ಬೆಂಗಳೂರು: ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ ‘ಶಕ್ತಿ ಯೋಜನೆ’ಯ (ಉಚಿತ ಬಸ್ ಪ್ರಯಾಣ) ಲಾಭವನ್ನು ಕೋಟ್ಯಂತರ ಮಹಿಳೆಯರು ಪಡೆಯುತ್ತಿದ್ದಾರೆ. ಆದರೆ, ಇದೇ ಯೋಜನೆಯನ್ನು ಬಳಸಿಕೊಂಡು ಬಿಎಂಟಿಸಿ (BMTC) ಕಂಡಕ್ಟರ್ಗಳೇ ಸರ್ಕಾರಕ್ಕೆ ಮತ್ತು ಸಾರಿಗೆ ಸಂಸ್ಥೆಗೆ ಮೋಸ ಮಾಡುತ್ತಿದ್ದಾರಾ ಎಂಬ ಗಂಭೀರ ಪ್ರಶ್ನೆಯೊಂದು ಈಗ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ.
ಬೆಂಗಳೂರಿನ ವಕೀಲರೊಬ್ಬರು ತಮಗಾದ ಕಹಿ ಅನುಭವವನ್ನು ಹಂಚಿಕೊಂಡು, ಸೋಷಿಯಲ್ ಮೀಡಿಯಾದಲ್ಲಿ ಆಕ್ರೋಶ ಹೊರಹಾಕಿದ್ದಾರೆ. ಈ ಪೋಸ್ಟ್ ಈಗ ಸಾರಿಗೆ ಇಲಾಖೆಯಲ್ಲಿ ಸಂಚಲನ ಮೂಡಿಸಿದೆ.
ಏನಿದು ಘಟನೆ? ಸೋಷಿಯಲ್ ಮೀಡಿಯಾ ಪೋಸ್ಟ್ನಲ್ಲೇನಿದೆ?
ಒಂದೇ ಟಿಕೆಟ್ನಲ್ಲಿ ಇಬ್ಬರ ಪ್ರಯಾಣ: ಸುರೇಖಾ ಪಿ.ವಿ. ಎಂಬ ಮಹಿಳಾ ವಕೀಲರು ಬಿಎಂಟಿಸಿ ಬಸ್ನಲ್ಲಿ ‘ಅವಲಹಳ್ಳಿ ಬಿಡಿಎ ಲೇಔಟ್’ಗೆ ಹೋಗಲು ಟಿಕೆಟ್ ಪಡೆದಿದ್ದಾರೆ. ಅದೇ ಬಸ್ನಲ್ಲಿ ಮತ್ತೊಬ್ಬ ಮಹಿಳೆ ‘ಅಪೆಕ್ಸ್ ಬ್ಯಾಂಕ್’ಗೆ ಹೋಗಲು ಟಿಕೆಟ್ ಕೇಳಿದ್ದಾರೆ. ಆದರೆ ಕಂಡಕ್ಟರ್ ಇಬ್ಬರು ಮಹಿಳೆಯರ ಹೆಸರನ್ನೂ ಸೇರಿಸಿ ಒಂದೇ ‘ಶಕ್ತಿ ಯೋಜನೆ’ಯ ಶೂನ್ಯ ಮುಖಬೆಲೆಯ (Zero Value) ಟಿಕೆಟ್ ನೀಡಿದ್ದಾರೆ.
ಮಧ್ಯದಲ್ಲೇ ಇಳಿದ ಪ್ರಯಾಣಿಕರು: ನಿಯಮದ ಪ್ರಕಾರ ಇಬ್ಬರಿಗೂ ಪ್ರತ್ಯೇಕ ಟಿಕೆಟ್ ನೀಡಬೇಕು. ಆದರೆ ಒಂದೇ ಟಿಕೆಟ್ ಪಡೆದಿದ್ದ ಮತ್ತೊಬ್ಬ ಮಹಿಳೆ, ಅವಲಹಳ್ಳಿ ಬರುವ ಮುನ್ನವೇ ಬರುವ ಅಪೆಕ್ಸ್ ಬ್ಯಾಂಕ್ ಸ್ಟಾಪ್ನಲ್ಲಿ ಇಳಿದು ಹೋಗಿದ್ದಾರೆ.
ಪ್ರಶ್ನಿಸಿದರೆ ಏಕವಚನದಲ್ಲಿ ನಿಂದನೆ: ಈ ಕೃತ್ಯವನ್ನು ಪ್ರಶ್ನಿಸಿ, “ನಿಮ್ಮ ವಿರುದ್ಧ ದೂರು ನೀಡುತ್ತೇನೆ” ಎಂದಿದ್ದಕ್ಕೆ ಕಂಡಕ್ಟರ್ ಉದ್ಧಟತನ ತೋರಿದ್ದಾರೆ. “ನಿನಗ್ಯಾಕೆ? ನನ್ನ ಮೇಲಧಿಕಾರಿಗಳು ಹೇಳಿದಂತೆ ನಾನು ಮಾಡುತ್ತಿದ್ದೇನೆ, ಕೇಳಲು ನೀನ್ಯಾರು?” ಎಂದು ಏಕವಚನದಲ್ಲಿ ಬೈದು ದರ್ಪ ತೋರಿದ್ದಾರೆ ಎಂದು ಪೋಸ್ಟ್ ನಲ್ಲಿ ಉಲ್ಲೇಖಿಸಿದ್ದಾರೆ.
ಸರ್ಕಾರಕ್ಕೆ ಹೇಗೆ ಮೋಸವಾಗುತ್ತಿದೆ? (ದುರುಪಯೋಗದ ಆಂಗಲ್)
ಶಕ್ತಿ ಯೋಜನೆಯಡಿ ಮಹಿಳೆಯರು ಪ್ರಯಾಣಿಸುವ ಶೂನ್ಯ ಮುಖಬೆಲೆಯ ಟಿಕೆಟ್ಗಳ ಒಟ್ಟು ಮೊತ್ತವನ್ನು ಸರ್ಕಾರವು ಸಾರಿಗೆ ಸಂಸ್ಥೆಗಳಿಗೆ (BMTC, KSRTC) ಮರುಪಾವತಿ ಮಾಡುತ್ತದೆ. ಆದರೆ ಈ ಘಟನೆಯಲ್ಲಿ ಇಬ್ಬರು ಬೇರೆ ಬೇರೆ ನಿಲ್ದಾಣಗಳಿಗೆ ಪ್ರಯಾಣಿಸಿದ್ದರೂ ಒಂದೇ ಟಿಕೆಟ್ ನೀಡಲಾಗಿದೆ.
ಕಿಲೋಮೀಟರ್ ಲೆಕ್ಕದಲ್ಲಿ ವಂಚನೆ: ಒಬ್ಬರು ಮೊದಲೇ ಇಳಿದರೂ, ಇಬ್ಬರ ಪ್ರಯಾಣವೂ ಕೊನೆಯ ಸ್ಟಾಪ್ವರೆಗೂ ನಡೆದಿದೆ ಎಂದು ಟಿಕೆಟ್ನಲ್ಲಿ ದಾಖಲಾಗುತ್ತದೆ. ಇದರಿಂದ ಸರ್ಕಾರಕ್ಕೆ ತಪ್ಪು ಲೆಕ್ಕ ಸಲ್ಲಿಕೆಯಾಗಿ ಆರ್ಥಿಕ ನಷ್ಟವಾಗುತ್ತದೆ.
ಕಂಡಕ್ಟರ್ಗಳ ಟಾರ್ಗೆಟ್ ದಂಧೆ?: ಬಸ್ನಲ್ಲಿ ಪ್ರಯಾಣಿಕರ ಸಂಖ್ಯೆ ಅಥವಾ ಕಿಲೋಮೀಟರ್ ಟಾರ್ಗೆಟ್ ರೀಚ್ ಮಾಡಲು ಕಂಡಕ್ಟರ್ಗಳು ಈ ರೀತಿಯ ಶಾರ್ಟ್ಕಟ್ ಬಳಸುತ್ತಿದ್ದಾರಾ? ಅಥವಾ “ಮೇಲಧಿಕಾರಿಗಳೇ ಹೇಳಿದ್ದಾರೆ” ಎಂಬ ಕಂಡಕ್ಟರ್ ಹೇಳಿಕೆಯ ಹಿಂದೆ ದೊಡ್ಡ ವ್ಯವಸ್ಥಿತ ಲೋಪವಿದೆಯಾ ಎಂಬ ಅನುಮಾನ ಕಾಡುತ್ತಿದೆ.
ಅಧಿಕಾರಿಗಳಿಗೆ 15 ದಿನಗಳ ಗಡುವು; ಇಲ್ಲದಿದ್ದರೆ ಲೋಕಾಯುಕ್ತಕ್ಕೆ ದೂರು!
ತಮ್ಮನ್ನು ಪ್ರಜ್ಞಾವಂತ ಪ್ರಜೆ ಮತ್ತು ಶಕ್ತಿ ಯೋಜನೆಯ ಫಲಾನುಭವಿ ಎಂದು ಕರೆದುಕೊಂಡಿರುವ ವಕೀಲೆ ಸುರೇಖಾ, “15 ದಿನಗಳ ಒಳಗಾಗಿ ಈ ಕಂಡಕ್ಟರ್ ಮೇಲೆ ಕಾನೂನು ರೀತ್ಯಾ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ ಕರ್ನಾಟಕ ಸಾರಿಗೆ ಸಚಿವರು, ಮುಖ್ಯಮಂತ್ರಿಗಳ ಕಚೇರಿ (CMO) ಹಾಗೂ ಲೋಕಾಯುಕ್ತಕ್ಕೆ ಅಧಿಕೃತವಾಗಿ ದೂರು ನೀಡಲಾಗುವುದು” ಎಂದು ಬಿಎಂಟಿಸಿಗೆ ಎಚ್ಚರಿಕೆ ನೀಡಿದ್ದಾರೆ.
ಈ ಪೋಸ್ಟ್ ವೈರಲ್ ಆಗುತ್ತಲೇ ನೆಟ್ಟಿಗರು ಸಾರಿಗೆ ಇಲಾಖೆಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಿದ್ದು, ಉಚಿತ ಯೋಜನೆಯ ಹೆಸರಿನಲ್ಲಿ ತೆರಿಗೆದಾರರ ಹಣ ಹೇಗೆ ದುರುಪಯೋಗವಾಗುತ್ತಿದೆ ಎಂಬುದಕ್ಕೆ ಇದುವೇ ಸಾಕ್ಷಿ ಎಂದು ಕಮೆಂಟ್ ಮಾಡುತ್ತಿದ್ದಾರೆ.