ನವದೆಹಲಿ: ಬೆಂಗಳೂರು ಮೆಟ್ರೋ ರೈಲು ಯೋಜನೆಯ ಮೂರನೇ ಹಂತದ (Phase-3) ಅನುಷ್ಠಾನಕ್ಕೆ ಮಹತ್ವದ ಆರ್ಥಿಕ ನೆರವು ಲಭ್ಯವಾಗಿದೆ. ಯೋಜನೆಗೆ ಅಗತ್ಯವಿರುವ ಸಾಲದ ಒಪ್ಪಂದಕ್ಕೆ ಭಾರತ ಸರ್ಕಾರ ಮತ್ತು ಜಪಾನ್ ಅಂತರರಾಷ್ಟ್ರೀಯ ಸಹಕಾರ ಸಂಸ್ಥೆ (JICA) ಮಂಗಳವಾರ ನವದೆಹಲಿಯಲ್ಲಿ ಅಧಿಕೃತವಾಗಿ ಸಹಿ ಹಾಕಿವೆ.
ಭಾರತ ಸರ್ಕಾರದ ಆರ್ಥಿಕ ವ್ಯವಹಾರಗಳ ಇಲಾಖೆಯ ಜಂಟಿ ಕಾರ್ಯದರ್ಶಿ ಅಲೋಕ್ ತಿವಾರಿ ಮತ್ತು ಜೈಕಾ ಭಾರತ ಕಚೇರಿಯ ಮುಖ್ಯ ಪ್ರತಿನಿಧಿ ಟಿಕೆಉಚಿ ತಕುರು ಅವರು ಒಪ್ಪಂದಕ್ಕೆ ಅಂಕಿತ ಹಾಕಿದರು. ಈ ಸಂದರ್ಭದಲ್ಲಿ ಬಿಎಂಆರ್ಸಿಎಲ್ ವ್ಯವಸ್ಥಾಪಕ ನಿರ್ದೇಶಕ ಡಾ. ಜೆ. ರವಿಶಂಕರ್ ಹಾಗೂ ಹಣಕಾಸು ನಿರ್ದೇಶಕ ಎಸ್. ಶಿವಮಾಥನ್ ಉಪಸ್ಥಿತರಿದ್ದರು.
ಸಾಲದ ವಿವರ:
ಹಂತ-3ರ ಯೋಜನೆಗಾಗಿ ಒಟ್ಟು ₹6,775 ಕೋಟಿ ಹಿರಿಯ ಸಾಲವನ್ನು ನೀಡಲು ಜೈಕಾ ಒಪ್ಪಿಕೊಂಡಿದೆ. ಇದನ್ನು ಎರಡು ಹಂತಗಳಲ್ಲಿ ಬಿಡುಗಡೆ ಮಾಡಲಾಗುತ್ತಿದ್ದು, ಮೊದಲ ಕಂತಿನಲ್ಲಿ ₹6,100 ಕೋಟಿ (102,480 ಮಿಲಿಯನ್ ಯೆನ್) ಲಭ್ಯವಾಗಲಿದೆ. ಈ ಸಾಲದ ಅವಧಿ 30 ವರ್ಷಗಳಾಗಿದ್ದು, ಇದರಿಂದ ಯೋಜನೆಯ ಆರ್ಥಿಕ ಮುಕ್ತಾಯಕ್ಕೆ (Financial Closure) ಹಾದಿ ಸುಗಮವಾಗಿದೆ.
ಯೋಜನೆಯ ವ್ಯಾಪ್ತಿ:
ಒಟ್ಟು 44.65 ಕಿ.ಮೀ ಉದ್ದದ ಎರಡು ಕಾರಿಡಾರ್ಗಳನ್ನು ಈ ಹಂತದಲ್ಲಿ ನಿರ್ಮಿಸಲಾಗುತ್ತಿದೆ:
ಕಾರಿಡಾರ್-1: ಜೆಪಿ ನಗರ 4ನೇ ಹಂತದಿಂದ ಕೆಂಪಾಪುರದವರೆಗೆ (ಹೊರ ವರ್ತುಲ ರಸ್ತೆ ಪಶ್ಚಿಮ ಭಾಗ) – 32.15 ಕಿ.ಮೀ.
ಕಾರಿಡಾರ್-2: ಹೊಸಹಳ್ಳಿಯಿಂದ ಮಗಡಿ ರಸ್ತೆ ಮೂಲಕ ಕಡಬಗೆರೆಯವರೆಗೆ – 12.5 ಕಿ.ಮೀ.
ಕಳೆದ ಸೆಪ್ಟೆಂಬರ್ನಲ್ಲಿ ಕೇಂದ್ರ ಸರ್ಕಾರವು ₹15,611 ಕೋಟಿ ವೆಚ್ಚದ ಈ ಯೋಜನೆಗೆ ಅನುಮೋದನೆ ನೀಡಿತ್ತು. ಜೈಕಾ ನೀಡುತ್ತಿರುವ ಈ ಆರ್ಥಿಕ ನೆರವು ಸಿವಿಲ್ ಕಾಮಗಾರಿಗಳು, ಹಳಿಗಳ ನಿರ್ಮಾಣ, ರೋಲಿಂಗ್ ಸ್ಟಾಕ್ (ರೈಲು ಪೆಟ್ಟಿಗೆಗಳು), ಸಿಗ್ನಲಿಂಗ್, ಟೆಲಿಕಮ್ಯುನಿಕೇಶನ್ ಮತ್ತು ಟ್ರ್ಯಾಕ್ಷನ್ ಸೇರಿದಂತೆ ಪ್ರಮುಖ ತಾಂತ್ರಿಕ ವಿಭಾಗಗಳಿಗೆ ಬಳಕೆಯಾಗಲಿದೆ ಎಂದು ನಮ್ಮ ಮೆಟ್ರೋ ಪ್ರಕಟಣೆ ಮೂಲಕ ಮಾಹಿತಿ ನೀಡಿದೆ.