ಬೆಂಗಳೂರು: ರಾಜ್ಯದ ಪ್ರಾಥಮಿಕ ಶಾಲೆಗಳಲ್ಲಿ ಒಂದನೇ ತರಗತಿ ದಾಖಲಾತಿಗಾಗಿ ಕಾಯುತ್ತಿದ್ದ ಪೋಷಕರಿಗೆ ರಾಜ್ಯ ಸರ್ಕಾರ ಸಿಹಿ ಸುದ್ದಿ ನೀಡಿದೆ. 1ನೇ ತರಗತಿ ಪ್ರವೇಶಕ್ಕೆ ನಿಗದಿಪಡಿಸಲಾಗಿದ್ದ ಕನಿಷ್ಠ ವಯೋಮಿತಿಯಲ್ಲಿ 60 ದಿನಗಳ (2 ತಿಂಗಳು) ಸಡಿಲಿಕೆ ನೀಡಿ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯು ಅಧಿಕೃತ ಆದೇಶ ಹೊರಡಿಸಿದೆ.
ಶಾಲಾ ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅವರು ಈ ಹಿಂದೆ ವಿಧಾನಸಭೆಯಲ್ಲಿ ನೀಡಿದ್ದ ಭರವಸೆಯಂತೆ, ಈಗ ಇಲಾಖೆಯು ಅಧಿಕೃತವಾಗಿ ನಿಯಮವನ್ನು ಸಡಿಲಗೊಳಿಸಿದೆ. ಇದರಿಂದಾಗಿ ಜೂನ್ 1ಕ್ಕೆ 6 ವರ್ಷ ತುಂಬಲು ಕೆಲವೇ ದಿನಗಳ ಬಾಕಿ ಇದ್ದ ಕಾರಣ ಪ್ರವೇಶ ವಂಚಿತರಾಗುತ್ತಿದ್ದ ಸಾವಿರಾರು ಮಕ್ಕಳಿಗೆ ಈ ಬಾರಿ ಶಾಲಾ ದಾಖಲಾತಿಗೆ ಅವಕಾಶ ಸಿಕ್ಕಂತಾಗಿದೆ.
ಆದೇಶದ ಪ್ರಮುಖಾಂಶಗಳು:
ವಯೋಮಿತಿ ರಿಯಾಯಿತಿ: 2026-27ನೇ ಶೈಕ್ಷಣಿಕ ಸಾಲಿಗೆ ಅನ್ವಯವಾಗುವಂತೆ, 1ನೇ ತರಗತಿ ಪ್ರವೇಶಕ್ಕೆ ಜೂನ್ 1ಕ್ಕೆ ಮಗುವಿಗೆ ಕನಿಷ್ಠ 5 ವರ್ಷ 10 ತಿಂಗಳು ತುಂಬಿದ್ದರೆ ಸಾಕು. (ಹಿಂದಿನ ನಿಯಮದಂತೆ 6 ವರ್ಷ ಕಡ್ಡಾಯವಾಗಿತ್ತು).
ಎಲ್ಲಾ ಶಾಲೆಗಳಿಗೂ ಅನ್ವಯ: ಈ ಆದೇಶವು ರಾಜ್ಯದ ಸರ್ಕಾರಿ, ಅನುದಾನಿತ ಹಾಗೂ ಅನುದಾನರಹಿತ (ಖಾಸಗಿ) ಶಾಲೆಗಳಿಗೂ ಅನ್ವಯವಾಗಲಿದೆ.
ಪೂರ್ವ ಪ್ರಾಥಮಿಕಕ್ಕೂ ಅನ್ವಯ: ಒಂದನೇ ತರಗತಿಯಂತೆಯೇ LKG ಮತ್ತು UKG ಪ್ರವೇಶಾತಿಗೂ ಇದೇ ಮಾದರಿಯ 60 ದಿನಗಳ ವಯೋಮಿತಿ ಸಡಿಲಿಕೆಯನ್ನು ನೀಡಲಾಗಿದೆ.
ತಾಂತ್ರಿಕ ಬದಲಾವಣೆ: ವಿದ್ಯಾರ್ಥಿಗಳ ದಾಖಲಾತಿ ಮಾಡುವ ‘ಸ್ಯಾಟ್ಸ್’ (SATS) ತಂತ್ರಾಂಶದಲ್ಲಿ ಹೊಸ ವಯೋಮಿತಿಗೆ ಅನುಗುಣವಾಗಿ ಬದಲಾವಣೆ ಮಾಡಲು ಇಲಾಖೆ ಸೂಚಿಸಿದೆ.
ಪೋಷಕರ ಸಂಭ್ರಮ:
ಕೇವಲ 15 ಅಥವಾ 20 ದಿನಗಳ ವಯಸ್ಸಿನ ವ್ಯತ್ಯಾಸದಿಂದ ಮಕ್ಕಳ ಒಂದು ವರ್ಷ ವ್ಯರ್ಥವಾಗುತ್ತಿದೆ ಎಂದು ಪೋಷಕರು ಕಳೆದ ಹಲವು ದಿನಗಳಿಂದ ಸರ್ಕಾರದ ಮೇಲೆ ಒತ್ತಡ ಹೇರಿದ್ದರು. ಪೋಷಕರ ಮನವಿಗೆ ಸ್ಪಂದಿಸಿರುವ ಸರ್ಕಾರ, ಶಿಕ್ಷಣ ಕಾಯ್ದೆಯಡಿ ಈ ವಿಶೇಷ ವಿನಾಯಿತಿ ನೀಡಿದೆ. ಈ ನಿರ್ಧಾರದಿಂದಾಗಿ ರಾಜ್ಯಾದ್ಯಂತ ಪೋಷಕರು ಹರ್ಷ ವ್ಯಕ್ತಪಡಿಸಿದ್ದಾರೆ.