ಬೆಂಗಳೂರು:ರಾಜಧಾನಿಯ ಪಾದಚಾರಿಗಳ ಸುರಕ್ಷತೆ ಮತ್ತು ಸುಗಮ ಸಂಚಾರಕ್ಕೆ ಅಡ್ಡಿಯಾಗಿರುವ ಒತ್ತುವರಿಗಳನ್ನು ತೆರವುಗೊಳಿಸುವ ಬೃಹತ್ ಕಾರ್ಯಾಚರಣೆಯ ಪ್ರಗತಿಯನ್ನು ಪರಿಶೀಲಿಸಲು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಇಂದು ನಗರದ ಪ್ರಮುಖ ರಸ್ತೆಗಳಲ್ಲಿ ಖುದ್ದಾಗಿ ರಿಯಾಲಿಟಿ ಚೆಕ್ ನಡೆಸಿದರು. ಹಳೇ ಏರ್ಪೋರ್ಟ್ ರಸ್ತೆ ಸೇರಿದಂತೆ ಹಲವು ಜನನಿಬಿಡ ವಾಣಿಜ್ಯ ಪ್ರದೇಶಗಳಿಗೆ ಭೇಟಿ ನೀಡಿದ ಅವರು, ಪಾದಚಾರಿ ಮಾರ್ಗಗಳ ಸ್ಥಿತಿಗತಿಗಳನ್ನು ಹತ್ತಿರದಿಂದ ವೀಕ್ಷಿಸಿ ಅಧಿಕಾರಿಗಳಿಗೆ ಮಹತ್ವದ ಆದೇಶಗಳನ್ನು ನೀಡಿದರು.
ಕೇವಲ 9 ದಿನಗಳಲ್ಲಿ 400 ಕಿಲೋಮೀಟರ್ ತೆರವು!
ನಗರದಲ್ಲಿ ಈ ಮಹತ್ವದ ಕಾರ್ಯಾಚರಣೆ ಆರಂಭವಾದ ಕೇವಲ ಒಂಬತ್ತು ದಿನಗಳಲ್ಲಿ ಬೆಂಗಳೂರಿನ ವಿವಿಧ ವಲಯಗಳ ವ್ಯಾಪ್ತಿಯಲ್ಲಿ ಬರೋಬ್ಬರಿ 400 ಕಿಲೋಮೀಟರ್ಗೂ ಅಧಿಕ ಉದ್ದದ ಫುಟ್ಪಾತ್ ಒತ್ತುವರಿಯನ್ನು ಯಶಸ್ವಿಯಾಗಿ ತೆರವುಗೊಳಿಸಲಾಗಿದೆ. ಸಾರ್ವಜನಿಕ ನಡಿಗೆಗೆ ಅಡ್ಡಿಯಾಗಿದ್ದ ಸಾವಿರಾರು ಅಕ್ರಮ ಅಂಗಡಿ ಮುಂಗಟ್ಟುಗಳು, ಅನಧಿಕೃತ ಕಟ್ಟಡ ವಿಸ್ತರಣೆಗಳು, ಕಾಂಕ್ರೀಟ್ ರ್ಯಾಂಪ್ಗಳು ಮತ್ತು ಬೋರ್ಡ್ಗಳನ್ನು ಜೆಸಿಬಿಗಳ ಮೂಲಕ ನೆಲಸಮಗೊಳಿಸಲಾಗಿದೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಸಿಎಂ ಡಿ.ಕೆ. ಶಿವಕುಮಾರ್, “ಬೆಂಗಳೂರಿನ ಜಾಗತಿಕ ಮಟ್ಟದ ಘನತೆಗೆ ತಕ್ಕಂತೆ ನಾಗರಿಕ ಮೂಲಸೌಕರ್ಯಗಳನ್ನು ಒದಗಿಸುವುದು ನಮ್ಮ ಸರ್ಕಾರದ ಮೊದಲ ಆದ್ಯತೆ. ಫುಟ್ಪಾತ್ಗಳ ಮೇಲಿನ ಅಕ್ರಮ ಆಕ್ರಮಣದಿಂದಾಗಿ ಸಾರ್ವಜನಿಕರು ಜೀವ ಕೈಯಲ್ಲಿ ಹಿಡಿದು ರಸ್ತೆಯ ಮೇಲೆ ನಡೆಯುವಂತಾಗಿತ್ತು. ಚೈನ್ ಸ್ನ್ಯಾಚಿಂಗ್ನಂತಹ ಅಪರಾಧ ಕೃತ್ಯಗಳಿಗೂ ಇದು ಕಾರಣವಾಗಿತ್ತು. ಹೀಗಾಗಿ ಈ ಕಟ್ಟುನಿಟ್ಟಿನ ಕ್ರಮ ಅನಿವಾರ್ಯವಾಗಿತ್ತು” ಎಂದು ಸ್ಪಷ್ಟಪಡಿಸಿದರು.
ಅಧಿಕಾರಿಗಳಿಗೆ ಹೊಣೆಗಾರಿಕೆ ಮತ್ತು ಕಠಿಣ ನಿಯಮಗಳು:
ಪುನಃ ಒತ್ತುವರಿಯಾದರೆ ಕ್ರಮ: ಕಾರ್ಯಾಚರಣೆ ಮುಗಿದ ನಂತರ ಮತ್ತೆ ಅದೇ ಜಾಗದಲ್ಲಿ ಒತ್ತುವರಿಯಾಗದಂತೆ ನೋಡಿಕೊಳ್ಳಲು ಬಿಬಿಎಂಪಿ ಮತ್ತು ಪೊಲೀಸ್ ಅಧಿಕಾರಿಗಳಿಗೆ ಸಂಪೂರ್ಣ ಜವಾಬ್ದಾರಿ ವಹಿಸಲಾಗಿದೆ. ನಿಯಮ ಉಲ್ಲಂಘನೆ ಕಂಡುಬಂದರೆ ಕಠಿಣ ಕ್ರಮ ಕೈಗೊಳ್ಳಲಾಗುವುದು.
ಅನಾಥ ವಾಹನಗಳ ಮುಟ್ಟುಗೋಲು: ಫುಟ್ಪಾತ್ ಹಾಗೂ ರಸ್ತೆ ಬದಿಯಲ್ಲಿ ವರ್ಷಗಟ್ಟಲೆ ಅನಾಥವಾಗಿ ಬಿಟ್ಟು ಹೋಗಿರುವ ವಾಹನಗಳ ಮಾಲೀಕರಿಗೆ ಒಂದು ವಾರ ಕಾಲಾವಕಾಶದ ನೋಟಿಸ್ ನೀಡಲಾಗುವುದು. ಅದಾಗದಿದ್ದರೆ ಆ ವಾಹನಗಳನ್ನು ಸರ್ಕಾರವೇ ಬಹಿರಂಗ ಹರಾಜು ಹಾಕಲಿದೆ.
ಭಾರಿ ದಂಡದ ಅಸ್ತ್ರ: ಸದ್ಯದಲ್ಲೇ ಬೆಂಗಳೂರಿಗೆ ಕಟ್ಟುನಿಟ್ಟಿನ ಹೊಸ ಫುಟ್ಪಾತ್ ನೀತಿಯನ್ನು ಜಾರಿಗೆ ತರಲಾಗುತ್ತಿದ್ದು, ಅನಧಿಕೃತ ಬ್ಯಾನರ್ ಮತ್ತು ಫ್ಲೆಕ್ಸ್ಗಳನ್ನು ಹಾಕುವವರಿಗೆ 50,000 ರೂ.ನಿಂದ 1 ಲಕ್ಷ ರೂ.ವರೆಗೆ ಭಾರಿ ಮೊತ್ತದ ದಂಡ ವಿಧಿಸಲಾಗುವುದು.
ಬೀದಿಬದಿ ವ್ಯಾಪಾರಿಗಳಿಗೆ ಪರ್ಯಾಯ ವ್ಯವಸ್ಥೆ
ಒತ್ತುವರಿಯಿಂದ ಸಂಕಷ್ಟಕ್ಕೀಡಾಗುತ್ತಿರುವ ಬಡ ಬೀದಿಬದಿ ವ್ಯಾಪಾರಿಗಳ ಹಿತರಕ್ಷಣೆಗೂ ಸರ್ಕಾರ ಬದ್ಧವಾಗಿದೆ ಎಂದು ಸಿಎಂ ಭರವಸೆ ನೀಡಿದರು. ಈಗಾಗಲೇ ಸರ್ವೇ ನಡೆಸಿ ಗುರುತಿಸಲಾಗಿರುವ ಸುಮಾರು 60,000 ಬೀದಿಬದಿ ವ್ಯಾಪಾರಿಗಳಿಗೆ ಹಾನಿಯಾಗದಂತೆ, ಮುಖ್ಯ ರಸ್ತೆಗಳನ್ನು ಹೊರತುಪಡಿಸಿ ಸೈಡ್ ರಸ್ತೆಗಳಲ್ಲಿ ಪ್ರತ್ಯೇಕ ‘ವೆಂಡಿಂಗ್ ಜೋನ್’ ಮುಖಾಂತರ ಪರ್ಯಾಯ ಜಾಗ ನೀಡಲಾಗುವುದು. ಈ ವ್ಯವಸ್ಥೆಯಲ್ಲಿ ನಮ್ಮ ರಾಜ್ಯದ ಮೂಲ ನಿವಾಸಿಗಳಿಗೆ ಮೊದಲ ಆದ್ಯತೆ ನೀಡಲಾಗುವುದು ಎಂದು ಸಿಎಂ ತಿಳಿಸಿದರು. ಆದರೆ, ಯಾರೂ ಫುಟ್ಪಾತ್ ಜಾಗದ ಮೇಲೆ ಶಾಶ್ವತ ಮಾಲೀಕತ್ವದ ಹಕ್ಕು ಸಾಧಿಸುವಂತಿಲ್ಲ ಎಂದು ಸ್ಪಷ್ಟಪಡಿಸಿದರು.