂಡಿಬಂದ ಶಾಸಕಾಂಗದ ಚಿತ್ರಣ:
“ವಿಧಾನಸಭೆ ಮತ್ತು ವಿಧಾನ ಪರಿಷತ್ ಎನ್ನುವುದು ಕೇವಲ ಗದ್ದಲದ ಜಾಗವಲ್ಲ. ಅದು ಜನರ ಕಷ್ಟಗಳನ್ನು ಸರ್ಕಾರದ ಗಮನಕ್ಕೆ ತರುವ ಪವಿತ್ರ ವೇದಿಕೆ. ಶಾಸಕರು ತಮ್ಮ ಕ್ಷೇತ್ರದ ಜನರ ಧ್ವನಿಯಾಗಿ ಅಲ್ಲಿ ಮಾತನಾಡುತ್ತಾರೆ” ಎಂದು ಸಚಿವರು ಮಕ್ಕಳಿಗೆ ಸರಳವಾಗಿ ಮನವರಿಕೆ ಮಾಡಿಕೊಟ್ಟರು. ಶಾಸನಗಳು ಹೇಗೆ ರೂಪುಗೊಳ್ಳುತ್ತವೆ, ಪ್ರಜಾಪ್ರಭುತ್ವದ ಆಡಳಿತ ಚಕ್ರ ಹೇಗೆ ಉರುಳುತ್ತದೆ ಎಂಬುದನ್ನು ಕಥೆಯ ರೂಪದಲ್ಲಿ ಸಚಿವರು ವಿವರಿಸುತ್ತಿದ್ದಾಗ ಮಕ್ಕಳು ಮೌನವಾಗಿ ಆಲಿಸಿದರು.
ಪುಸ್ತಕದ ಜ್ಞಾನಕ್ಕೆ ಸಿಕ್ಕ ಪ್ರಾಯೋಗಿಕ ಸ್ಪರ್ಶ:
ಸಂವಾದದ ಕೊನೆಯಲ್ಲಿ ಮಾತನಾಡಿದ ಸಚಿವ ಮಧು ಬಂಗಾರಪ್ಪ, “ಮಕ್ಕಳಿಗೆ ಕೇವಲ ಪುಸ್ತಕದ ಬದನೆಕಾಯಿ ಪಾಠ ಸಾಕಾಗುವುದಿಲ್ಲ. ಇಂತಹ ಶೈಕ್ಷಣಿಕ ಪ್ರವಾಸಗಳು ಅವರಲ್ಲಿ ಸಂವಿಧಾನದ ಆಶಯಗಳನ್ನು ಮತ್ತು ಸಾರ್ವಜನಿಕ ಬದುಕಿನ ಜವಾಬ್ದಾರಿಯನ್ನು ಮೂಡಿಸುತ್ತವೆ. ಇಂದು ವಿಧಾನಸೌಧಕ್ಕೆ ಬಂದಿರುವ ಈ ಮಕ್ಕಳಲ್ಲೇ ನಾಳೆಯ ದಿನ ಒಬ್ಬ ಶಾಸಕನೋ, ಮಂತ್ರಿಯೋ ಅಥವಾ ದೇಶ ಮುನ್ನಡೆಸುವ ನಾಯಕನೋ ಇರಬಹುದು” ಎಂದು ಆಶಾವಾದ ವ್ಯಕ್ತಪಡಿಸಿದರು.
ವಿಧಾನಸೌಧದ ಮೆಟ್ಟಿಲಿಳಿದು ತಮ್ಮೂರಿಗೆ ಮರಳುವಾಗ ಮಕ್ಕಳ ಕೈಯಲ್ಲಿ ಕೇವಲ ಪ್ರವಾಸದ ನೆನಪುಗಳಿರಲಿಲ್ಲ, ಬದಲಾಗಿ ಪ್ರಜಾಪ್ರಭುತ್ವದ ಭದ್ರ ಬುನಾದಿಯ ಅರಿವಿತ್ತು.