ಮೈಸೂರು:ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಪ್ರಮುಖ ಆಕರ್ಷಣೆಯಾದ ಜಂಬೂಸವಾರಿಯಲ್ಲಿ ಈ ಬಾರಿ ಭಾರಿ ಬದಲಾವಣೆಯಾಗಿದೆ. ಕಳೆದ ಆರು ವರ್ಷಗಳಿಂದ ಯಶಸ್ವಿಯಾಗಿ 750 ಕೆಜಿ ತೂಕದ ಚಿನ್ನದ ಅಂಬಾರಿಯನ್ನು ಬೆನ್ನಿನ ಮೇಲೆ ಹೊತ್ತು ಕೋಟ್ಯಂತರ ಜನರ ಮನಗೆದ್ದಿದ್ದ ಗಜಪಡೆಯ ದಕ್ಷ ನಾಯಕ, ಕ್ಯಾಪ್ಟನ್ ಅಭಿಮನ್ಯುವನ್ನು ಈ ಬಾರಿ ಅಂಬಾರಿ ಹೊರುವ ಜವಾಬ್ದಾರಿಯಿಂದ ಮುಕ್ತಗೊಳಿಸಲಾಗಿದೆ.
ಅರಣ್ಯ ಇಲಾಖೆ ಸಿದ್ಧಪಡಿಸಿರುವ ಪ್ರಸಕ್ತ ಸಾಲಿನ ದಸರಾ ಗಜಪಡೆಯ ಅಂತಿಮ ಪಟ್ಟಿಯಲ್ಲಿ ಅಭಿಮನ್ಯು ಹೆಸರಿಲ್ಲದಿರುವುದು ದಸರಾ ಇತಿಹಾಸದಲ್ಲೇ ಮಹತ್ವದ ತಿರುವಿಗೆ ಕಾರಣವಾಗಿದೆ.
ವಯಸ್ಸಿನ ನಿಯಮವೇ ಅಡ್ಡಿ:
ಕಾಡು ಆನೆಗಳನ್ನು ಸೆರೆಹಿಡಿಯುವ ಕಾರ್ಯಾಚರಣೆ ಹಾಗೂ ಜಂಬೂಸವಾರಿಯನ್ನು ಅತ್ಯಂತ ಶಾಂತಚಿತ್ತದಿಂದ ನಿಭಾಯಿಸುತ್ತಿದ್ದ ಅಭಿಮನ್ಯುವನ್ನು ಕೈಬಿಟ್ಟಿರುವುದರ ಹಿಂದೆ ವಯಸ್ಸಿನ ನಿಯಮಗಳಿವೆ. ಕ್ಯಾಪ್ಟನ್ ಅಭಿಮನ್ಯುಗೆ ಪ್ರಸ್ತುತ 60 ವರ್ಷ ತುಂಬಿರುವುದರಿಂದ, ಸುಪ್ರೀಂ ಕೋರ್ಟ್ನ ಕಟ್ಟುನಿಟ್ಟಿನ ಮಾರ್ಗಸೂಚಿಗಳ ಅನ್ವಯ 60 ವರ್ಷ ಮೇಲ್ಪಟ್ಟ ಆನೆಗಳಿಗೆ ಅಂಬಾರಿ ಹೊರುವಂತಹ ಭಾರದ ಕೆಲಸಗಳನ್ನು ನೀಡುವಂತಿಲ್ಲ. ಈ ಹಿನ್ನೆಲೆಯಲ್ಲಿ ಅರಣ್ಯ ಇಲಾಖೆಯು ಅನಿವಾರ್ಯವಾಗಿ ಅಭಿಮನ್ಯುಗೆ ಈ ಬಾರಿ ಅಂಬಾರಿ ಸೇವೆಯಿಂದ ವಿಶ್ರಾಂತಿ ನೀಡಿದೆ. ಇದರೊಂದಿಗೆ ಭೀಮ ಆನೆ ಕೂಡ ಮದದ (Musth) ಸಮಸ್ಯೆಯಿಂದಾಗಿ ಈ ಬಾರಿ ಗಜಪಡೆಯಿಂದ ಹೊರಗುಳಿದಿದೆ.
ಅಂಬಾರಿ ಹೊರಲಿರುವ ನೂತನ ಉತ್ತರಾಧಿಕಾರಿ ಯಾರು?:
ಅಭಿಮನ್ಯುವಿನ ನಿವೃತ್ತಿಯ ಬೆನ್ನಲ್ಲೇ ಈ ಬಾರಿ ತಾಯಿ ಚಾಮುಂಡೇಶ್ವರಿಯ ಚಿನ್ನದ ಅಂಬಾರಿಯನ್ನು ಹೊರುವ ಹೊಸ ನಾಯಕ ಯಾರು ಎಂಬ ಭಾರಿ ಕುತೂಹಲ ಸೃಷ್ಟಿಯಾಗಿದೆ. ಸದ್ಯಕ್ಕೆ ಗಜಪಡೆಯ ಪಟ್ಟಿಯಲ್ಲಿರುವ ಧನಂಜಯ, ಮಹೇಂದ್ರ, ಪ್ರಶಾಂತ್, ಶ್ರೀರಾಮ ಮತ್ತು ಸುಗ್ರೀವ ಆನೆಗಳು ಈ ಜವಾಬ್ದಾರಿಯನ್ನು ಹೊರುವ ರೇಸ್ನಲ್ಲಿ ಮುಂಚೂಣಿಯಲ್ಲಿದ್ದಾರೆ. ಅರಮನೆ ಆವರಣದಲ್ಲಿ ತಾಲೀಮು ಆರಂಭವಾದ ಬಳಿಕ ಆನೆಗಳ ಸಾಮರ್ಥ್ಯ, ಭಾರ ಹೊರುವ ಶಕ್ತಿ ಮತ್ತು ಗದ್ದಲದ ನಡುವೆ ಶಾಂತವಾಗಿರುವ ನಡವಳಿಕೆಯನ್ನು ಕೂಲಂಕಷವಾಗಿ ಪರಿಶೀಲಿಸಿ, ನೂತನ ಅಂಬಾರಿ ಆನೆಯನ್ನು ಅಂತಿಮಗೊಳಿಸಲಾಗುವುದು ಎಂದು ಅರಣ್ಯ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ಆಗಸ್ಟ್ 26ರಂದು ನಾಗರಹೊಳೆಯಿಂದ ಗಜಪಯಣ ಅಧಿಕೃತವಾಗಿ ಆರಂಭವಾಗಲಿದ್ದು, ಅಭಿಮನ್ಯು ಇಲ್ಲದ ಈ ಬಾರಿಯ ದಸರಾ ಮಹೋತ್ಸವ ಹೊಸ ನಾಯಕನ ನೇತೃತ್ವದಲ್ಲಿ ಮುನ್ನಡೆಯಲಿದೆ.