ಕೊಡಗು/ಬೆಂಗಳೂರು: ರಾಜ್ಯದ ಮಲೆನಾಡು ಹಾಗೂ ಕರಾವಳಿ ಭಾಗದಲ್ಲಿ ತೀವ್ರ ಆತಂಕ ಸೃಷ್ಟಿಸಿರುವ ಆನೆ-ಮಾನವ ಸಂಘರ್ಷದ ನಿಯಂತ್ರಣಕ್ಕೆ ಸರ್ಕಾರ ಈಗ ಹೊಸ ಕಾರ್ಯತಂತ್ರ ರೂಪಿಸುತ್ತಿದೆ. ಕೊಡಗಿನ ಪ್ರಸಿದ್ಧ ದುಬಾರೆ ಆನೆ ಶಿಬಿರದ ಬಳಿ ಇತ್ತೀಚೆಗೆ ಪ್ರವಾಸಿ ಮಹಿಳೆಯೊಬ್ಬರು ಕಾಡಾನೆ ದಾಳಿಗೆ ಬಲಿಯಾದ ದುರಂತದ ಬೆನ್ನಲ್ಲೇ ಎಚ್ಚೆತ್ತುಕೊಂಡಿರುವ ಅರಣ್ಯ ಇಲಾಖೆ, ಶಾಶ್ವತ ಪರಿಹಾರಕ್ಕಾಗಿ ತಜ್ಞರ ಸಮಿತಿಯ ಮೊರೆ ಹೋಗಿದೆ.
ಈ ಕುರಿತು ಮಾತನಾಡಿರುವ ಅರಣ್ಯ ಸಚಿವ ಈಶ್ವರ ಖಂಡ್ರೆ ಅವರು, “ಸಂಘರ್ಷ ತಡೆಗೆ ರಚಿಸಲಾಗಿರುವ ಹಿರಿಯ ತಜ್ಞರ ಸಮಿತಿಯು ಶೀಘ್ರದಲ್ಲೇ ವರದಿ ನೀಡಲಿದ್ದು, ಅದರ ಶಿಫಾರಸುಗಳ ಆಧಾರದ ಮೇಲೆ ಕಟ್ಟುನಿಟ್ಟಿನ ಕ್ರಮ ಜರುಗಿಸಲಾಗುವುದು” ಎಂದು ಪ್ರಕಟಿಸಿದ್ದಾರೆ.
ಇಲಾಖೆ ತಗೆದುಕೊಳ್ಳಲಿರುವ ಹೊಸ ಕ್ರಮಗಳೇನು?
ವೈಜ್ಞಾನಿಕ ವರದಿಯೇ ದಿಕ್ಸೂಚಿ: ಕಾಡಾನೆಗಳು ಅರಣ್ಯ ಬಿಟ್ಟು ನಾಡಿಗೆ ಬರುವುದನ್ನು ತಡೆಯಲು ಸೋಲಾರ್ ಬೇಲಿ, ರೈಲ್ವೆ ಹಳಿ ಕಂದಕಗಳ ಹೊರತಾಗಿ ಬೇರೆ ಯಾವ ವೈಜ್ಞಾನಿಕ ತಂತ್ರಜ್ಞಾನ ಬಳಸಬಹುದು ಎಂಬುದನ್ನು ತಜ್ಞರ ವರದಿ ನಿರ್ಧರಿಸಲಿದೆ.
ಪ್ರವಾಸಿ ತಾಣಗಳಲ್ಲಿ ಕಟ್ಟುನಿಟ್ಟಿನ ನಿಯಮ: ದುಬಾರೆಯಂತಹ ಸೂಕ್ಷ್ಮ ಅರಣ್ಯ ಪ್ರವಾಸಿ ವಲಯಗಳಲ್ಲಿ ಪ್ರವಾಸಿಗರ ಮುಕ್ತ ಓಡಾಟಕ್ಕೆ ಬ್ರೇಕ್ ಬೀಳುವ ಸಾಧ್ಯತೆಯಿದೆ. ಪ್ರಕೃತಿ ವೀಕ್ಷಣೆಯ ಹೆಸರಿನಲ್ಲಿ ನಿಯಮ ಮೀರಿ ಕಾಡಿನೊಳಗೆ ಹೋಗುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಲು ಇಲಾಖೆ ಮುಂದಾಗಿದೆ.
ತ್ವರಿತ ಪರಿಹಾರ ವಿತರಣೆ: ಆನೆ ದಾಳಿಗೆ ಸಿಲುಕಿ ಪ್ರಾಣ ಕಳೆದುಕೊಂಡ ಸಂತ್ರಸ್ತ ಮಹಿಳೆಯ ಕುಟುಂಬಕ್ಕೆ ಗರಿಷ್ಠ ಮಟ್ಟದ ಪರಿಹಾರವನ್ನು ವಿಳಂಬವಿಲ್ಲದೆ ತಲುಪಿಸಲು ಸಚಿವರು ಈಗಾಗಲೇ ಜಿಲ್ಲಾ ಅರಣ್ಯ ಸಂರಕ್ಷಣಾಧಿಕಾರಿಗಳಿಗೆ ಗಡುವು ವಿಧಿಸಿದ್ದಾರೆ.
ಸಾರ್ವಜನಿಕ ಜಾಗೃತಿ: ಕಾಡಿನ ಅಂಚಿನಲ್ಲಿರುವ ಗ್ರಾಮಸ್ಥರು ಮತ್ತು ಹೋಂ ಸ್ಟೇ ಮಾಲೀಕರಿಗೆ ಕಾಡಾನೆಗಳ ಚಲನವಲನದ ಬಗ್ಗೆ ಮುಂಚಿತವಾಗಿಯೇ ಮಾಹಿತಿ ನೀಡುವ ಎಚ್ಚರಿಕೆ ವ್ಯವಸ್ಥೆಯನ್ನು (Early Warning System) ಬಲಪಡಿಸಲಾಗುತ್ತಿದೆ.