ಬೆಂಗಳೂರು: ರೈತರ ಜೀವನಾಡಿಯಾಗಿರುವ ಬೆಂಗಳೂರು ಹಾಲು ಒಕ್ಕೂಟ (ಬಮೂಲ್), ಹೈನುಗಾರಿಕೆಯಲ್ಲಿ ಆಧುನಿಕತೆಯ ಕ್ರಾಂತಿ ತರಲು ಮುಂದಾಗಿದೆ. ಒಕ್ಕೂಟವನ್ನು ಇನ್ನಷ್ಟು ಬಲಪಡಿಸುವ ಉದ್ದೇಶದಿಂದ ಇದೀಗ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಲಾಗಿದ್ದು, ರೈತರಿಗೆ ಪಾರದರ್ಶಕ ಹಾಗೂ ವೇಗವಾದ ಸೇವೆ ನೀಡಲು ನಿರ್ಧರಿಸಲಾಗಿದೆ.
ನಿಮಿಷಾರ್ಧದಲ್ಲಿ ಸಂಪೂರ್ಣ ಮಾಹಿತಿ:
ಈ ಹೊಸ ತಂತ್ರಜ್ಞಾನದ ಅನ್ವಯ, ರೈತರು ಡೈರಿಗೆ ಹಾಲು ಹಾಕಿದ ತಕ್ಷಣವೇ ಅವರ ಮೊಬೈಲ್ಗೆ ಎಸ್ಎಂಎಸ್ (SMS) ಸಂದೇಶ ಬರಲಿದೆ. ಈ ಹಿಂದೆ ಹಾಲಿನ ಗುಣಮಟ್ಟ ಮತ್ತು ಹಣದ ವಿವರ ತಿಳಿಯಲು ಕಾಯಬೇಕಿತ್ತು. ಆದರೆ ಇನ್ಮುಂದೆ ಹಾಲು ನೀಡಿದ ಕೇವಲ ಒಂದು ನಿಮಿಷದಲ್ಲಿ:
ಹಾಲಿನ ಒಟ್ಟು ತೂಕ
ಹಾಲಿನಲ್ಲಿರುವ ಬೆಣ್ಣೆ ಅಂಶ (Fat) ಮತ್ತು ಎಸ್ಎನ್ಎಫ್ (SNF) ಪ್ರಮಾಣ
ಆ ಹಾಲಿಗೆ ದೊರೆಯುವ ನಿಖರವಾದ ಹಣದ ಮೊತ್ತ
ಈ ಎಲ್ಲಾ ಮಾಹಿತಿಗಳು ರೈತರ ಮೊಬೈಲ್ಗೆ ತಲುಪಲಿವೆ. ಇದರಿಂದ ಹಾಲಿನ ಸಂಗ್ರಹಣೆಯಲ್ಲಿ ಹೆಚ್ಚಿನ ಪಾರದರ್ಶಕತೆ ಬರಲಿದ್ದು, ಯಾವುದೇ ರೀತಿಯ ಅಕ್ರಮ ಅಥವಾ ಗೊಂದಲಗಳಿಗೆ ಆಸ್ಪದವಿರುವುದಿಲ್ಲ.
ರೈತ ಸ್ನೇಹಿ ಕ್ರಮ:
ಡಿಜಿಟಲ್ ತಂತ್ರಜ್ಞಾನದ ಬಳಕೆಯಿಂದಾಗಿ ಹೈನುಗಾರರು ಪ್ರತಿ ಬಾರಿಯೂ ಡೈರಿ ದಾಖಲೆಗಳನ್ನು ಪರಿಶೀಲಿಸುವ ಅಗತ್ಯವಿರುವುದಿಲ್ಲ. ಹಾಲಿನ ಗುಣಮಟ್ಟಕ್ಕೆ ತಕ್ಕಂತೆ ತಕ್ಷಣವೇ ಮಾಹಿತಿ ಸಿಗುವುದರಿಂದ ರೈತರು ತಮ್ಮ ಆದಾಯದ ಬಗ್ಗೆ ಸ್ಪಷ್ಟತೆ ಹೊಂದಲು ಸಹಕಾರಿಯಾಗಲಿದೆ. ಬಮೂಲ್ನ ಈ ಹೈಟೆಕ್ ಹೆಜ್ಜೆ ಹೈನುಗಾರಿಕೆ ಕ್ಷೇತ್ರದಲ್ಲಿ ಹೊಸ ಸಂಚಲನ ಮೂಡಿಸಿದೆ.