ಬೆಂಗಳೂರು: ಸ್ಮಾರ್ಟ್ಫೋನ್ಗಳಲ್ಲೇ ಬದುಕು ಹುಡುಕುವ, ‘ರೈಟ್ ಸ್ವೈಪ್’ (Right Swipe) ಮೂಲಕವೇ ಸಂಬಂಧಗಳನ್ನು ಬೆಸೆಯುವ ಇಂದಿನ ಜೆನ್ ಜಿ (Gen Z – ಯುವ ಪೀಳಿಗೆ) ಜಗತ್ತು ಎಷ್ಟು ಆಕರ್ಷಕವಾಗಿದೆಯೋ, ಅಷ್ಟೇ ಅಪಾಯಕಾರಿಯಾಗುತ್ತಿದೆ. ಇತ್ತೀಚಿನ ಕೇಂದ್ರ ಆರೋಗ್ಯ ಇಲಾಖೆಯ ತಾಂತ್ರಿಕ ವರದಿ (India HIV Estimation) ದೇಶದಲ್ಲಿ ಹೆಚ್ಐವಿ ಸೋಂಕಿತರ ಒಟ್ಟು ಸಂಖ್ಯೆ 25.61 ಲಕ್ಷ ದಾಟಿದೆ ಎಂದು ಆತಂಕಕಾರಿ ಸತ್ಯ ಬಿಚ್ಚಿಟ್ಟಿದೆ. ಇದರಲ್ಲಿ ದಕ್ಷಿಣ ಭಾರತದ ಆಂಧ್ರಪ್ರದೇಶ (3.94 ಲಕ್ಷ) ಮೊದಲ ಸ್ಥಾನದಲ್ಲಿದ್ದರೆ, ನಮ್ಮ ಕರ್ನಾಟಕ (2.91 ಲಕ್ಷ) ಮೂರನೇ ಸ್ಥಾನದಲ್ಲಿದೆ. ಆದರೆ, ಈ ಅಂಕಿ-ಅಂಶಗಳಿಗಿಂತಲೂ ಇಂದಿನ ಯುವಕರ ಜೀವನಶೈಲಿ ತಜ್ಞರ ನಿದ್ದೆಗೆಡಿಸಿದೆ.
18ರಿಂದ 25 ವರ್ಷದೊಳಗಿನ 7 ಸಾವಿರ ಯುವಕರು/ ವಿದ್ಯಾರ್ಥಿಗಳು ಎಚ್ ಐವಿ ಸೋಂಕಿನಿಂದ ಬಳಲುತ್ತಿದ್ದಾರೆ. 18ರಿಂದ 35 ವರ್ಷದ ವಯೋಮಾನದವರಲ್ಲಿ ಸೋಂಕಿನ ಪ್ರಮಾಣ ವೇಗವಾಗಿ ಹೆಚ್ಚುತ್ತಿರುವುದು ಅಂಕಿಅಂಶಗಳಿಂದ ತಿಳಿದು ಬಂದಿದೆ. 2023-24ರಲ್ಲಿ ಈ ವಯೋಮಾನದ 44,500 ಮಂದಿಗೆ ಎಚ್ ಐವಿ ಸೋಂಕು ದೃಢಪಟ್ಟಿದ್ದು, 2025-26ರಲ್ಲಿ 66,000 ಕ್ಕೆ ಹೆಚ್ಚಾಗಲಿದೆ ಎಂದು ಅಂದಾಜಿಸಲಾಗಿದೆ.
ಡೇಟಿಂಗ್ ಆಪ್ಸ್ ಮತ್ತು ‘ಕ್ಯಾಶುಯಲ್ ರಿಲೇಶನ್ಶಿಪ್’ ಭ್ರಮೆ
ಇಂದಿನ ಇಂಟರ್ನೆಟ್ ಯುಗದಲ್ಲಿ ಟಿಂಡರ್, ಬಂಬಲ್ನಂತಹ ಡೇಟಿಂಗ್ ಆಪ್ಗಳ ಬಳಕೆ ಯುವಕರಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿದೆ. ಅಪರಿಚಿತರೊಂದಿಗೆ ಕ್ಷಣಿಕ ದೈಹಿಕ ಸಂಪರ್ಕ ಹೊಂದುವ ‘ಕ್ಯಾಶುಯಲ್ ಡೇಟಿಂಗ್’ ಮತ್ತು ‘ಹುಕ್-ಅಪ್’ (Hook-up) ಸಂಸ್ಕೃತಿ ಹೆಚ್ಚುತ್ತಿದೆ. ಆದರೆ, ಈ ವೇಳೆ ಸುರಕ್ಷತಾ ಕ್ರಮಗಳನ್ನು ಕಡೆಗಣಿಸುತ್ತಿರುವುದು ಹೊಸ ಸೋಂಕುಗಳಿಗೆ ಮುಕ್ತ ಆಹ್ವಾನ ನೀಡುತ್ತಿದೆ. ವರದಿಯ ಪ್ರಕಾರ, ಹೊಸದಾಗಿ ಪತ್ತೆಯಾಗುತ್ತಿರುವ ಪ್ರಕರಣಗಳಲ್ಲಿ 73% ಸೋಂಕು ಅಸುರಕ್ಷಿತ ದೈಹಿಕ ಸಂಪರ್ಕದಿಂದಲೇ ಹರಡುತ್ತಿದೆ.
ಪಾರ್ಟಿ ಕಲ್ಚರ್ ಮತ್ತು ‘ಡ್ರಗ್ಸ್’ ವ್ಯಸನದ ಕರಾಳ ಮುಖ
ಕೇವಲ ಲೈಂಗಿಕತೆ ಮಾತ್ರವಲ್ಲದೆ, ಇಂದಿನ ಯುವ ಪೀಳಿಗೆಯನ್ನು ಕಾಡುತ್ತಿರುವ ಮತ್ತೊಂದು ಪ್ರಮುಖ ಸವಾಲು ಮಾದಕ ದ್ರವ್ಯಗಳ (Drugs) ವ್ಯಸನ. ಪಾರ್ಟಿಗಳಲ್ಲಿ ಒಂದೇ ಸೂಜಿಯನ್ನು ಬಳಸಿ ಹಲವರು ಮಾದಕ ದ್ರವ್ಯವನ್ನು ಚುಚ್ಚಿಕೊಳ್ಳುವ (Injecting Drugs) ಅಭ್ಯಾಸ ಯುವಕರಲ್ಲಿ ಹೆಚ್ಚಾಗಿದೆ. ದೇಶದ ಒಟ್ಟು ಪ್ರಕರಣಗಳಲ್ಲಿ ಶೇಕಡಾ 11.5% ರಷ್ಟು ಸೋಂಕು ಕಲುಷಿತ ಸೂಜಿಗಳ ಮೂಲಕವೇ ಹರಡುತ್ತಿರುವುದು ಈ ಆತಂಕವನ್ನು ಸಾಬೀತುಪಡಿಸಿದೆ.
ಜಾಗೃತಿ ಇದ್ದರೂ ನಿರ್ಲಕ್ಷ್ಯವೇಕೆ?
ಹಳೇ ಪೀಳಿಗೆಗೆ ಹೋಲಿಸಿದರೆ ಜೆನ್ ಜಿ ಪೀಳಿಗೆಗೆ ಇಂಟರ್ನೆಟ್ ಮೂಲಕ ಎಲ್ಲ ಮಾಹಿತಿಯೂ ಸಿಗುತ್ತದೆ. ಆದರೂ, “ನನಗೇನೂ ಆಗುವುದಿಲ್ಲ” ಎಂಬ ಅತಿಯಾದ ಆತ್ಮವಿಶ್ವಾಸ ಮತ್ತು ಲೈಂಗಿಕ ಆರೋಗ್ಯದ ಬಗ್ಗೆ ಮುಕ್ತವಾಗಿ ಮಾತನಾಡಲು ಇರುವ ಸಂಕೋಚ ಅವರನ್ನು ಅಪಾಯಕ್ಕೆ ತಳ್ಳುತ್ತಿದೆ.
ಇನ್ನೊಂದು ದೊಡ್ಡ ಕಳವಳಕಾರಿ ಸಂಗತಿಯೆಂದರೆ, ದೇಶದಲ್ಲಿ 25 ಲಕ್ಷಕ್ಕೂ ಹೆಚ್ಚು ಸೋಂಕಿತರಿದ್ದರೂ, ಕೇವಲ 9.25 ಲಕ್ಷ ಜನರಿಗೆ ಮಾತ್ರ ಸದ್ಯ ಆಂಟಿರೆಟ್ರೋವೈರಲ್ ಥೆರಪಿ (ART) ಚಿಕಿತ್ಸೆ ತಲುಪುತ್ತಿದೆ. ಬಹುತೇಕ ಯುವಕರು ಮುಜುಗರ ಮತ್ತು ಸಮಾಜದ ಭಯದಿಂದಾಗಿ ಪರೀಕ್ಷೆ ಮಾಡಿಸಿಕೊಳ್ಳಲು ಹಿಂಜರಿಯುತ್ತಿರುವುದೇ ಇದಕ್ಕೆ ಪ್ರಮುಖ ಕಾರಣ.
ಜೆನ್ ಜಿ ಪೀಳಿಗೆಗೆ ತಜ್ಞರ ಕಿವಿಮಾತು:
‘ಸೇಫ್ ಸೆಕ್ಸ್’ ಕಡ್ಡಾಯ: ತಾತ್ಕಾಲಿಕ ಆನಂದಕ್ಕಾಗಿ ಕಾಂಡೋಮ್ನಂತಹ ಸುರಕ್ಷತಾ ಸಾಧನಗಳನ್ನು ಕಡೆಗಣಿಸಬೇಡಿ.
ಟ್ಯಾಟೂ ಕ್ರೇಜ್ ಜಾಗ್ರತೆ: ಇತ್ತೀಚಿನ ದಿನಗಳಲ್ಲಿ ಯುವಕರಲ್ಲಿ ಟ್ಯಾಟೂ ಮತ್ತು ಪಿಯರ್ಸಿಂಗ್ (ಕಿವಿ/ಮೂಗು ಚುಚ್ಚಿಸುವುದು) ಕ್ರೇಜ್ ಹೆಚ್ಚಾಗಿದೆ. ಯಾವಾಗಲೂ ಹೊಸ ಸೂಜಿಗಳನ್ನೇ ಬಳಸಲಾಗುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ.
ಭಯ ಬೇಡ, ಪರೀಕ್ಷೆ ಮಾಡಿಸಿ: ಯಾವುದೇ ಸಣ್ಣ ಅನುಮಾನವಿದ್ದರೂ ಸರ್ಕಾರಿ ಸಮಗ್ರ ಆಪ್ತಸಮಾಲೋಚನೆ ಮತ್ತು ಪರೀಕ್ಷಾ ಕೇಂದ್ರಗಳಲ್ಲಿ (ICTC) ಸಂಪೂರ್ಣ ಗೌಪ್ಯವಾಗಿ ಮತ್ತು ಉಚಿತವಾಗಿ ತಪಾಸಣೆ ಮಾಡಿಸಿಕೊಳ್ಳಿ.
ನೆನಪಿಡಿ, ಹೆಚ್ಐವಿ ಈಗ ಪ್ರಾಣ ತೆಗೆಯುವ ಕಾಯಿಲೆಯಾಗಿ ಉಳಿದಿಲ್ಲ. ಆರಂಭದಲ್ಲೇ ಪತ್ತೆ ಹಚ್ಚಿದರೆ ಸರ್ಕಾರದ ಉಚಿತ ‘ಎಆರ್ಟಿ’ (ART) ಚಿಕಿತ್ಸೆಯ ಮೂಲಕ ಸಾಮಾನ್ಯರಂತೆ ಸುದೀರ್ಘ ಕಾಲ ಬದುಕಬಹುದು. ಜಾಗೃತಿಯೊಂದೇ ಈ ಮಹಾಮಾರಿಗೆ ಇರುವ ಏಕೈಕ ಮದ್ದು.