ಬೆಂಗಳೂರು: ಪ್ರತಿಷ್ಠಿತ 2026ರ ಫಿಫಾ ವಿಶ್ವಕಪ್ ಫುಟ್ಬಾಲ್ ಟೂರ್ನಿಯ ಮಹಾ ಫೈನಲ್ ಪಂದ್ಯವನ್ನು ಕ್ರೀಡಾ ಪ್ರೇಮಿಗಳೊಂದಿಗೆ ಜಂಟಿಯಾಗಿ ವೀಕ್ಷಿಸಲು ಕರ್ನಾಟಕದ ಮುಖ್ಯಮಂತ್ರಿಗಳು ಸಜ್ಜಾಗಿದ್ದಾರೆ. ಕರ್ನಾಟಕ ರಾಜ್ಯ ಫುಟ್ಬಾಲ್ ಸಂಸ್ಥೆ (KSFA) ಮತ್ತು ರಾಜ್ಯ ಸರ್ಕಾರದ ಯುವ ಸಬಲೀಕರಣ ಹಾಗೂ ಕ್ರೀಡಾ ಇಲಾಖೆಯು (DYES) ಜಂಟಿಯಾಗಿ ಬೆಂಗಳೂರಿನಲ್ಲಿ ಸಾರ್ವಜನಿಕರಿಗಾಗಿ ವಿಶ್ವಕಪ್ ಫೈನಲ್ ಪಂದ್ಯದ ದಿಕ್ಸೂಚಿ ನೇರ ಪ್ರಸಾರವನ್ನು ಹಮ್ಮಿಕೊಂಡಿವೆ.
ಅರ್ಜೆಂಟಿನಾ vs ಸ್ಪೇನ್ ಹೈವೋಲ್ಟೇಜ್ ಕದನ:
ಮುಂಬರುವ ಜುಲೈ 20ರ ಸೋಮವಾರ ಮಧ್ಯರಾತ್ರಿ 12:30 ರಿಂದ ಬೆಂಗಳೂರಿನ ಕೋರಮಂಗಲದಲ್ಲಿರುವ ಎನ್ಜಿವಿ (NGV) ಒಳಾಂಗಣ ಕ್ರೀಡಾಂಗಣದಲ್ಲಿ ಈ ಬೃಹತ್ ಪರದೆಯ ನೇರ ಪ್ರಸಾರ ಕಾರ್ಯಕ್ರಮ ಆಯೋಜನೆಗೊಂಡಿದೆ. ಜಾಗತಿಕ ಫುಟ್ಬಾಲ್ ಲೋಕದ ಪ್ರಬಲ ಶಕ್ತಿಗಳಾದ ಅರ್ಜೆಂಟಿನಾ ಮತ್ತು ಸ್ಪೇನ್ ತಂಡಗಳ ನಡುವೆ ಪ್ರಶಸ್ತಿಗಾಗಿ ನಡೆಯಲಿರುವ ರೋಮಾಂಚಕ ಹಣಾಹಣಿಯನ್ನು ಕ್ರೀಡಾಪಟುಗಳು, ಗಣ್ಯರು ಹಾಗೂ ಅಭಿಮಾನಿಗಳೊಂದಿಗೆ ಮುಖ್ಯಮಂತ್ರಿಗಳು ಖುದ್ದಾಗಿ ಭಾಗವಹಿಸಿ ವೀಕ್ಷಿಸಲಿದ್ದಾರೆ.
ಕ್ರೀಡಾ ಉತ್ಸಾಹಿಗಳನ್ನು ಒಂದೇ ಸೂರಿನಡಿ ತಂದು ವಿಶ್ವಕಪ್ ಸಂಭ್ರಮವನ್ನು ಆಚರಿಸಲು ಈ ವಿಶೇಷ ವ್ಯವಸ್ಥೆ ಮಾಡಲಾಗಿದ್ದು, ಮುದ್ರಣ, ದೃಶ್ಯ ಮತ್ತು ಡಿಜಿಟಲ್ ಮಾಧ್ಯಮಗಳ ಪ್ರತಿನಿಧಿಗಳು ಸಹ ಈ ಐತಿಹಾಸಿಕ ಕ್ರೀಡಾ ಕೂಟದ ಲೈವ್ ಸ್ಕ್ರೀನಿಂಗ್ನಲ್ಲಿ ಪಾಲ್ಗೊಳ್ಳುವಂತೆ ಕೆಎಸ್ಎಫ್ಎ ಗೌರವ ಪ್ರಧಾನ ಕಾರ್ಯದರ್ಶಿ ಎಂ. ಕುಮಾರ್ ಅವರು ಪ್ರಕಟಣೆಯಲ್ಲಿ ವಿನಂತಿಸಿದ್ದಾರೆ.