ಮೈಸೂರು: ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವ-2026ಕ್ಕೆ ಆಗಮಿಸುವ ಪ್ರವಾಸಿಗರಿಗೆ ನೆರವಾಗಲು ಮೈಸೂರು ನಗರ ಪೊಲೀಸರು ಉಚಿತ ‘ಪ್ರವಾಸಿ ಮಾಹಿತಿ ವೆಬ್ ಪೋರ್ಟಲ್’ ಅನ್ನು ಬಿಡುಗಡೆ ಮಾಡಿದ್ದಾರೆ. ಅಕ್ಟೋಬರ್ 11 ರಿಂದ 21 ರವರೆಗೆ ನಡೆಯಲಿರುವ ದಸರಾ ಉತ್ಸವದ ಅವಧಿಯಲ್ಲಿ ಸಾರ್ವಜನಿಕರಿಗೆ ಅಗತ್ಯವಿರುವ ಎಲ್ಲಾ ಅಧಿಕೃತ ಮಾಹಿತಿಗಳನ್ನು ಈ ಪೋರ್ಟಲ್ ಒದಗಿಸಲಿದೆ.
ಇಂಗ್ಲಿಷ್ ಹಾಗೂ ಕನ್ನಡ ಎರಡೂ ಭಾಷೆಗಳಲ್ಲಿ ಲಭ್ಯವಿರುವ ಈ ಡಿಜಿಟಲ್ ವ್ಯವಸ್ಥೆಯನ್ನು ಸಾರ್ವಜನಿಕರು ಯಾವುದೇ ಮೊಬೈಲ್ ಅಥವಾ ಕಂಪ್ಯೂಟರ್ ಮೂಲಕ ಸುಲಭವಾಗಿ ಬಳಸಬಹುದಾಗಿದೆ.
ಪೋರ್ಟಲ್‌ನ ಪ್ರಮುಖ ವೈಶಿಷ್ಟ್ಯಗಳು:
ಅಧಿಕೃತ ಪೊಲೀಸ್ ಅಪ್ಡೇಟ್ಸ್: ಮೈಸೂರು ನಗರ ಪೊಲೀಸ್ ನಿಯಂತ್ರಣ ಕೊಠಡಿಯಿಂದ ಪ್ರಕಟವಾಗುವ ರಸ್ತೆ ಬಂದ್ (ಡೈವರ್ಷನ್), ಪಾರ್ಕಿಂಗ್ ವ್ಯವಸ್ಥೆ, ಕಾರ್ಯಕ್ರಮಗಳ ಸಮಯ ಹಾಗೂ ತುರ್ತು ಪ್ರಕಟಣೆಗಳು ಇಲ್ಲಿ ನೇರವಾಗಿ ಲಭ್ಯವಿರಲಿವೆ.
ಒಂದೇ ಕ್ಲಿಕ್‌ನಲ್ಲಿ ಸಹಾಯ: ಪ್ರವಾಸಿಗರು ತುರ್ತು ಸಹಾಯಕ್ಕಾಗಿ 112, ದಸರಾ ನಿಯಂತ್ರಣ ಕೊಠಡಿ (1077), ಅಂಬುಲೆನ್ಸ್ (108) ಸಂಖ್ಯೆಗಳು ಹಾಗೂ ಪ್ರವಾಸಿ ಪೊಲೀಸ್, ವೈದ್ಯಕೀಯ ಶಿಬಿರಗಳು ಮತ್ತು ‘ಕಳೆದುಹೋದ ಮತ್ತು ಪತ್ತೆಯಾದ’ (Lost & Found) ಕೇಂದ್ರಗಳ ನೆರವನ್ನು ಪಡೆದುಕೊಳ್ಳಬಹುದು.
ಗೂಗಲ್ ಮ್ಯಾಪ್ಸ್ ಮಾರ್ಗದರ್ಶನ: ಹಬ್ಬ ನಡೆಯುವ ಪ್ರಮುಖ ಸ್ಥಳಗಳು, ಪ್ರವಾಸಿ ಆಕರ್ಷಣೆಗಳು, ಪಾರ್ಕಿಂಗ್ ಹಬ್‌ಗಳು ಮತ್ತು ಪೊಲೀಸ್ ಸಹಾಯ ಕೇಂದ್ರಗಳಿಗೆ ತಲುಪಲು ಗೂಗಲ್ ಮ್ಯಾಪ್ಸ್ ಲಿಂಕ್‌ಗಳನ್ನು ಇದರಲ್ಲಿ ನೀಡಲಾಗಿದೆ.
ಪ್ರಯಾಣದ ಯೋಜನೆ: ಮೈಸೂರನ್ನು ತಲುಪುವ ಮಾರ್ಗಗಳು, ಉಚಿತ ದಸರಾ ಶಟಲ್ ಬಸ್ ವ್ಯವಸ್ಥೆ, ಜಂಬೂ ಸವಾರಿ ಮೆರವಣಿಗೆ ದಿನದ ಸಂಚಾರ ನಿಯಮಗಳು ಮತ್ತು ಸಾರ್ವಜನಿಕರು ಪಾಲಿಸಬೇಕಾದ ನಿಯಮಗಳ ಸಂಪೂರ್ಣ ವಿವರ ಇಲ್ಲಿದೆ.
ದೂರು ಸಲ್ಲಿಕೆ: ಸಂಚಾರ ದಟ್ಟಣೆ, ಸುರಕ್ಷತೆ ಅಥವಾ ಕಿರುಕುಳದಂತಹ ತುರ್ತು ಅಲ್ಲದ ಸಮಸ್ಯೆಗಳ ಬಗ್ಗೆ ಸಾರ್ವಜನಿಕರು ಪೋರ್ಟಲ್‌ನಲ್ಲಿರುವ ಸಣ್ಣ ಫಾರ್ಮ್ ಮೂಲಕ ದೂರು ನೀಡಬಹುದು. ಪ್ರತಿ ದೂರಿಗೂ ಒಂದು ರೆಫರೆನ್ಸ್ ಸಂಖ್ಯೆ ಸಿಗಲಿದ್ದು, ಪೊಲೀಸರು ಅದರ ಪರಿಶೀಲನೆ ನಡೆಸಲಿದ್ದಾರೆ.
ಬಳಸಲು ಅತ್ಯಂತ ಸುಲಭ:
ಈ ಪೋರ್ಟಲ್ ಅನ್ನು ಬಳಸಲು ಯಾವುದೇ ಪ್ರತ್ಯೇಕ ಆಪ್ ಇನ್‌ಸ್ಟಾಲ್ ಮಾಡುವ ಅಗತ್ಯವಿಲ್ಲ ಹಾಗೂ ಲಾಗಿನ್ ಐಡಿಯೂ ಬೇಕಾಗಿಲ್ಲ. ಸಾಮಾನ್ಯ ಸ್ಮಾರ್ಟ್‌ಫೋನ್‌ಗಳಲ್ಲೂ ಅತ್ಯಂತ ವೇಗವಾಗಿ ಇದು ತೆರೆದುಕೊಳ್ಳುತ್ತದೆ. ಸಾರ್ವಜನಿಕರು https://mysurupolicedasaraportal.com ವೆಬ್‌ಸೈಟ್‌ಗೆ ಭೇಟಿ ನೀಡುವ ಮೂಲಕ ಅಥವಾ ಪ್ರಕಟಣೆಯಲ್ಲಿರುವ ಕ್ಯೂಆರ್ ಕೋಡ್ (QR Code) ಸ್ಕ್ಯಾನ್ ಮಾಡುವ ಮೂಲಕ ಇದರ ಸೌಲಭ್ಯವನ್ನು ಪಡೆದುಕೊಳ್ಳಬಹುದು ಎಂದು ಪೊಲೀಸ್ ಪ್ರಕಟಣೆ ತಿಳಿಸಿದೆ.