ಬೆಂಗಳೂರು:ನಿಮ್ಮ ವಾಹನವನ್ನು ರಸ್ತೆ ಬದಿ ಅಥವಾ ಫುಟ್ಪಾತ್ ಮೇಲೆ ಸುಮ್ಮನೆ ನಿಲ್ಲಿಸಿ ಹೋಗುತ್ತಿದ್ದೀರಾ? ಹಾಗಿದ್ದರೆ ಇಂದೇ ಎಚ್ಚೆತ್ತುಕೊಳ್ಳಿ! ಸಿಲಿಕಾನ್ ಸಿಟಿಯಲ್ಲಿ ಸ್ಥಗಿತಗೊಂಡಿದ್ದ ‘ಟೋಯಿಂಗ್’ ಪ್ರಕ್ರಿಯೆ ಈಗ ಮತ್ತೆ ಅಬ್ಬರಿಸಲು ಸಜ್ಜಾಗಿದೆ. ಈ ಬಗ್ಗೆ ಸ್ವತಃ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಕಠಿಣ ಸಂದೇಶ ರವಾನಿಸಿದ್ದಾರೆ.
ಯಾರಿಗೆಲ್ಲಾ ಶಾಕ್ ಕಾದಿದೆ?
ಕೇವಲ ಹೊಸ ವಾಹನಗಳಲ್ಲ, ವರ್ಷಗಟ್ಟಲೆ ರಸ್ತೆ ಬದಿ ಧೂಳು ತಿನ್ನುತ್ತಾ ನಿಂತಿರುವ ಹಳೇ ವಾಹನಗಳಿಗೂ (Abandoned Vehicles) ಈ ಬಾರಿ ಬಿಸಿ ತಟ್ಟಲಿದೆ. ರಸ್ತೆ ಮತ್ತು ಫುಟ್ಪಾತ್ಗಳನ್ನು ಅತಿಕ್ರಮಿಸಿ ನಿಲ್ಲಿಸಿರುವ ಅನಾಥ ವಾಹನಗಳನ್ನು ತಕ್ಷಣವೇ ಜಪ್ತಿ ಮಾಡಿ, ನಿಗದಿಪಡಿಸಿದ ಡಂಪ್ ಯಾರ್ಡ್ಗಳಿಗೆ ಸಾಗಿಸಲು ಸರ್ಕಾರ ಆದೇಶಿಸಿದೆ.
ಸವಾರರು ಪಾಲಿಸಲೇಬೇಕಾದ ‘ಡೆಡ್ಲೈನ್’ ನಿಯಮಗಳು:
ನೋ-ಪಾರ್ಕಿಂಗ್ ಎಚ್ಚರಿಕೆ: ‘ನೋ-ಪಾರ್ಕಿಂಗ್’ ಬೋರ್ಡ್ ಇರುವ ಜಾಗದಲ್ಲಿ ವಾಹನ ನಿಲ್ಲಿಸಿದರೆ ಕ್ಷಣಾರ್ಧದಲ್ಲಿ ಟೋಯಿಂಗ್ ಆಗಲಿದೆ.
ಫುಟ್ಪಾತ್ ಅತಿಕ್ರಮಣ ಬೇಡ: ಪಾದಚಾರಿಗಳ ಹಾದಿಯಲ್ಲಿ ಬೈಕ್ ಅಥವಾ ಕಾರು ನಿಲ್ಲಿಸಿದರೆ ಭಾರೀ ದಂಡ ತೆರಬೇಕಾಗುತ್ತದೆ.
ಹಳೇ ವಾಹನಗಳ ತೆರವು: ನಿಮ್ಮ ಮನೆಯ ಮುಂದೆ ಅಥವಾ ರಸ್ತೆಯಲ್ಲಿ ಹಳೇ ಗುಜರಿ ವಾಹನಗಳಿದ್ದರೆ ಕೂಡಲೇ ಅವುಗಳನ್ನು ತೆರವುಗೊಳಿಸಿ, ಇಲ್ಲದಿದ್ದರೆ ಸರ್ಕಾರವೇ ಅವುಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲಿದೆ.
ದಂಡದ ಜೊತೆ ಜಪ್ತಿ ಭೀತಿ:
ಈ ಹಿಂದಿನಂತೆ ಕೇವಲ ದಂಡ ಕಟ್ಟಿ ಸುಮ್ಮನಾಗುವಂತಿಲ್ಲ. ಸಂಚಾರಕ್ಕೆ ಅಡ್ಡಿಪಡಿಸುವ ವಾಹನಗಳನ್ನು ಪಾಲಿಕೆ ಮತ್ತು ಪೊಲೀಸರು ಜಂಟಿಯಾಗಿ ಕಾರ್ಯಾಚರಣೆ ನಡೆಸಿ ವಶಕ್ಕೆ ಪಡೆಯಲಿದ್ದಾರೆ. ಈಗಾಗಲೇ ನಗರದ 22 ಪ್ರಮುಖ ಕಾರಿಡಾರ್ಗಳಲ್ಲಿ ಕಟ್ಟುನಿಟ್ಟಿನ ನಿಗಾ ವಹಿಸಲು ಸೂಚನೆ ನೀಡಲಾಗಿದೆ.
ಡಿಸಿಎಂ ಖಡಕ್ ವಾರ್ನಿಂಗ್:
“ಬೆಂಗಳೂರಿನ ಟ್ರಾಫಿಕ್ ಸುಗಮಗೊಳಿಸಲು ಈ ಕ್ರಮ ಅನಿವಾರ್ಯ. ಯಾರೇ ಪ್ರಭಾವಿಗಳಿದ್ದರೂ ರಸ್ತೆ ಅತಿಕ್ರಮಣ ಸಹಿಸುವುದಿಲ್ಲ” ಎಂದು ಡಿ.ಕೆ. ಶಿವಕುಮಾರ್ ಗುಡುಗಿದ್ದಾರೆ.
ಹಾಗಾಗಿ ಸವಾರರೇ, ನಿಮ್ಮ ವಾಹನ ಸುರಕ್ಷಿತವಾಗಿರಬೇಕೆಂದರೆ ನಿಯಮ ಪಾಲಿಸಿ, ಇಲ್ಲದಿದ್ದರೆ ಟೋಯಿಂಗ್ ವಾಹನ ನಿಮ್ಮ ವಾಹನವನ್ನು ಹೊತ್ತೊಯ್ಯುವುದು ಗ್ಯಾರಂಟಿ!