ಶ್ರೀಹರಿಕೋಟ: ಭಾರತದ ಬಾಹ್ಯಾಕಾಶ ಇತಿಹಾಸದಲ್ಲಿ ಇಂದು ಸುವರ್ಣಾಕ್ಷರಗಳಲ್ಲಿ ಬರೆದಿಡುವಂತಹ ಮಹತ್ತರ ಮೈಲಿಗಲ್ಲು ಸ್ಥಾಪನೆಯಾಗಿದೆ. ಹೈದರಾಬಾದ್ ಮೂಲದ ಖಾಸಗಿ ಬಾಹ್ಯಾಕಾಶ ಸ್ಟಾರ್ಟ್ಅಪ್ ಸ್ಪೈರೂಟ್ ಏರೋಸ್ಪೇಸ್ (Skyroot Aerospace) ಅಭಿವೃದ್ಧಿಪಡಿಸಿರುವ, ದೇಶದ ಅತ್ಯಂತ ಮೊದಲ ಖಾಸಗಿ ಆರ್ಬಿಟಲ್ ರಾಕೆಟ್ ‘ವಿಕ್ರಮ್-1’ (Vikram-1) ಶನಿವಾರ (ಜುಲೈ 18, 2026) ಮಧ್ಯಾಹ್ನ 12:05 ಕ್ಕೆ ಯಶಸ್ವಿಯಾಗಿ ಉಡಾವಣೆಗೊಂಡಿದೆ.
ಆಂಧ್ರಪ್ರದೇಶದ ಶ್ರೀಹರಿಕೋಟಾದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಈ ಐತಿಹಾಸಿಕ ‘ಮಿಷನ್ ಆಗಮನ್’ (Mission Aagaman) ಯಶಸ್ವಿಯಾಗಿ ಜರುಗಿದ್ದು, ಇದರೊಂದಿಗೆ ಖಾಸಗಿ ಸಂಸ್ಥೆಯೊಂದರ ಮೂಲಕ ರಾಕೆಟ್ ಅನ್ನು ಕಕ್ಷೆಗೆ ತಲುಪಿಸಿದ ವಿಶ್ವದ 3ನೇ ದೇಶ ಎಂಬ ಹೆಗ್ಗಳಿಕೆಗೆ ಭಾರತ ಪಾತ್ರವಾಗಿದೆ.
ಪ್ರಧಾನಿ ಮೋದಿ ಶ್ಲಾಘನೆ ಮತ್ತು ಶುಭ ಹಾರೈಕೆ:
ರಾಕೆಟ್ ಉಡಾವಣೆಗೂ ಮುನ್ನ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಹಂಚಿಕೊಂಡು, “ಇದು ಭಾರತದ ಬಾಹ್ಯಾಕಾಶ ಪಯಣದಲ್ಲಿ ಒಂದು ಐತಿಹಾಸಿಕ ಹೊಸ ಗಡಿ” ಎಂದು ಬಣ್ಣಿಸಿದ್ದರು. ಈ ನಾಲ್ಕು ಹಂತಗಳ ರಾಕೆಟ್ ಯುವಕರ ಪ್ರತಿಭೆ, ದೃಢಸಂಕಲ್ಪ ಮತ್ತು ಉದ್ಯಮಶೀಲತೆಯ ಮನೋಭಾವವನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ಶ್ಲಾಘಿಸಿದ್ದರು. ರಾಕೆಟ್ ಯಶಸ್ವಿಯಾಗಿ ಕಕ್ಷೆ ತಲುಪಿದ ಬೆನ್ನಲ್ಲೇ ಪ್ರಧಾನಿಯವರು ಸ್ಕೈರೂಟ್ ಸಂಸ್ಥೆಯ ಸಂಸ್ಥಾಪಕರಿಗೆ ನೇರವಾಗಿ ದೂರವಾಣಿ ಕರೆ ಮಾಡಿ ಇಡೀ ತಂಡಕ್ಕೆ ಅಭಿನಂದನೆ ಸಲ್ಲಿಸಿದ್ದಾರೆ.
ವಿಕ್ರಮ್-1 ರಾಕೆಟ್ನ ವಿಶೇಷತೆಗಳು:
ಅತ್ಯಾಧುನಿಕ ತಂತ್ರಜ್ಞಾನ: ಈ ರಾಕೆಟ್ ಸಂಪೂರ್ಣವಾಗಿ ಹಗುರವಾದ ಕಾರ್ಬನ್ ಕಾಂಪೋಸಿಟ್ ರಚನೆಯನ್ನು ಹೊಂದಿದ್ದು, 3D-ಪ್ರಿಂಟೆಡ್ ಲಿಕ್ವಿಡ್ ಎಂಜಿನ್ಗಳನ್ನು ಒಳಗೊಂಡಿದೆ.
ಸಾಮರ್ಥ್ಯ: ಸುಮಾರು ಏಳು ಮಹಡಿಗಳಷ್ಟು ಎತ್ತರವಿರುವ ಈ ರಾಕೆಟ್, 350 ಕೆಜಿವರೆಗಿನ ಸಣ್ಣ ಉಪಗ್ರಹಗಳನ್ನು ಭೂಮಿಯ ಕೆಳ ಕಕ್ಷೆಗೆ (Low Earth Orbit) ಅತ್ಯಂತ ವೇಗವಾಗಿ ಮತ್ತು ಕಡಿಮೆ ವೆಚ್ಚದಲ್ಲಿ ತಲುಪಿಸುವ ಸಾಮರ್ಥ್ಯ ಹೊಂದಿದೆ.
ಸ್ವಯಂಚಾಲಿತ ನಿಯಂತ್ರಣ: ರಾಕೆಟ್ನಲ್ಲಿರುವ ‘ರಾಮಾನುಜನ್’ ಮಿಷನ್ ಕಂಪ್ಯೂಟರ್ ತಂತ್ರಜ್ಞಾನದ ನೆರವಿನಿಂದ, ಉಡಾವಣೆಯ ಸಮಯದಲ್ಲಿ ಮನುಷ್ಯರ ಹಸ್ತಕ್ಷೇಪವಿಲ್ಲದೆ ರಾಕೆಟ್ ಸ್ವಯಂಚಾಲಿತವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತದೆ.
ಬಾಹ್ಯಾಕಾಶಕ್ಕೆ ಹಾರಿದ ಮೋದಿ ಪತ್ರ:
ಈ ಐತಿಹಾಸಿಕ ರಾಕೆಟ್ ಕೇವಲ ತಾಂತ್ರಿಕ ಉಪಗ್ರಹಗಳನ್ನು ಮಾತ್ರವಲ್ಲದೆ, ಪ್ರಧಾನಿ ನರೇಂದ್ರ ಮೋದಿ ಅವರು ಸ್ವತಃ ಕೈಯಾರೆ ಬರೆದಿರುವ ‘ವಂದೇ ಮಾತರಂ’ ಎಂಬ ಸಂದೇಶವಿರುವ ಪೋಸ್ಟ್ಕಾರ್ಡ್ ಮತ್ತು ದೇಶದ ವಿಜ್ಞಾನಿಗಳಾದ ಸಿ.ವಿ. ರಾಮನ್, ವಿಕ್ರಮ್ ಸಾರಾಭಾಯ್ ಹಾಗೂ ಎ.ಪಿ.ಜೆ. ಅಬ್ದುಲ್ ಕಲಾಂ ಅವರ ಅಕ್ಕಿಕಾಳಿಗಿಂತಲೂ ಸಣ್ಣದಾದ ಚಿನ್ನದ ಸೂಕ್ಷ್ಮ ಪ್ರತಿಮೆಗಳನ್ನು ಬಾಹ್ಯಾಕಾಶಕ್ಕೆ ಹೊತ್ತೊಯ್ದಿದೆ. ಇಸ್ರೋ (ISRO) ಮತ್ತು ಇನ್-ಸ್ಪೇಸ್ (IN-SPACe) ಸಂಸ್ಥೆಗಳ ಸಂಪೂರ್ಣ ತಾಂತ್ರಿಕ ಸಹಯೋಗದೊಂದಿಗೆ ಈ ಖಾಸಗಿ ಉಡಾವಣೆ ಸಂಪೂರ್ಣ ಯಶಸ್ವಿಯಾಗಿದೆ.