ಕ್ಯಾನ್ಸರ್ ಔಷಧಿಗಳ ದರ ಇಳಿಕೆ:ನಿಯಮ ಉಲ್ಲಂಘಿಸಿದರೆ ಕಠಿಣ ಕ್ರಮದ ಎಚ್ಚರಿಕೆ ನೀಡಿದ ಸರ್ಕಾರ

ಬೆಂಗಳೂರು: ಕ್ಯಾನ್ಸರ್ ರೋಗಿಗಳ ಚಿಕಿತ್ಸಾ ವೆಚ್ಚಕ್ಕೆ ಆಸರೆಯಾಗುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರದ ರಾಷ್ಟ್ರೀಯ ಔಷಧ ಬೆಲೆ ನಿಯಂತ್ರಣ ಪ್ರಾಧಿಕಾರವು (NPPA) ಮಹತ್ವದ ಕ್ರಮ ಕೈಗೊಂಡಿದ್ದು, 137 ಅತ್ಯಗತ್ಯ ಕ್ಯಾನ್ಸರ್ ಔಷಧಿಗಳ ಸುಮಾರು 1,366 ವಿವಿಧ ಉತ್ಪನ್ನಗಳ ಬೆಲೆಯನ್ನು ಗಣನೀಯವಾಗಿ ಇಳಿಕೆ ಮಾಡಿದೆ. ಈ ಐತಿಹಾಸಿಕ ತೀರ್ಮಾನದ ಹಿಂದೆ ಕರ್ನಾಟಕ ಸರ್ಕಾರದ ಜಾಗೃತ ತನಿಖಾ ವರದಿ ಪ್ರಮುಖ ಪಾತ್ರ ವಹಿಸಿದೆ ಎಂದು ಆರೋಗ್ಯ ಸಚಿವ ಯು.ಟಿ. ಖಾದರ್ ತಿಳಿಸಿದ್ದಾರೆ.

ಕ್ಯಾನ್ಸರ್ ಔಷಧಿಗಳ ಹೆಸರಿನಲ್ಲಿ ರೋಗಿಗಳನ್ನು ಸುಲಿಗೆ ಮಾಡಲಾಗುತ್ತಿರುವ ದೂರಿನ ಹಿನ್ನೆಲೆಯಲ್ಲಿ, ರಾಜ್ಯದ ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ ಇಲಾಖೆಯು ತನಿಖೆ ನಡೆಸಿತ್ತು. ಈ ವೇಳೆ 253 ಕ್ಯಾನ್ಸರ್ ಔಷಧಿಗಳ ಖರೀದಿ ವೆಚ್ಚ ಮತ್ತು ಗರಿಷ್ಠ ಮಾರಾಟ ಬೆಲೆ (MRP) ನಡುವೆ ಭಾರಿ ವ್ಯತ್ಯಾಸವಿರುವುದು ಪತ್ತೆಯಾಗಿತ್ತು. ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ಮಾರ್ಗದರ್ಶನದಂತೆ, ಸೆಪ್ಟೆಂಬರ್ 23, 2026 ರಂದು ಕೇಂದ್ರ ಆರೋಗ್ಯ ಸಚಿವರಿಗೆ ಪತ್ರ ಬರೆದು ಈ ವರದಿಯನ್ನು ಸಲ್ಲಿಸಲಾಗಿತ್ತು. ಇದರ ಫಲವಾಗಿ ಈಗ ಇಡೀ ದೇಶದ ರೋಗಿಗಳಿಗೆ ಅನುಕೂಲವಾಗುವಂತೆ ದರ ಕಡಿತದ ಆದೇಶ ಹೊರಬಿದ್ದಿದೆ‌ ಎಂದರು.

ದರ ಇಳಿಕೆಯ ಪ್ರಮುಖ ವಿವರಗಳು:

ಬೆವಾಸಿಜುಮಾಬ್ ಇಂಜೆಕ್ಷನ್ (400 mg): ಈ ಹಿಂದೆ ₹42,000 ಇದ್ದ ಇದರ ಬೆಲೆ ಈಗ ₹13,136 ಕ್ಕೆ ಇಳಿಕೆಯಾಗಿದೆ.

ಪಾಲ್ಬೊಸಿಕ್ಲಿಬ್: ಈ ಔಷಧಿಯ ಒಂದು ಸೈಕಲ್‌ನ ದರ ₹9,787 ರಿಂದ ₹3,147 ಕ್ಕೆ ತಗ್ಗಿದೆ.

ನವೆಂಬರ್ 9 ರಿಂದಲೇ ಹೊಸ ಆದೇಶ ಜಾರಿ:

ಪರಿಷ್ಕೃತ ದರಗಳು ನವೆಂಬರ್ 9 ರಿಂದಲೇ ಜಾರಿಗೆ ಬಂದಿದ್ದು, ಕಾಗದದಲ್ಲಿ ಮಾತ್ರ ಉಳಿಯದೆ ಪ್ರತಿಯೊಬ್ಬ ರೋಗಿಯ ಬಿಲ್‌ನಲ್ಲೂ ಕಾಣಿಸಬೇಕು ಎಂದು ರಾಜ್ಯ ಸರ್ಕಾರ ಕಟ್ಟುನಿಟ್ಟಿನ ಸೂಚನೆ ನೀಡಿದೆ. ಈ ಸಂಬಂಧ ರಾಜ್ಯದ ಎಲ್ಲಾ ಔಷಧ ತಯಾರಕರು, ವಿತರಕರು, ಆಸ್ಪತ್ರೆಗಳು ಮತ್ತು ನರ್ಸಿಂಗ್ ಹೋಂಗಳಿಗೆ ನಿರ್ದೇಶನಗಳನ್ನು ನೀಡಲಾಗಿದೆ:

ಹೆಚ್ಚುವರಿ ವಸೂಲಾತಿ ನಿಷೇಧ: ಯಾವುದೇ ಆಸ್ಪತ್ರೆ ಅಥವಾ ಫಾರ್ಮಸಿ ಹೊಸ ಎಂಆರ್‌ಪಿಗಿಂತ ಒಂದು ರೂಪಾಯಿಯನ್ನೂ ಹೆಚ್ಚು ಪಡೆಯುವಂತಿಲ್ಲ. ಈಗಾಗಲೇ ಹೆಚ್ಚು ಹಣ ಪಡೆದಿದ್ದರೆ ಅದನ್ನು ಕಾನೂನುಬದ್ಧವಾಗಿ ರೋಗಿಗಳಿಗೆ ಹಿಂತಿರುಗಿಸಬೇಕು.

ಬಿಲ್‌ನಲ್ಲಿ ಪಾರದರ್ಶಕತೆ: ನವೆಂಬರ್ 9 ರಿಂದ ರೋಗಿಗಳಿಗೆ ನೀಡುವ ಬಿಲ್‌ನಲ್ಲಿ ಔಷಧಿಯ ಮೂಲ ಖರೀದಿ ವೆಚ್ಚ ಮತ್ತು ಪರಿಷ್ಕೃತ MRP ಎರಡನ್ನೂ ಕಡ್ಡಾಯವಾಗಿ ನಮೂದಿಸಬೇಕು.

ಅಗತ್ಯ ಪೂರೈಕೆ: ಔಷಧ ಕಂಪನಿಗಳು ಯಾವುದೇ ಕಾರಣಕ್ಕೂ ಈ ಔಷಧಿಗಳ ಪೂರೈಕೆಯಲ್ಲಿ ಕೊರತೆಯಾಗದಂತೆ ನಿರಂತರ ಸರಬರಾಜು ಕಾಯ್ದುಕೊಳ್ಳಬೇಕು.

ರಾಜ್ಯಾದ್ಯಂತ ತಪಾಸಣೆ, ದೂರಿಗೆ ಮುಕ್ತ ಅವಕಾಶ:

ಹೊಸ ಆದೇಶವು ಸಮರ್ಪಕವಾಗಿ ಪಾಲನೆಯಾಗುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಔಷಧ ನಿಯಂತ್ರಣ ಇಲಾಖೆಯು ರಾಜ್ಯಾದ್ಯಂತ ಕಟ್ಟುನಿಟ್ಟಿನ ತಪಾಸಣೆ ನಡೆಸಲಿದೆ. ನಿಯಮ ಉಲ್ಲಂಘಿಸುವ ಸಂಸ್ಥೆಗಳ ವಿರುದ್ಧ ‘ಔಷಧ ಬೆಲೆ ನಿಯಂತ್ರಣ ಆದೇಶ (DPCO) 2013’ ರ ಅಡಿಯಲ್ಲಿ ಕಠಿಣ ಕಾನೂನು ಕ್ರಮ ಜರುಗಿಸಲಾಗುವುದು ಎಂದರು.

ರೋಗಿಗಳು ಔಷಧಿ ಖರೀದಿಸುವಾಗ ಹೊಸ ಎಂಆರ್‌ಪಿ ಪರಿಶೀಲಿಸಬೇಕು ಹಾಗೂ ಬಿಲ್ ಮತ್ತು ಪ್ರಿಸ್ಕ್ರಿಪ್ಷನ್ ಕಾಯ್ದಿರಿಸಿಕೊಳ್ಳಬೇಕು. ಬೆಲೆಗಳ ವಿವರವನ್ನು “ಫಾರ್ಮಾ ಸಹಿ ದಾಮ್” ಆ್ಯಪ್ ಅಥವಾ NPPA ವೆಬ್‌ಸೈಟ್‌ನಲ್ಲಿ ಪರಿಶೀಲಿಸಬಹುದು. ಹೆಚ್ಚಿನ ಹಣ ಬೇಡಿದರೆ ಇಲಾಖೆಯು ಒದಗಿಸಿರುವ ಕ್ಯೂಆರ್ (QR) ಕೋಡ್ ಮೂಲಕ ಅಥವಾ NPPA ಸಹಾಯವಾಣಿ 1800-111-255 ಗೆ ಕರೆ ಮಾಡಿ ದೂರು ದಾಖಲಿಸಬಹುದಾಗಿದೆ. “ಕ್ಯಾನ್ಸರ್ ಪೀಡಿತ ಕುಟುಂಬಗಳ ಆರ್ಥಿಕ ಮತ್ತು ಮಾನಸಿಕ ಸಂಕಷ್ಟಕ್ಕೆ ನೆರವಾಗಲು ಸರ್ಕಾರ ಸದಾ ನಿಮ್ಮೊಂದಿಗಿದೆ” ಎಂದು ಯು.ಟಿ. ಖಾದರ್ ಭರವಸೆ ನೀಡಿದ್ದಾರೆ.