ಬೆಂಗಳೂರಿನ ನೀರಿನ ಭದ್ರತೆಗೆ ತ್ಯಾಜ್ಯನೀರು ಸಂಸ್ಕರಣೆಯೇ ಅಸ್ತ್ರ: ಜಲಮಂಡಳಿ ಆಶಯ

ಬೆಂಗಳೂರು: ಸಿಲಿಕಾನ್ ಸಿಟಿಯ ಭವಿಷ್ಯದ ನೀರಿನ ಬೇಡಿಕೆಯನ್ನು ಸರಿದೂಗಿಸಲು ಸಂಸ್ಕರಿಸಿದ ನೀರು (Treated Water) ಅತ್ಯಂತ ಪ್ರಬಲ ಅಸ್ತ್ರವಾಗಿ ಹೊರಹೊಮ್ಮುತ್ತಿದೆ ಎಂದು ಬೆಂಗಳೂರು ಜಲಮಂಡಳಿ (BWSSB) ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ. ನಗರದ ಶೇ. 90ರಷ್ಟು ತ್ಯಾಜ್ಯನೀರನ್ನು ಮರುಬಳಕೆ ಮಾಡುವ ಮೂಲಕ ಬೆಂಗಳೂರನ್ನು ನೀರಿನ ವಿಷಯದಲ್ಲಿ ಸ್ವಾವಲಂಬಿಯನ್ನಾಗಿ ಮಾಡಲು ಮಂಡಳಿ ಸಜ್ಜಾಗಿದೆ.

ಈ ಕುರಿತು ಮಾತನಾಡಿದ ಜಲಮಂಡಳಿ ಅಧ್ಯಕ್ಷರಾದ ಡಾ. ವಿ. ರಾಮ್ ಪ್ರಸಾತ್ ಮನೋಹರ್, “ನಾವು ತ್ಯಾಜ್ಯನೀರನ್ನು ಕೇವಲ ಹೊಲಸು ಎಂದು ನೋಡುವ ಕಾಲ ಮುಗಿದಿದೆ. ಇಂದು ಇದು ನಗರದ ಆರ್ಥಿಕತೆ ಮತ್ತು ಪರಿಸರಕ್ಕೆ ಪೂರಕವಾದ ಅಮೂಲ್ಯ ಸಂಪನ್ಮೂಲ. ಪ್ರತಿದಿನ 1,348 ದಶಲಕ್ಷ ಲೀಟರ್‌ಗಳಷ್ಟು ನೀರನ್ನು ಸಂಸ್ಕರಿಸುವ ಮೂಲಕ ನಾವು ಅಂತರ್ಜಲದ ಮೇಲಿನ ಒತ್ತಡವನ್ನು ಕಡಿಮೆ ಮಾಡುತ್ತಿದ್ದೇವೆ,” ಎಂದು ತಿಳಿಸಿದರು.

ಕೈಗಾರಿಕೆಗಳಿಗೆ ಆದ್ಯತೆ:

“ಪೀಣ್ಯ ಮತ್ತು ದೇವನಹಳ್ಳಿಯಂತಹ ಕೈಗಾರಿಕಾ ಪ್ರದೇಶಗಳಲ್ಲಿ ಉತ್ಪಾದನಾ ಚಟುವಟಿಕೆಗಳಿಗೆ ಕುಡಿಯುವ ನೀರಿನ ಬದಲಿಗೆ ಸಂಸ್ಕರಿಸಿದ ನೀರನ್ನೇ ಬಳಸಲಾಗುತ್ತಿದೆ. ವಿಪ್ರೋದಂತಹ ಐಟಿ ಕಂಪನಿಗಳಿಗೆ ಶೂನ್ಯ-ಬ್ಯಾಕ್ಟೀರಿಯಾ ಗುಣಮಟ್ಟದ ನೀರನ್ನು ಒದಗಿಸುತ್ತಿರುವುದು ನಮ್ಮ ತಾಂತ್ರಿಕ ಸಾಮರ್ಥ್ಯಕ್ಕೆ ಸಾಕ್ಷಿ,” ಎಂದು ಮಂಡಳಿಯ ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಕೆರೆಗಳ ಮರುಜೀವ ಮತ್ತು ಆದಾಯ:

ನಗರದ 25ಕ್ಕೂ ಹೆಚ್ಚು ಕೆರೆಗಳನ್ನು ಈ ನೀರಿನಿಂದ ತುಂಬಿಸುವ ಮೂಲಕ ಅಂತರ್ಜಲ ಮಟ್ಟವನ್ನು ಹೆಚ್ಚಿಸಲಾಗುತ್ತಿದೆ. ಇದು ಪರಿಸರ ವ್ಯವಸ್ಥೆಗೆ ಹೊಸ ಚೈತನ್ಯ ನೀಡಿದೆ. ವಿಶೇಷವೆಂದರೆ, ಈ ಮರುಬಳಕೆಯ ಯೋಜನೆಯಿಂದ ಜಲಮಂಡಳಿಗೆ ವಾರ್ಷಿಕವಾಗಿ ₹40 ಕೋಟಿಗೂ ಅಧಿಕ ಆದಾಯ ಹರಿದು ಬರುತ್ತಿದ್ದು, ಇದನ್ನು ನಗರದ ಇತರ ಜಲ ಸಂರಕ್ಷಣಾ ಯೋಜನೆಗಳಿಗೆ ಮರುಹೂಡಿಕೆ ಮಾಡಲಾಗುತ್ತಿದೆ.

ಜಾಗತಿಕ ಮಾದರಿ:

ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ಮಾರ್ಗದರ್ಶನದಲ್ಲಿ ಜಾರಿಯಾಗುತ್ತಿರುವ ಈ ‘ಸರ್ಕ್ಯುಲರ್ ವಾಟರ್ ಸಿಸ್ಟಮ್’, ಏಷ್ಯಾದಲ್ಲೇ ಅತ್ಯಂತ ಸುಸ್ಥಿರ ಮಾದರಿಯಾಗಿ ಗುರುತಿಸಿಕೊಂಡಿದೆ. “ಪ್ರತಿ ಹನಿ ಮರುಬಳಕೆ” ಎಂಬ ಧ್ಯೇಯವಾಕ್ಯದೊಂದಿಗೆ ಬೆಂಗಳೂರು ಈಗ ಜಾಗತಿಕ ಮಟ್ಟದಲ್ಲಿ ಜಲ ನಿರ್ವಹಣೆಯ ಪಾಠಗಳನ್ನು ಕಲಿಸುತ್ತಿದೆ ಎಂದು ಅಧಿಕಾರಿಗಳು ಹೆಮ್ಮೆಯಿಂದ ಹೇಳಿದ್ದಾರೆ.