ಕಾಂಗ್ರೆಸ್ ಸರ್ಕಾರದಲ್ಲಿ ಸಚಿವ ಸ್ಥಾನಕ್ಕೆ ಕೋಟಿ ಕೋಟಿ ಪೇಮೆಂಟ್‌ ಆರೋಪ; ಆರ್. ಅಶೋಕ್ ತೀವ್ರ ವಾಗ್ದಾಳಿ!

ಬೆಂಗಳೂರು: ರಾಜ್ಯ ಸರ್ಕಾರ ಹಾಗೂ ಸಚಿವರ ಕಾರ್ಯವೈಖರಿ ವಿರುದ್ಧ ಪ್ರತಿಪಕ್ಷ ನಾಯಕ ಆರ್. ಅಶೋಕ್ ಭ್ರಷ್ಟಾಚಾರ ಮತ್ತು ಕಾನೂನು ಸುವ್ಯವಸ್ಥೆ ಹದಗೆಟ್ಟಿರುವ ಕುರಿತು ಸಾಲು ಸಾಲು ಆರೋಪಗಳನ್ನು ಮಾಡುವ ಮೂಲಕ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ, ಈಗ ಸಂಪುಟಕ್ಕೆ ಬರಲಿರುವವರೆಲ್ಲರೂ “ಪೇಮೆಂಟ್ ಸಚಿವರು” ಎಂದು ಕರೆದಿದ್ದಾರೆ.

ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, “ಕಾಂಗ್ರೆಸ್‌ನಲ್ಲಿ ಒಂದು ಸಚಿವ ಸ್ಥಾನ ಪಡೆಯಬೇಕಾದರೆ ಹೈಕಮಾಂಡ್‌ಗೆ 100 ರಿಂದ 150 ಕೋಟಿ ರೂಪಾಯಿ ನೀಡಬೇಕಾದ ಅನಿವಾರ್ಯತೆ ಇದೆ. ನಾನೇ ಐದು ವರ್ಷ ಮುಖ್ಯಮಂತ್ರಿ ಎಂದು ಹೇಳುತ್ತಿದ್ದ ಸಿದ್ದರಾಮಯ್ಯ ಈಗ ಎಲ್ಲಿ ಹೋಗಿದ್ದಾರೆ? ರಾಜ್ಯದಲ್ಲಿ ರೈತರ ಪ್ರತಿಭಟನೆಗಳು ಹೀಗೆಯೇ ಮುಂದುವರಿದರೆ ರಾಜ್ಯಕ್ಕೆ ಮೂರನೇ ಸಿಎಂ ಬರುವ ದಿನಗಳು ದೂರವಿಲ್ಲ. ಸದ್ಯ ರಾಜ್ಯದಲ್ಲಿರುವುದು ಕೇವಲ ರಿಯಲ್ ಎಸ್ಟೇಟ್ ಸರ್ಕಾರ,” ಎಂದು ಗೇಲಿ ಮಾಡಿದರು.

ಜೈಲಿನಿಂದ ಕೈದಿಗಳ ಪಲಾಯನ: ಗ್ಯಾರಂಟಿ ಸ್ಕೀಂ ವ್ಯಂಗ್ಯ

ಸಚಿವ ಪ್ರಿಯಾಂಕ್ ಖರ್ಗೆ ಅವರ ತವರು ಜಿಲ್ಲೆಯಲ್ಲೇ ಕೈದಿಗಳು ಜೈಲಿನಿಂದ ತಪ್ಪಿಸಿಕೊಂಡು ಹೋಗಿರುವ ಘಟನೆಯನ್ನು ಪ್ರಸ್ತಾಪಿಸಿದ ಅವರು, “ಪ್ರಿಯಾಂಕ್ ಖರ್ಗೆ ಗೃಹಸಚಿವರಾದ ಮೇಲೆ ಕೈದಿಗಳು ಸೆರೆಮನೆಯಿಂದ ಯಾವಾಗ ಬೇಕಾದರೂ ಹೊರಹೋಗಬಹುದು, ಯಾವಾಗ ಬೇಕಾದರೂ ಒಳಬರಬಹುದು ಎಂಬ ಹೊಸ ಗ್ಯಾರಂಟಿ ಸ್ಕೀಂ ಜಾರಿಗೆ ಬಂದಂತಿದೆ,” ಎಂದು ತರಾಟೆಗೆ ತೆಗೆದುಕೊಂಡರು. ಇದೇ ವೇಳೆ ಡಿಸಿಎಂ ಡಾ. ಜಿ. ಪರಮೇಶ್ವರ್ ಅವರ ಅವಧಿಯಲ್ಲಿ ಇಡೀ ರಾಜ್ಯದಲ್ಲಿ ಡ್ರಗ್ಸ್ ಜಾಲ ವ್ಯಾಪಕವಾಗಿ ಹರಡಿದೆ ಎಂದು ದೂರಿದರು.

ಕಮಿಷನ್ ದಂಧೆ 80 ಶೇಕಡಾಕ್ಕೆ ಏರಿಕೆ!

ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ವಿರುದ್ಧವೂ ವಾಗ್ದಾಳಿ ನಡೆಸಿದ ಅಶೋಕ್, “ಅವರು ಅಧಿಕಾರಕ್ಕೆ ಬಂದ ನಂತರ ರಾಜ್ಯದಲ್ಲಿ ಕಮಿಷನ್ ಪ್ರಮಾಣ ಶೇಕಡಾ 60 ರಿಂದ 80 ರವರೆಗೆ ತಲುಪಿದೆ. ಹೊಸ ಸರ್ಕಾರ ಬಂದಿರುವ ಯಾವುದೇ ಸಕಾರಾತ್ಮಕ ಬದಲಾವಣೆಗಳು ಅಥವಾ ಕುರುಹುಗಳು ಜನರಿಗೆ ಕಾಣಿಸುತ್ತಿಲ್ಲ,” ಎಂದರು.

ಕೆಪಿಎಸ್‌ಸಿ ಅಕ್ರಮದ ಹೋರಾಟಕ್ಕೆ ಸಂದ ಜಯ

ಕೆಪಿಎಸ್‌ಸಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್ ಅವರನ್ನು ಅಮಾನತು ಮಾಡಲು ರಾಜ್ಯಪಾಲರು ಕೈಗೊಂಡಿರುವ ಕ್ರಮವನ್ನು ಅಶೋಕ್ ಸ್ವಾಗತಿಸಿದ್ದಾರೆ. “ಕೆಪಿಎಸ್‌ಸಿ ಸಂಸ್ಥೆಯಲ್ಲಿ ನಡೆಯುತ್ತಿರುವ ಭ್ರಷ್ಟಾಚಾರ ಹಾಗೂ ಅಕ್ರಮಗಳ ಕುರಿತು ನಾನು ವಿಧಾನಸಭೆಯಲ್ಲಿ ಧ್ವನಿ ಎತ್ತಿದಾಗ ಮಾಜಿ ಸಿಎಂ ಸಿದ್ದರಾಮಯ್ಯ ಕೂಡ ನನ್ನ ವಾದವನ್ನು ಒಪ್ಪಿಕೊಂಡಿದ್ದರು. ಈಗ ರಾಜ್ಯಪಾಲರ ನಡಕೆಯಿಂದಾಗಿ ನನ್ನ ನಿರಂತರ ಹೋರಾಟಕ್ಕೆ ನ್ಯಾಯ ಸಿಕ್ಕಂತಾಗಿದೆ,” ಎಂದು ಅವರು ತೃಪ್ತಿ ವ್ಯಕ್ತಪಡಿಸಿದರು.

ಕಾಂಗ್ರೆಸ್ ಕಾರ್ಯಕರ್ತರಿಗೆ ಜನರ ತೆರಿಗೆ ಹಣದಲ್ಲಿ ‘ಗಂಜಿ ಕೇಂದ್ರ’: 

ರಾಜ್ಯದಲ್ಲಿ ಒಂದೆಡೆ ವೃದ್ಧರು, ರೈತರು ಹಾಗೂ ವಿಧವೆಯರ ಪಿಂಚಣಿ ಸೌಲಭ್ಯಗಳಿಗೆ ಹಣವಿಲ್ಲ ಎಂದು ತಡೆಹಿಡಿದಿರುವ ಕಾಂಗ್ರೆಸ್ ಸರ್ಕಾರ, ತನ್ನ ಪಕ್ಷದ ಕಾರ್ಯಕರ್ತರ ಪುನರ್ವಸತಿಗಾಗಿ ತೆರಿಗೆದಾರರ ಕೋಟ್ಯಂತರ ರೂಪಾಯಿ ಹಣವನ್ನು ನೀರಂತೆ ಪೋಲು ಮಾಡುತ್ತಿದೆ ಎಂದು ಗಂಭೀರ ಆರೋಪ ಮಾಡಿದರು.

ಗ್ಯಾರಂಟಿ ಹಣ ಬಾಕಿ: ರಾಜ್ಯದ ಜನರಿಗೆ ತಲುಪಬೇಕಾದ ‘ಗೃಹಲಕ್ಷ್ಮಿ’ ಯೋಜನೆಯ 5,000 ಕೋಟಿ ರೂ. ಹಾಗೂ ‘ಅನ್ನಭಾಗ್ಯ’ ಯೋಜನೆಯ 750 ಕೋಟಿ ರೂ. ಹಣವನ್ನು ಸರ್ಕಾರ ಇನ್ನೂ ಪಾವತಿಸಿಲ್ಲ. ಬೆಳಗಾವಿ ಅಧಿವೇಶನದಲ್ಲಿ ಆಗಿನ ಸಚಿವೆ ಲಕ್ಷ್ಮಿ ಹೆಬ್ಬಾಳಕರ್ ಅವರೇ ಕಣ್ಣೀರು ಹಾಕಿ ಈ ಸತ್ಯವನ್ನು ಒಪ್ಪಿಕೊಂಡಿದ್ದರೂ, ಫಲಾನುಭವಿಗಳಿಗೆ ಮಾತ್ರ ಇನ್ನೂ ಹಣ ಸಿಕ್ಕಿಲ್ಲ ಎಂದು ಅಶೋಕ್ ನೆನಪಿಸಿದರು.

ಅಧ್ಯಕ್ಷರಿಗೆ ಸಕಲ ವೈಭವ: ಗ್ಯಾರಂಟಿ ಅನುಷ್ಠಾನ ಸಮಿತಿಯ ಅಧ್ಯಕ್ಷ ಎಚ್.ಎಂ. ರೇವಣ್ಣ ಅವರಿಗೆ 58 ಲಕ್ಷ ರೂ. ವಸತಿ ಭತ್ಯೆ ಸೇರಿದಂತೆ ವೇತನ, ಸವಲತ್ತುಗಳು ಹಾಗೂ 12 ಜನ ಸಿಬ್ಬಂದಿಯನ್ನು ನೀಡಲಾಗಿದೆ. ಇವೆಲ್ಲದರ ಒಟ್ಟು ವೆಚ್ಚವೇ ಸುಮಾರು 2 ಕೋಟಿ ರೂ. ದಾಟುತ್ತದೆ.

ಪ್ರತಿಪಕ್ಷ ನಾಯಕನಿಗಿಲ್ಲ ಮನೆ: “ವಿಧಾನಸಭೆಯ ಪ್ರತಿಪಕ್ಷ ನಾಯಕನಾದ ನನಗೇ ಸರ್ಕಾರ ಇದುವರೆಗೆ ಅಧಿಕೃತ ನಿವಾಸ ನೀಡಿಲ್ಲ. ಆದರೆ ಗ್ಯಾರಂಟಿ ಸಮಿತಿಯ ಅಧ್ಯಕ್ಷರಿಗೆ ಸರ್ಕಾರಿ ಬಂಗಲೆ ನೀಡಿ, ಅದರ ನವೀಕರಣಕ್ಕೆ 58 ಲಕ್ಷ ರೂ. ಸಾರ್ವಜನಿಕ ಹಣವನ್ನು ಪೋಲು ಮಾಡಲಾಗಿದೆ” ಎಂದು ಅಶೋಕ್ ತಾರತಮ್ಯವನ್ನು ಬಿಚ್ಚಿಟ್ಟರು.

ತಿಂಗಳಿಗೆ 150 ಕೋಟಿ ಹೊರೆ: ಜಿಲ್ಲಾ ಮತ್ತು ತಾಲ್ಲೂಕು ಮಟ್ಟದ ಗ್ಯಾರಂಟಿ ಸಮಿತಿ ಅಧ್ಯಕ್ಷರಿಗೆ ಮಾಸಿಕ ವೇತನ, ಸದಸ್ಯರಿಗೆ ಭತ್ಯೆ ಹಾಗೂ ಕಚೇರಿ ವೆಚ್ಚಗಳ ಹೆಸರಿನಲ್ಲಿ ಪ್ರತಿ ತಿಂಗಳು ರಾಜ್ಯದ ಖಜಾನೆಗೆ 150 ಕೋಟಿ ರೂಪಾಯಿಗೂ ಅಧಿಕ ಹೊರೆ ಬೀಳುತ್ತಿದೆ ಎಂದು ಅವರು ಲೆಕ್ಕ ನೀಡಿದರು.

‘ಭಾರತ್ ಜೋಡೋ’ ಸಂಘಗಳ ಹೆಸರಲ್ಲಿ 1,010 ಕೋಟಿ ರೂ. ದುರ್ಬಳಕೆ?

ರಾಹುಲ್ ಗಾಂಧಿ ಅವರು ಕಾಂಗ್ರೆಸ್ ಬ್ಯಾನರ್ ಅಡಿಯಲ್ಲಿ ಹಮ್ಮಿಕೊಂಡಿದ್ದ ‘ಭಾರತ್ ಜೋಡೋ’ ಕಾರ್ಯಕ್ರಮದ ಹೆಸರನ್ನೇ ಬಳಸಿಕೊಂಡು ಈಗ ಹೊಸ ಸಂಘಗಳನ್ನು ರಚಿಸಲಾಗುತ್ತಿದೆ. ಕಾಂಗ್ರೆಸ್ ಪಕ್ಷದ ನಿರುದ್ಯೋಗಿ ಕಾರ್ಯಕರ್ತರಿಗೆ ಉದ್ಯೋಗ ನೀಡುವ ನೆಪದಲ್ಲಿ ಈ ಸಂಘಗಳ ಪ್ರತಿ ತರಬೇತುದಾರರಿಗೆ ಮಾಸಿಕ 24,000 ರೂ. ಸಂಬಳ ನಿಗದಿಪಡಿಸಲಾಗಿದೆ ಎಂದು ಅವರು ಬಹಿರಂಗಪಡಿಸಿದರು.

ಈ ಇಡೀ ಯೋಜನೆಗೆ ಬರೋಬ್ಬರಿ 1,010 ಕೋಟಿ ರೂ. ಸಾರ್ವಜನಿಕ ವೆಚ್ಚ ಮಾಡಲಾಗುತ್ತಿದ್ದು, ಇದು ತೆರಿಗೆ ಪಾವತಿಸುವ ಕನ್ನಡಿಗರ ಬೆವರಿನ ಹಣಕ್ಕೆ ಮಾಡುತ್ತಿರುವ ದ್ರೋಹ ಮತ್ತು ಸಂಪೂರ್ಣ ದುರ್ಬಳಕೆ ಎಂದು ಆರ್. ಅಶೋಕ್ ಕಟುವಾಗಿ ಟೀಕಿಸಿದರು.

ಬಡವರ ಪಿಂಚಣಿಗೆ ಹಣವಿಲ್ಲ, ಕಾಂಗ್ರೆಸ್ ಪುಢಾರಿಗಳ ಲೂಟಿಗೆ ಕೋಟಿ ಕೋಟಿ: 

ರಾಜ್ಯದ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು (PHC) ಇಂದು ಔಷಧಿ ಮತ್ತು ಅಗತ್ಯ ಸಿಬ್ಬಂದಿಗಳಿಲ್ಲದೆ ಸೊರಗುತ್ತಿವೆ. ಹೆರಿಗೆ ಮತ್ತು ಆರೋಗ್ಯ ಸೇವೆಗಳು ಸಿಗದೆ ಕರ್ನಾಟಕ ಇಂದು ಬಾಣಂತಿಯರಿಗೆ ಸುರಕ್ಷಿತವಲ್ಲದ ರಾಜ್ಯವಾಗಿ ಮಾರ್ಪಟ್ಟಿದೆ. ಹೀಗಿದ್ದರೂ ಸಾರ್ವಜನಿಕ ಆರೋಗ್ಯ ಸುಧಾರಣೆಗೆ ಬಳಸಬೇಕಾದ ನೂರಾರು ಕೋಟಿ ರೂಪಾಯಿ ಹಣವನ್ನು ಕಾಂಗ್ರೆಸ್ ತನ್ನ ಕಾರ್ಯಕರ್ತರ ಪುನರ್ವಸತಿಗಾಗಿ ದುರುಪಯೋಗಪಡಿಸಿಕೊಳ್ಳುತ್ತಿದೆ ಎಂದು ಪ್ರತಿಪಕ್ಷ ನಾಯಕ ಆರ್. ಅಶೋಕ್ ಕಟುವಾಗಿ ಟೀಕಿಸಿದರು.

ಪಿಂಚಣಿ ಸ್ಥಗಿತ: ವೃದ್ಧರು, ಆಸಿಡ್ ದಾಳಿಗೆ ಒಳಗಾದವರು ಹಾಗೂ ಅಶಕ್ತರಿಗೆ ಕಳೆದ ಮೂರು ತಿಂಗಳಿಂದ ಪಿಂಚಣಿ ಹಣ ಬಿಡುಗಡೆಯಾಗಿಲ್ಲ. ಧರಣಿ ನಡೆಸುತ್ತಿರುವ ಆಶಾ ಕಾರ್ಯಕರ್ತೆಯರ ಗೌರವಧನವನ್ನು ಸರ್ಕಾರ ಹೆಚ್ಚಿಸಿಲ್ಲ.

ಅನಾಥ ಮಕ್ಕಳ ಹಣ ಬಾಕಿ: ರಾಜ್ಯದ ಅನಾಥ ಮಕ್ಕಳಿಗೆ ನೀಡಬೇಕಾದ 8 ತಿಂಗಳ ಬಾಕಿ ಮೊತ್ತವಾದ ಬರೋಬ್ಬರಿ 78 ಕೋಟಿ ರೂ. ಹಣವನ್ನು ಸರ್ಕಾರ ತಡೆಹಿಡಿದಿದೆ.

ಕ್ರೀಡಾ ಇಲಾಖೆಯಲ್ಲೂ ಸಮಿತಿ ದಂಧೆ: ಈಗಾಗಲೇ ಪ್ರತಿ ತಾಲೂಕಿನಲ್ಲೂ ಕ್ರೀಡಾ ಇಲಾಖೆಯ ಅಧಿಕೃತ ಕಚೇರಿಗಳಿದ್ದರೂ, ಕಾಂಗ್ರೆಸ್ ಕಾರ್ಯಕರ್ತರನ್ನು ತೃಪ್ತಿಪಡಿಸಲು ಹೊಸದಾಗಿ ಸಮಾಂತರ ಸಮಿತಿಗಳನ್ನು ರಚಿಸಿ ನೇಮಕಾತಿ ಮಾಡಲಾಗುತ್ತಿದೆ. ಯುವ ಸಬಲೀಕರಣ ಇಲಾಖೆಯ ಈ ಹಣವನ್ನು ಗ್ರಾಮೀಣ ಭಾಗದ ಕ್ರೀಡಾಂಗಣಗಳ ಅಭಿವೃದ್ಧಿಗೆ ಬಳಸಬಹುದಿತ್ತು ಎಂದು ಅಶೋಕ್ ಬೇಸರ ವ್ಯಕ್ತಪಡಿಸಿದರು.

ಅತೃಪ್ತರ ಪುನರ್ವಸತಿ ಕೇಂದ್ರ: ಇನ್ನು ಒಂದೂವರೆ ವರ್ಷದಲ್ಲಿ ಚುನಾವಣೆ ಇರುವುದರಿಂದ, ಪಕ್ಷದ ಅತೃಪ್ತ ನಾಯಕರು ಮತ್ತು ನಿರುದ್ಯೋಗಿ ಪುಢಾರಿಗಳಿಗಾಗಿ ‘ಭಾರತ್ ಜೋಡೋ’ ಹೆಸರಿನಲ್ಲಿ ಇಂತಹ ರಾಜಕೀಯ ಗಂಜಿ ಕೇಂದ್ರಗಳನ್ನು ತೆರೆಯಲಾಗಿದೆ ಎಂದು ಅವರು ಲೇವಡಿ ಮಾಡಿದರು.

ಒಣಗುತ್ತಿರುವ ಬೆಳೆ: ರೈತರಿಗಿಲ್ಲ ಪರಿಹಾರ, ಹಣ ಎಲ್ಲಿ ಹೋಯಿತು?

ರಾಜ್ಯದಲ್ಲಿ ನೀರಿಲ್ಲದೆ ರೈತರ ಬೆಳೆಗಳು ಕಣ್ಣೆದುರೇ ಒಣಗಿ ನಾಶವಾಗುತ್ತಿದ್ದರೂ ಸರ್ಕಾರ ಯಾವುದೇ ಬೆಳೆ ಹಾನಿ ಪರಿಹಾರ ನೀಡಿಲ್ಲ ಎಂದು ಅಶೋಕ್ ಆರೋಪಿಸಿದರು.

ಕೇಂದ್ರ ಸರ್ಕಾರದಿಂದ ಎನ್‌ಡಿಆರ್‌ಎಫ್ (NDRF) ಹಣ ಬರಬೇಕೆಂದು ಸದಾ ಸಬೂಬು ಹೇಳುವ ರಾಜ್ಯ ಸರ್ಕಾರ, ಈಗಾಗಲೇ ತನ್ನ ಕೈಯಲ್ಲಿದ್ದ ಎಸ್‌ಡಿಆರ್‌ಎಫ್ (SDRF) ನಿಧಿಯ ಹಣವನ್ನು ಏನು ಮಾಡಿದೆ ಎಂದು ಬಹಿರಂಗಪಡಿಸಬೇಕು. ಈ ಹಣವನ್ನು ಕೂಡ ಕಾಂಗ್ರೆಸ್ ತನ್ನ ಕಾರ್ಯಕರ್ತರ ಕಾರ್ಯಕ್ರಮಗಳಿಗೆ ಅನಧಿಕೃತವಾಗಿ ಖರ್ಚು ಮಾಡುತ್ತಿದೆಯೇ ಎಂಬ ಬಲವಾದ ಅನುಮಾನ ಮೂಡುತ್ತಿದೆ ಎಂದರು. ತಕ್ಷಣವೇ ಜಿಲ್ಲಾಧಿಕಾರಿಗಳನ್ನು ಒಣಗುತ್ತಿರುವ ಬೆಳೆ ಪ್ರದೇಶಗಳಿಗೆ ಕಳುಹಿಸಿ ರೈತರಿಗೆ ತಾತ್ಕಾಲಿಕ ಪರಿಹಾರ ಒದಗಿಸಬೇಕು ಮತ್ತು ಬಡವರ ಯೋಜನೆಗಳನ್ನು ತಕ್ಷಣವೇ ಮರು ಆರಂಭಿಸಬೇಕು ಎಂದು ಆರ್. ಅಶೋಕ್ ಒತ್ತಾಯಿಸಿದ್ದಾರೆ.