ಪದವೀಧರ, ಶಿಕ್ಷಕರ ಕ್ಷೇತ್ರಗಳ  ಮತದಾರರ ಕರಡು ಮತದಾರರ  ಪಟ್ಟಿ ಪ್ರಕಟ

ಬೆಂಗಳೂರು ನಗರ ಜಿಲ್ಲೆ:   ಕರ್ನಾಟಕ ಪಶ್ಚಿಮ ಮತ್ತು ಆಗ್ನೇಯ ಪದವೀಧರ ಕ್ಷೇತ್ರಗಳು ಮತ್ತು ಕರ್ನಾಟಕ ಈಶಾನ್ಯ ಮತ್ತು ಬೆಂಗಳೂರು ಶಿಕ್ಷಕರ ಕ್ಷೇತ್ರಗಳ  ಮತದಾರರ ಕರಡು ಮತದಾರರ  ಪಟ್ಟಿಯನ್ನು  ಪ್ರಕಟಿಸಲಾಗಿದೆ  ಎಂದು ಕರ್ನಾಟಕ, ಮುಖ್ಯ  ಚುನಾವಣಾಧಿಕಾರಿ ಕಛೇರಿಯ  ಜಂಟಿ ಮುಖ್ಯ ಚುನಾವಣಾಧಿಕಾರಿಗಳಾದ (ಮತದಾರರ ಪಟ್ಟಿ) ಯೋಗೇಶ್ವರ ಎಸ್ ಅವರು  ತಿಳಿಸಿದ್ದಾರೆ.

ಭಾರತ ಚುನಾವಣಾ ಆಯೋಗವು ವೇಳಾ ಪಟ್ಟಿಯಂತೆ ದಿನಾಂಕ 30.09.2025 ರಂದು ಸಾರ್ವಜನಿಕ ಪ್ರಕಟಣೆ ಹೊರಡಿಸಲಾಗಿದ್ದು, ನಮೂನೆ 18 ಅಥವಾ 19 ರಲ್ಲಿ ಅರ್ಜಿಗಳನ್ನು ಸ್ವೀಕರಿಸುವ ಕೊನೆಯ ದಿನಾಂಕ  06.11.2025 ವಾಗಿದ್ದು. ಮತದಾರರ ಕರಡು ಪಟ್ಟಿಯನ್ನು  ದಿನಾಂಕ 25.11.2025 ರಂದು ಪ್ರಕಟಿಸಲಾಗಿದೆ. ದಿನಾಂಕ 25.11.2025 ರಿಂದ 10.12.2025 ರವರೆಗಿನ ಹಕ್ಕು ಮತ್ತು ಆಕ್ಷೇಪಣೆಗಳ ಅವಧಿಯಲ್ಲಿ ಎಲ್ಲಾ ಅರ್ಹ ಪದವೀಧರರು ಮತ್ತು ಶಿಕ್ಷಕರು ತಮ್ಮ ಹಕ್ಕು ಮತ್ತು ಆಕ್ಷೇಪಣೆಗಳನ್ನು ಸಲ್ಲಿಸಬಹುದು.  ಅಂತಿಮ ಮತದಾರರ ಪಟ್ಟಿಯನ್ನು ಡಿಸೆಂಬರ್ 30, 2025 ರಂದು ಪ್ರಕಟಿಸಲಾಗುವುದು  ಎಂದು  ತಿಳಿಸಿದ್ದಾರೆ.

ನವೆಂಬರ್ 25, 2025 ರ  ದಿನಾಂಕದಂದು ಪ್ರಕಟಿಸಲಾದ ಕರಡು ಮತದಾರರ  ಪಟ್ಟಿಯಂತೆ  ಬೆಂಗಳೂರು ಶಿಕ್ಷಕರ ಕ್ಷೇತ್ರದಲ್ಲಿ  ಒಟ್ಟು 21496 ಮತದಾರರು  ನೋಂದಾಯಿಸಿಕೊಂಡಿದ್ದಾರೆ.  ಕರ್ನಾಟಕ ಈಶಾನ್ಯ ಶಿಕ್ಷಕರ ಕ್ಷೇತ್ರದಲ್ಲಿ  ಒಟ್ಟು ನೋಂದಾಯಿತ ಮತದಾರರ ಸಂಖ್ಯೆ  28984, ಕರ್ನಾಟಕ ಆಗ್ನೇಯ ಪದವೀಧರರ ಕ್ಷೇತ್ರದಲ್ಲಿ ನೋಂದಾಯಿತ ಮತದಾರರ ಸಂಖ್ಯೆ 151374  ಮತ್ತು ಕರ್ನಾಟಕ ಪಶ್ಚಿಮ ಪದವೀಧರರ ಕ್ಷೇತ್ರದಲ್ಲಿ  ಒಟ್ಟು 74311 ಮತದಾರರು ನೋಂದಾಯಿಸಿಕೊಂಡಿದ್ದಾರೆ.

ಕರಡು ಮತದಾರರ ಪಟ್ಟಿಗಳು ಸಂಬಂಧಪಟ್ಟ ಚುನಾವಣಾ ನೋಂದಣಿ ಅಧಿಕಾರಿಗಳು ಮತ್ತು ಪ್ರಾದೇಶಿಕ ಆಯುಕ್ತರು, ಸಹಾಯಕ ಚುನಾವಣಾ ನೋಂದಣಿ ಅಧಿಕಾರಿಗಳು ಮತ್ತು ಜಿಲ್ಲಾ ಚುನಾವಣಾ ಅಧಿಕಾರಿಗಳ ಕಚೇರಿಗಳಲ್ಲಿ ಮತ್ತು ಕರ್ನಾಟಕದ ಮುಖ್ಯ ಚುನಾವಣಾ ಅಧಿಕಾರಿಗಳ ಅಧಿಕೃತ ವೆಬ್ ಸೈಟ್ https://ceo.karnataka.gov.in  ನಲ್ಲಿ ಮತ್ತು ಸಂಬಂಧಪಟ್ಟ ಪ್ರಾದೇಶಿಕ ಆಯುಕ್ತರು ಮತ್ತು ಜಿಲ್ಲಾ ಚುನಾವಣಾ ಅಧಿಕಾರಿಗಳ ವೆಬ್ ಸೈಟ್ ಗಳಲ್ಲಿ   ಲಭ್ಯವಿದೆ ಎಂದು ಕರ್ನಾಟಕ, ಮುಖ್ಯ  ಚುನಾವಣಾಧಿಕಾರಿ ಕಛೇರಿಯ  ಜಂಟಿ ಮುಖ್ಯ ಚುನಾವಣಾಧಿಕಾರಿಗಳಾದ (ಮತದಾರರ ಪಟ್ಟಿ) ಯೋಗೇಶ್ವರ ಎಸ್ ಅವರು ಪಕ್ರಟಣೆಯಲ್ಲಿ  ತಿಳಿಸಿದ್ದಾರೆ.