ಬೆಂಗಳೂರು: “ಇಂಡಿ ಕ್ಷೇತ್ರದ ಶಾಸಕ ಯಶವಂತರಾಯಗೌಡ ಪಾಟೀಲ ಅವರು ಶಾಸಕ ಸ್ಥಾನಕ್ಕೆ ರಾಜಿನಾಮೆ ನೀಡಲು ಮುಂದಾಗಿರುವುದು ತಮ್ಮ ಕ್ಷೇತ್ರದ ರೈತರ ಬದುಕಿಗಾಗಿಯೇ ಹೊರತು, ಈ ಹಿಂದೆ ಬಿಜೆಪಿ ನಾಯಕರು ಹೇಳಿದ್ದ 15 ಜನರನ್ನು ಕೊಟ್ಟು, ಕೊಳ್ಳುವ ಆಪರೇಷನ್ ಕಮಲದ ರಾಜಿನಾಮೆ ಮಾದರಿಯಲ್ಲ. ಅವರ ರಾಜಿನಾಮೆ ನಡೆಗೆ ವಿರೋಧ ಪಕ್ಷದವರು ಗಾಬರಿಯಾಗುವ ಅಗತ್ಯವಿಲ್ಲ” ಎಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಸದನದಲ್ಲಿ ತಿರುಗೇಟು ನೀಡಿದ್ದಾರೆ.
ವಿಧಾನಸಭೆಯಲ್ಲಿ ಬುಧವಾರ ಬರ ಪರಿಸ್ಥಿತಿ ಕುರಿತ ಚರ್ಚೆಯ ವೇಳೆ, ವಿರೋಧ ಪಕ್ಷದ ನಾಯಕರು ಶಾಸಕ ಯಶವಂತರಾಯಗೌಡ ಪಾಟೀಲ ಅವರ ರಾಜಿನಾಮೆ ಪತ್ರದ ಪ್ರತಿಯನ್ನು ಸದನದಲ್ಲಿ ಪ್ರದರ್ಶಿಸಿ ಭಾರಿ ಗದ್ದಲ ಎಬ್ಬಿಸಿದಾಗ ಮುಖ್ಯಮಂತ್ರಿಗಳು ತೀವ್ರವಾಗಿ ಪ್ರತಿಕ್ರಿಯಿಸಿದರು. ತಾವು ಈಗಾಗಲೇ ಯಶವಂತರಾಯಗೌಡರೊಂದಿಗೆ ಸುದೀರ್ಘವಾಗಿ ಮಾತನಾಡಿ, ಸಮಾಧಾನಪಡಿಸಿ ಕಳುಹಿಸಿರುವುದಾಗಿ ತಿಳಿಸಿದರು.
ರೈತರ ಮೇಲಿನ ಒತ್ತಡಕ್ಕೆ ಶಾಸಕರು ಭಾವನಾತ್ಮಕವಾಗಿದ್ದಾರೆ:
“ವಿರೋಧ ಪಕ್ಷದವರು ಬಹಳ ಆತುರದಲ್ಲಿ ರಾಜಕಾರಣ ಮಾಡಲು ಬಡಿದಾಡುತ್ತಿದ್ದಾರೆ. ಹೆಚ್.ಕೆ. ಪಾಟೀಲರಂತಹ ಹಿರಿಯ ನಾಯಕರ ಮೇಲೆಯೇ ಇಷ್ಟು ದೊಡ್ಡ ಪ್ರಮಾಣದ ಒತ್ತಡ ಇರಬೇಕಾದರೆ, ಯಶವಂತರಾಯಗೌಡ ಪಾಟೀಲ ಅವರು ಬೇಸರಗೊಂಡಿರುವುದರಲ್ಲಿ ಯಾವುದೇ ತಪ್ಪಿಲ್ಲ. ಎಲ್ಲಾ ಕ್ಷೇತ್ರಗಳಲ್ಲೂ ರೈತರು ಭಾರಿ ಸಾಲ ಮಾಡಿ ಬೆಳೆ ಹಾಕಿದ್ದಾರೆ. ಈ ರೈತರಿಗೆ ಸೂಕ್ತ ಪರಿಹಾರ ಸಿಗಲೇಬೇಕು. ಕ್ಷೇತ್ರದ ಜನರಿಗೆ ಅವರು ಉತ್ತರ ನೀಡಬೇಕಾದ ಹೊಣೆಗಾರಿಕೆ ಇರುವುದರಿಂದ ಅವರು ಭಾವನಾತ್ಮಕವಾಗಿರುವುದು ಸಹಜ. ಆದರೆ ಮಾಜಿ ಸಚಿವ ನಾಗೇಂದ್ರ ಅವರ ರಾಜಿನಾಮೆ ವಿಚಾರವೇ ಬೇರೆ, ಅದನ್ನು ನಾನೇ ಪಡೆದುಕೊಂಡಿದ್ದೆ. ಆದರೆ ಯಶವಂತರಾಯಗೌಡರ ನಡೆ ಸದಾಶಯದಿಂದ ಕೂಡಿದ್ದಾಗಿದೆ” ಎಂದು ವಿವರಿಸಿದರು.
ಬರ ಘೋಷಣೆಗೆ ಕೇಂದ್ರದ ಮಾನದಂಡವೇ ಆಧಾರ:
ರಾಜ್ಯದ ಆಡಳಿತದಲ್ಲಿ ಬರದ ವಿಚಾರವಾಗಿ ಯಾವುದೇ ಪಕ್ಷಭೇದ ಮಾಡುತ್ತಿಲ್ಲ ಎಂದು ಸ್ಪಷ್ಟಪಡಿಸಿದ ಮುಖ್ಯಮಂತ್ರಿಗಳು, “ನಮಗೆ ರಾಜ್ಯದ ಎಲ್ಲಾ 224 ಕ್ಷೇತ್ರಗಳೂ ಒಂದೇ. ಮಳೆ ಎಲ್ಲಿ ಬಿದ್ದಿಲ್ಲವೋ ಅಲ್ಲಿ ಕೇಂದ್ರದ ಕಟ್ಟುನಿಟ್ಟಿನ ಮಾನದಂಡಗಳ ಅನುಸಾರವೇ ಬರ ಘೋಷಣೆ ಮಾಡಲಾಗಿದೆ. ಬರ ಘೋಷಣೆ ಮಾಡಬೇಕೆಂದರೆ ಅದಕ್ಕೆ ಕೇಂದ್ರ ಸರ್ಕಾರದ ಕಟ್ಟುನಿಟ್ಟಿನ ನಿಯಮಗಳಾದ 21 ದಿನಗಳ ಕಾಲ ಮಳೆ ಬಿಡದಿರುವುದು ಸೇರಿದಂತೆ ಇಂತಿಷ್ಟು ಪ್ರಮಾಣದ ಮಳೆ ಕೊರತೆ ಇರಬೇಕು ಎಂಬ ಜಾಗತಿಕ ಮಾರ್ಗಸೂಚಿಗಳಿವೆ. ನನ್ನ ಸ್ವಕ್ಷೇತ್ರದ ಒಂದು ಭಾಗದಲ್ಲಿ ಮಳೆಯಾಗದಿದ್ದರೂ, ಅದನ್ನು ಬರದ ಪಟ್ಟಿಗೆ ಸೇರಿಸುವಂತೆ ನಾನು ಒತ್ತಡ ಹಾಕಿಲ್ಲ. ಇಡೀ ಬರ ನಿರ್ವಹಣೆಯ ಸಂಪೂರ್ಣ ಜವಾಬ್ದಾರಿಯನ್ನು ಕಂದಾಯ ಸಚಿವರಾದ ಡಿಸಿಎಂ ಡಾ.ಜಿ. ಪರಮೇಶ್ವರ್ ಅವರ ನೇತೃತ್ವದ ಸಮಿತಿಗೆ ವಹಿಸಲಾಗಿದೆ. ಎಲ್ಲರ ಒತ್ತಡದ ಮೇರೆಗೆ ರಾಜ್ಯದಲ್ಲಿ ಮೋಡ ಬಿತ್ತನೆ ಪ್ರಯತ್ನಕ್ಕೂ ಮುಂದಾಗಿದ್ದೇವೆ” ಎಂದರು.
ಆತುರದಲ್ಲಿ ರಾಜಿನಾಮೆ ಅಂಗೀಕರಿಸಲ್ಲ:
“ವಿರೋಧ ಪಕ್ಷದವರಾದ ನೀವುಗಳೇ ಭಾವನಾತ್ಮಕವಾಗಿ ರಾಜಿನಾಮೆ ನೀಡಿದರೂ ನಾವು ಅದನ್ನು ಆತುರದಲ್ಲಿ ಅಂಗೀಕಾರ ಮಾಡುವುದಿಲ್ಲ. ಜನ ನಿಮ್ಮನ್ನು ಐದು ವರ್ಷಗಳ ಕಾಲ ತಮ್ಮ ಧ್ವನಿಯಾಗಿ ಕೆಲಸ ಮಾಡಲು ಆಯ್ಕೆ ಮಾಡಿದ್ದಾರೆ. ನಾನು 224 ಕ್ಷೇತ್ರಗಳಿಗೂ ಮುಖ್ಯಮಂತ್ರಿಯಾಗಿದ್ದು, ಇದು ಇಡೀ ರಾಜ್ಯದ ಸರ್ಕಾರವಾಗಿದೆ. ಹೀಗಾಗಿ ರಾಜಿನಾಮೆಯಂತಹ ನಿರ್ಧಾರಗಳಿಗೆ ಆಸ್ಪದ ನೀಡದೆ, ಬರದ ವಿಚಾರವಾಗಿ ಎಲ್ಲರೂ ಮುಕ್ತವಾಗಿ ಚರ್ಚೆ ಮಾಡಿ” ಎಂದು ಮುಖ್ಯಮಂತ್ರಿಗಳು ಸದನದ ಸದಸ್ಯರಿಗೆ ಕರೆ ನೀಡಿದರು.