ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು (KEA) ಮುಂಬರುವ ನಾಲ್ಕೈದು ತಿಂಗಳುಗಳಲ್ಲಿ ವಿವಿಧ ಇಲಾಖೆಗಳ ನೇಮಕಾತಿಗಾಗಿ ಸರಣಿ ಪರೀಕ್ಷೆಗಳನ್ನು ನಡೆಸಲು ಸಿದ್ಧತೆ ಮಾಡಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಪರೀಕ್ಷಾರ್ಥಿಗಳ ಗೊಂದಲ ನಿವಾರಿಸಲು ಮತ್ತು ಅನುಕೂಲ ಕಲ್ಪಿಸಲು ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕರಾದ ಹೆಚ್. ಪ್ರಸನ್ನ ಅವರು ‘ಕೆಇಎ ವಿಕಸನ’ (KeaVikasana) ಯೂಟ್ಯೂಬ್ ಚಾನೆಲ್ ಮೂಲಕ ಅಭ್ಯರ್ಥಿಗಳಿಗೆ ಅತ್ಯಗತ್ಯ ಮಾರ್ಗಸೂಚಿಗಳನ್ನು ಹಂಚಿಕೊಂಡಿದ್ದಾರೆ.
ಪರೀಕ್ಷೆಯಲ್ಲಿ ಉತ್ತಮವಾಗಿ ಉತ್ತರಿಸುವುದು ಎಷ್ಟು ಮುಖ್ಯವೋ, ಅಷ್ಟೇ ಜವಾಬ್ದಾರಿಯಿಂದ ಒಎಂಆರ್ (OMR) ಶೀಟ್ನಲ್ಲಿ ವಿವರಗಳನ್ನು ದೋಷರಹಿತವಾಗಿ ಭರ್ತಿ ಮಾಡುವುದು ಕೂಡ ಅಷ್ಟೇ ಮುಖ್ಯ ಎಂದು ಅವರು ಅಭ್ಯರ್ಥಿಗಳಿಗೆ ನೆನಪಿಸಿದ್ದಾರೆ.
ತ್ವರಿತ ಫಲಿತಾಂಶಕ್ಕಾಗಿ ಒಎಂಆರ್ ಶೀಟ್ನಲ್ಲಿ ಈ ತಪ್ಪುಗಳನ್ನು ತಪ್ಪಿಸಿ:
ಹೆಸರು ಮತ್ತು ನೋಂದಣಿ ಸಂಖ್ಯೆ: ಅಭ್ಯರ್ಥಿಗಳು ತಮ್ಮ ಹೆಸರನ್ನು ಒಎಂಆರ್ ಶೀಟ್ನಲ್ಲಿ ಯಾವುದೇ ಕಡಿತ ಅಥವಾ ತಪ್ಪುಗಳಿಲ್ಲದೆ ಸರಿಯಾಗಿ ಬರೆಯಬೇಕು. ನೋಂದಣಿ ಸಂಖ್ಯೆಯನ್ನು (Registration Number) ನಿಖರವಾಗಿ ನಮೂದಿಸಬೇಕು.
ಬುಕ್ಲೆಟ್ ನಂಬರ್ ಮತ್ತು ವರ್ಷನ್ ಕೋಡ್: ಪ್ರಶ್ನೆ ಪತ್ರಿಕೆಯ ಬುಕ್ಲೆಟ್ ಸಂಖ್ಯೆ ಹಾಗೂ ವರ್ಷನ್ ಕೋಡ್ (Version Code) ಅನ್ನು ಒಎಂಆರ್ ಶೀಟ್ನ ನಿಗದಿತ ಕಾಲಂನಲ್ಲಿ ಸರಿಯಾಗಿ ಬರೆಯುವುದು ಕಡ್ಡಾಯ.
ವೃತ್ತಗಳನ್ನು ಬಬಲ್ ಮಾಡುವುದು (Bubbling): ಕೇವಲ ಸಂಖ್ಯೆಗಳನ್ನು ಬರೆಯುವುದಷ್ಟೇ ಅಲ್ಲದೆ, ಅದಕ್ಕೆ ಸಂಬಂಧಿಸಿದ ವೃತ್ತಗಳನ್ನು ಅತ್ಯಂತ ನಿಖರವಾಗಿ ಶೇಡ್ (ಬಬಲ್) ಮಾಡಬೇಕು. ಯಾವುದೇ ಅರ್ಧಂಬರ್ಧ ಬಬಲಿಂಗ್ ಅಥವಾ ಒಂದು ಸಾಲಿನಲ್ಲಿ ಎರಡು ವೃತ್ತಗಳನ್ನು ಗುರುತು ಮಾಡುವುದರಿಂದ ಒಎಂಆರ್ ಮೌಲ್ಯಮಾಪನ ತಾಂತ್ರಿಕವಾಗಿ ವಿಳಂಬವಾಗುತ್ತದೆ.
ಅಭ್ಯರ್ಥಿಗಳು ಒಎಂಆರ್ ಶೀಟ್ನಲ್ಲಿ ವಿವರಗಳನ್ನು ಸರಿಯಾಗಿ ತುಂಬುವುದರಿಂದ ಕಂಪ್ಯೂಟರ್ ಮೌಲ್ಯಮಾಪನ ಪ್ರಕ್ರಿಯೆ ವೇಗವಾಗಿ ನಡೆದು, ತ್ವರಿತವಾಗಿ ಮತ್ತು ಪಾರದರ್ಶಕವಾಗಿ ಫಲಿತಾಂಶ ಪ್ರಕಟಿಸಲು ಸಹಕಾರಿಯಾಗುತ್ತದೆ ಎಂದು ಹೆಚ್. ಪ್ರಸನ್ನ ಅವರು ತಿಳಿಸಿದ್ದಾರೆ. ಪರೀಕ್ಷಾ ಮಾರ್ಗಸೂಚಿಗಳ ಸಂಪೂರ್ಣ ವಿವರಗಳಿಗಾಗಿ ಅಭ್ಯರ್ಥಿಗಳು ಪ್ರಾಧಿಕಾರದ ಅಧಿಕೃತ ಯೂಟ್ಯೂಬ್ ಲಿಂಕ್ youtu.be/eMDbPE1vivw?si ನಲ್ಲಿ ವೀಕ್ಷಿಸಬಹುದಾಗಿದೆ.