ನವದೆಹಲಿ: ಗಡಿಯಲ್ಲಿ ಹೆಚ್ಚುತ್ತಿರುವ ಆಧುನಿಕ ವಾಯುಪಡೆ ಭೀತಿಗಳು ಮತ್ತು ಶತ್ರುಗಳ ಹಾರಾಟ ತಂತ್ರಜ್ಞಾನಕ್ಕೆ ಬ್ರೇಕ್ ಹಾಕಲು ಭಾರತೀಯ ವಾಯುಪಡೆ (IAF) ಭರ್ಜರಿ ಸಿದ್ಧತೆ ನಡೆಸಿದೆ. ರಾಜಸ್ಥಾನದ ಮರುಭೂಮಿ ಪ್ರದೇಶದಲ್ಲಿ ವಾಯುಪಡೆಯ ಹೆಲಿಕಾಪ್ಟರ್ಗಳು “ಎಕ್ಸರ್ಸೈಜ್ ರೋಟರ್ ಕ್ಲಾಪ್ III” (Exercise ROTOR CLAP III) ಹೆಸರಿನ ಬೃಹತ್ ಯುದ್ಧಾಭ್ಯಾಸವನ್ನು ಯಶಸ್ವಿಯಾಗಿ ನಡೆಸಿವೆ.
ಈ ಬಾರಿಯ ಯುದ್ಧಾಭ್ಯಾಸವನ್ನು ಸಂಪೂರ್ಣವಾಗಿ “ಕೌಂಟರ್-ಯುಎಎಸ್” (Counter-UAS – ಅಂದರೆ ಶತ್ರುಗಳ ಡ್ರೋನ್ ಮತ್ತು ಜವರಹಿತ ವಿಮಾನಗಳನ್ನು ಹೊಡೆದುರುಳಿಸುವ ತಂತ್ರಜ್ಞಾನ) ಥೀಮ್ ಅಡಿಯಲ್ಲಿ ಆಯೋಜಿಸಲಾಗಿತ್ತು.
ಶತ್ರುಗಳ ಆಧುನಿಕ ಭೀತಿಗಳಿಗೆ ವಾಯುಪಡೆ ಸೆಡ್ಡು!
ಇತ್ತೀಚಿನ ದಿನಗಳಲ್ಲಿ ಗಡಿಯುದ್ದಕ್ಕೂ ಸಣ್ಣ ಹಾಗೂ ಅತ್ಯಾಧುನಿಕ ಡ್ರೋನ್ಗಳ ಮೂಲಕ ಕಣ್ಗಾವಲು ಇಡುವುದು ಮತ್ತು ದಾಳಿ ನಡೆಸುವ ಆತಂಕಗಳು ಎದುರಾಗುತ್ತಿವೆ. ಇಂತಹ ಹೊಸ ತಲೆಮಾರಿನ ವೈಮಾನಿಕ ದಾಳಿಗಳನ್ನು ಹೇಗೆ ಎದುರಿಸಬೇಕು ಎಂಬುದನ್ನು ಪರೀಕ್ಷಿಸಲು ಈ ತಾಲೀಮು ನೆರವಾಗಿದೆ. ಈ ಕಾರ್ಯಾಚರಣೆಯಲ್ಲಿ ಭಾರತೀಯ ವಾಯುಪಡೆಯ ವಿವಿಧ ಹೆಲಿಕಾಪ್ಟರ್ ವಿಭಾಗಗಳು ಒಟ್ಟಾಗಿ ಭಾಗವಹಿಸಿದ್ದವು.
ಯುದ್ಧದ ಸಂದರ್ಭದಲ್ಲಿ ಎದುರಾಗುವ ಸವಾಲುಗಳನ್ನು ಎದುರಿಸಲು ಮತ್ತು ಹೆಲಿಕಾಪ್ಟರ್ಗಳ ರಕ್ಷಣಾತ್ಮಕ ಸಾಮರ್ಥ್ಯವನ್ನು ಪ್ರದರ್ಶಿಸಲು ಈ ಜಂಟಿ ಕಾರ್ಯಾಚರಣೆ ಯಶಸ್ವಿಯಾಗಿದೆ ಎಂದು ವಾಯುಪಡೆ ತಿಳಿಸಿದೆ.
ರಕ್ಷಣಾ ವಲಯದ ಪ್ರಮುಖ ವಿಭಾಗಗಳ ಒಗ್ಗಟ್ಟು
ಭಾರತದ ರಕ್ಷಣಾ ಸಚಿವಾಲಯ, ಇಂಟಿಗ್ರೇಟೆಡ್ ಡಿಫೆನ್ಸ್ ಸ್ಟಾಫ್, ಭಾರತೀಯ ಭೂಸೇನೆ ಹಾಗೂ ನೌಕಾಸೇನೆಯ ಸಹಯೋಗದೊಂದಿಗೆ ಈ ತಾಲೀಮು ನಡೆದಿದೆ. ವಾಯುಪಡೆಯ ಹೆಲಿಕಾಪ್ಟರ್ಗಳು ಆಕಾಶದಲ್ಲೇ ಡ್ರೋನ್ಗಳನ್ನು ಗುರುತಿಸಿ, ಅವುಗಳ ಸಿಗ್ನಲ್ಗಳನ್ನು ಜಾಮ್ ಮಾಡುವ ಹಾಗೂ ಕ್ಷಿಪ್ರವಾಗಿ ಹೊಡೆದುರುಳಿಸುವ ಪ್ರಾಯೋಗಿಕ ತಂತ್ರಗಳನ್ನು ಈ ವೇಳೆ ಯಶಸ್ವಿಯಾಗಿ ಪರೀಕ್ಷಿಸಲಾಗಿದೆ. ಭಾರತೀಯ ಸೈನಿಕರ ಈ ಕೌಶಲ್ಯವು ದೇಶದ ವಾಯು ಗಡಿಗೆ ಮತ್ತಷ್ಟು ಭದ್ರತೆ ನೀಡಲಿದೆ.