ಬೆಂಗಳೂರು: ಪ್ರಸಕ್ತ ಸಾಲಿನ ವೈದ್ಯಕೀಯ (Medical) ಮತ್ತು ದಂತ ವೈದ್ಯಕೀಯ (Dental) ಕೋರ್ಸ್‌ಗಳ ಪ್ರವೇಶಾತಿಯ ಕೊನೆಯ ಹಂತವಾದ ‘ಸ್ಟ್ರೇ ವೇಕೆನ್ಸಿ’ (Stray Vacancy) ಸುತ್ತಿನ ಸೀಟು ಹಂಚಿಕೆಯ ವೇಳಾಪಟ್ಟಿಯನ್ನು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು (KEA) ಶುಕ್ರವಾರ ಬಿಡುಗಡೆ ಮಾಡಿದೆ. ಇದರೊಂದಿಗೆ ಈವರೆಗೆ ಪ್ರಾಧಿಕಾರದಲ್ಲಿ ನೋಂದಣಿ ಮಾಡಿಕೊಳ್ಳದ ಅರ್ಹ ನೀಟ್ ಅಭ್ಯರ್ಥಿಗಳಿಗೆ ಹೊಸದಾಗಿ ಅರ್ಜಿ ಸಲ್ಲಿಸಲು ಸುವರ್ಣಾವಕಾಶ ಕಲ್ಪಿಸಲಾಗಿದೆ ಎಂದು ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕ ಹೆಚ್. ಪ್ರಸನ್ನ ತಿಳಿಸಿದ್ದಾರೆ.
ಅರ್ಹ ಅಭ್ಯರ್ಥಿಗಳು ಅಕ್ಟೋಬರ್ 13 ರಿಂದ ಅಕ್ಟೋಬರ್ 16 ರವರೆಗೆ ಆನ್‌ಲೈನ್ ಮೂಲಕ ಹೊಸದಾಗಿ ನೋಂದಣಿ ಮಾಡಿಕೊಳ್ಳಬಹುದು. ನಿಗದಿತ ಶುಲ್ಕ ಪಾವತಿಸಿದ ನಂತರ ವೆರಿಫಿಕೇಷನ್ ಸ್ಲಿಪ್ ಡೌನ್‌ಲೋಡ್ ಮಾಡಿಕೊಂಡು, ಕಾಷನ್ ಡೆಪಾಸಿಟ್ ಪಾವತಿಸಿ ಆಪ್ಷನ್‌ಗಳನ್ನು ದಾಖಲಿಸಬೇಕಾಗುತ್ತದೆ. ಅಕ್ಟೋಬರ್ 16 ರಿಂದ ಅಕ್ಟೋಬರ್ 19 ರವರೆಗೆ ಹೊಸದಾಗಿ ಆಪ್ಷನ್ಸ್ ದಾಖಲಿಸಲು ಆವಕಾಶವಿದ್ದು, ಅದಕ್ಕೂ ಮುನ್ನ ಮುಂಗಡ ಹಣ (Caution Deposit) ಕಟ್ಟುವುದು ಕಡ್ಡಾಯವಾಗಿದೆ.
ಡೆಪಾಸಿಟ್ ವಿವರ ಮತ್ತು ಸೀಟುಗಳ ಲಭ್ಯತೆ:
₹1,00,000 ಡೆಪಾಸಿಟ್: ವೈದ್ಯಕೀಯ ಕೋರ್ಸ್‌ನ ಸರ್ಕಾರಿ ಸೀಟುಗಳು ಹಾಗೂ ಡೆಂಟಲ್ ಕೋರ್ಸ್‌ನ ಎಲ್ಲ ಮಾದರಿಯ ಸೀಟುಗಳಿಗೆ ಅರ್ಹತೆ ಪಡೆಯಬಹುದು.
₹12,00,117 ಡೆಪಾಸಿಟ್: ವೈದ್ಯಕೀಯ ವಿಭಾಗದ ಸರ್ಕಾರಿ (G) ಮತ್ತು ಖಾಸಗಿ (P) ಸೀಟುಗಳಿಗೆ ಆಪ್ಷನ್ಸ್ ಹಾಕಬಹುದು.
₹25,00,000 ಡೆಪಾಸಿಟ್: ಎಲ್ಲಾ ರೀತಿಯ (ಎನ್‌ಆರ್‌ಐ ಮತ್ತು ಮ್ಯಾನೇಜ್‌ಮೆಂಟ್ ಸೇರಿದಂತೆ) ಸೀಟುಗಳ ಪ್ರವೇಶಕ್ಕೆ ಅರ್ಹರಾಗುತ್ತಾರೆ.
ಮುಟ್ಟುಗೋಲು ಮತ್ತು ದಂಡದ ಎಚ್ಚರಿಕೆ:
ಸ್ಟ್ರೇ ವೇಕೆನ್ಸಿ ಸುತ್ತಿನಲ್ಲಿ ಸೀಟು ಹಂಚಿಕೆಯಾದ ನಂತರ ಅಭ್ಯರ್ಥಿಗಳು ಕಡ್ಡಾಯವಾಗಿ ನಿಗದಿತ ಕಾಲೇಜಿಗೆ ವರದಿ ಮಾಡಿಕೊಳ್ಳಬೇಕು. ಒಂದು ವೇಳೆ ಕಾಲೇಜಿಗೆ ಸೇರಲು ವಿಫಲವಾದರೆ ಅವರು ಪಾವತಿಸಿರುವ ಸಂಪೂರ್ಣ ಕಾಷನ್ ಡೆಪಾಸಿಟ್ ಹಣವನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗುವುದು. ಅಲ್ಲದೆ, ನಿಯಮಾನುಸಾರ ಭಾರಿ ದಂಡವನ್ನೂ ವಿಧಿಸಲಾಗುವುದು ಎಂದು ಕೆಇಎ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದೆ.
ಯಾರಿಗೆ ಅವಕಾಶ ಇದೆ? ಯಾರಿಗೆ ಇಲ್ಲ?
ಅರ್ಹರು: ಇದುವರೆಗೆ ಕೆಇಎ ಮೂಲಕ ಯಾವುದೇ ಸೀಟು ಪಡೆಯದವರು ಹಾಗೂ ಪ್ರಸ್ತುತ ದಂತ ವೈದ್ಯಕೀಯ ಸೀಟು ಹೊಂದಿದ್ದು, ವೈದ್ಯಕೀಯ ಸೀಟಿಗೆ ಅಪ್‌ಗ್ರೇಡ್ ಆಗಲು ಬಯಸುವವರು ಭಾಗವಹಿಸಬಹುದು.
ಅನರ್ಹರು: ಅಖಿಲ ಭಾರತ ಕೋಟಾ (AIQ), ಡೀಮ್ಡ್ ವಿವಿಗಳು ಸೇರಿದಂತೆ ಯಾವುದೇ ಇತರ ರಾಜ್ಯಗಳ ಮೊದಲ ಮೂರು ಸುತ್ತುಗಳಲ್ಲಿ ಈಗಾಗಲೇ ಸೀಟು ಪಡೆದಿರುವ ಅಭ್ಯರ್ಥಿಗಳಿಗೆ ಈ ಸುತ್ತಿನಲ್ಲಿ ಭಾಗವಹಿಸಲು ಅವಕಾಶವಿಲ್ಲ. ಉಳಿಕೆ ಸೀಟುಗಳು ಮತ್ತು ಅವುಗಳ ಶುಲ್ಕದ ಪಟ್ಟಿಯನ್ನು ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದ್ದು, ಅಭ್ಯರ್ಥಿಗಳು ಪೋಷಕರೊಂದಿಗೆ ಚರ್ಚಿಸಿ ಜಾಗರೂಕತೆಯಿಂದ ಆಪ್ಷನ್ ದಾಖಲಿಸಲು ಸೂಚಿಸಲಾಗಿದೆ.
ಪಿಜಿ ದಂತ ವೈದ್ಯಕೀಯ: 3ನೇ ಸುತ್ತಿನ ಕೌನ್ಸೆಲಿಂಗ್ ಆರಂಭ
ಸ್ನಾತಕೋತ್ತರ (PG) ದಂತ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶಾತಿಯ 3ನೇ ಸುತ್ತಿನ ವೇಳಾಪಟ್ಟಿಯೂ ಪ್ರಕಟವಾಗಿದ್ದು, ಕಾಷನ್ ಡೆಪಾಸಿಟ್ ಪಾವತಿಸಲು ಅಕ್ಟೋಬರ್ 13 ರವರೆಗೆ ಕಾಲಾವಕಾಶ ನೀಡಲಾಗಿದೆ. ಎಸ್‌ಸಿ ಮತ್ತು ಎಸ್‌ಟಿ ಅಭ್ಯರ್ಥಿಗಳು ₹1 ಲಕ್ಷ ಹಾಗೂ ಉಳಿದ ಎಲ್ಲಾ ವರ್ಗದ ಅಭ್ಯರ್ಥಿಗಳು ₹4 ಲಕ್ಷ ಕಾಷನ್ ಡೆಪಾಸಿಟ್ ಪಾವತಿಸಬೇಕಾಗುತ್ತದೆ.
ಅಕ್ಟೋಬರ್ 13 ರೊಳಗೆ ಆಪ್ಷನ್ ದಾಖಲಿಸಿದ ನಂತರ, ಅಕ್ಟೋಬರ್ 14 ರ ಬೆಳಿಗ್ಗೆ 11 ಗಂಟೆಗೆ ತಾತ್ಕಾಲಿಕ ಹಾಗೂ ಸಂಜೆ 6 ಗಂಟೆಗೆ ಅಂತಿಮ ಫಲಿತಾಂಶ ಹೊರಬೀಳಲಿದೆ. ಸೀಟು ಸಿಕ್ಕ ಅಭ್ಯರ್ಥಿಗಳು ಅಕ್ಟೋಬರ್ 15 ಮತ್ತು 16 ರಂದು ಬಾಕಿ ಶುಲ್ಕ ಪಾವತಿಸಿ, ಅಕ್ಟೋಬರ್ 16-17 ರಂದು ಕೆಇಎ ಕಚೇರಿಯಲ್ಲಿ ಮೂಲ ದಾಖಲೆಗಳನ್ನು ಸಲ್ಲಿಸಬೇಕು. ತದನಂತರ ಪ್ರವೇಶ ಪತ್ರ ಪಡೆದು ಅಕ್ಟೋಬರ್ 19 ರೊಳಗೆ ಕಾಲೇಜುಗಳಲ್ಲಿ ಪ್ರವೇಶ ಪಡೆಯಲು ಸೂಚಿಸಲಾಗಿದೆ.