ಬೆಂಗಳೂರು: ಎಂಜಿನಿಯರಿಂಗ್ ಸೇರಿದಂತೆ ವಿವಿಧ ಸಿಇಟಿ (CET) ಕೋರ್ಸ್ಗಳ ಪ್ರವೇಶಾತಿಯ ಎರಡನೇ ಸುತ್ತಿನಲ್ಲಿ ಹಂಚಿಕೆಯಾಗಿದ್ದ ಸೀಟುಗಳನ್ನು ಆನ್ಲೈನ್ ಮೂಲಕ ರದ್ದುಪಡಿಸಿಕೊಳ್ಳಲು ಕೊನೆಯ ದಿನಾಂಕವನ್ನು ಆಗಸ್ಟ್ 29ರವರೆಗೆ ವಿಸ್ತರಿಸಲಾಗಿದೆ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ (KEA) ಕಾರ್ಯನಿರ್ವಾಹಕ ನಿರ್ದೇಶಕ ಎಚ್. ಪ್ರಸನ್ನ ತಿಳಿಸಿದ್ದಾರೆ.
ವಿದ್ಯಾರ್ಥಿ ಹಾಗೂ ಪೋಷಕರ ಹಿತದೃಷ್ಟಿಯಿಂದ ಪ್ರಾಧಿಕಾರವು ಈ ಪ್ರಮುಖ ನಿರ್ಧಾರ ಕೈಗೊಂಡಿದ್ದು, ಪರಿಷ್ಕೃತ ವೇಳಾಪಟ್ಟಿ ಮತ್ತು ನಿಯಮಗಳ ವಿವರ ಇಲ್ಲಿದೆ:
ಬದಲಾದ ಪ್ರಮುಖ ದಿನಾಂಕಗಳು:
ಚಾಯ್ಸ್ ದಾಖಲಿಸಲು ಕೊನೆ ದಿನ: ಆಗಸ್ಟ್ 29 (ಹಿಂದೆ ಆ. 28 ಇತ್ತು)
ಆನ್ಲೈನ್ ಸೀಟು ರದ್ದತಿಗೆ ಕೊನೆ ದಿನ: ಆಗಸ್ಟ್ 29 (ಮಧ್ಯಾಹ್ನ 3 ಗಂಟೆಯೊಳಗೆ)
ಶುಲ್ಕ ಪಾವತಿ ಹಾಗೂ ಕಾಲೇಜು ರಿಪೋರ್ಟಿಂಗ್: ಆಗಸ್ಟ್ 31
ಕಚೇರಿಗೆ ಬರುವಂತಿಲ್ಲ, ಆನ್ಲೈನ್ನಲ್ಲೇ ರದ್ದತಿ:
ಸೀಟು ರದ್ದುಪಡಿಸುವ ಪ್ರಕ್ರಿಯೆಗೆ ಖುದ್ದು ಹಾಜರಾತಿ ಕಡ್ಡಾಯವಾಗಿದ್ದ ಕಾರಣ ಗುರುವಾರ ಕೆಇಎ ಕಚೇರಿಗೆ ಅಭ್ಯರ್ಥಿಗಳು ಮತ್ತು ಪೋಷಕರು ಹೆಚ್ಚಿನ ಸಂಖ್ಯೆಯಲ್ಲಿ ಲಗ್ಗೆ ಇಟ್ಟಿದ್ದರು. ಸಾರ್ವಜನಿಕರ ದಟ್ಟಣೆಯನ್ನು ನಿಯಂತ್ರಿಸಲು ಮತ್ತು ವಿದ್ಯಾರ್ಥಿಗಳಿಗೆ ಅನುಕೂಲ ಮಾಡಿಕೊಡಲು ಕೆಇಎ ಈಗ ಆನ್ಲೈನ್ ಮೂಲಕವೇ ಸೀಟು ರದ್ದುಪಡಿಸಿಕೊಳ್ಳಲು ವ್ಯವಸ್ಥೆ ಕಲ್ಪಿಸಿದೆ. ಅಭ್ಯರ್ಥಿಗಳು ಆ. 29ರ ಮಧ್ಯಾಹ್ನ 3 ಗಂಟೆಯೊಳಗೆ ಪ್ರಾಧಿಕಾರದ ಪೋರ್ಟಲ್ಗೆ ಲಾಗಿನ್ ಆಗಿ ಸೀಟು ರದ್ದು ಮಾಡಿಕೊಳ್ಳಬಹುದು.
ದಂಡದ ನಿಯಮ:
ಯಾವ ಅಭ್ಯರ್ಥಿಗಳು ಚಾಯ್ಸ್-1 ಆಯ್ಕೆ ಮಾಡದೆ, ನೇರವಾಗಿ ಮೂರನೇ ಸುತ್ತಿನ ಕೌನ್ಸೆಲಿಂಗ್ನಲ್ಲಿ ಭಾಗವಹಿಸಲು ಇಚ್ಛಿಸುತ್ತಾರೋ, ಅಂತಹವರು ಎರಡನೇ ಸುತ್ತಿನಲ್ಲಿ ತಮಗೆ ಸಿಕ್ಕಿದ್ದ ಸೀಟನ್ನು ₹5,000 ದಂಡ ಪಾವತಿಸಿ ರದ್ದುಪಡಿಸಿಕೊಳ್ಳಲು ಅವಕಾಶ ನೀಡಲಾಗಿದೆ.
ಹೆಚ್ಚಿನ ಬಡ್ತಿಗೆ ಅವಕಾಶ:
ಚಾಯ್ಸ್-1 ಆಯ್ಕೆ ಮಾಡಿಕೊಳ್ಳುವ ಅಭ್ಯರ್ಥಿಗಳು ತಮಗೆ ಹಂಚಿಕೆಯಾಗಿರುವ ಸೀಟಿಗೆ ಪ್ರವೇಶ ಪಡೆಯುವುದು ಕಡ್ಡಾಯವಾಗಿರುತ್ತದೆ. ಆದರೆ, ಒಂದು ವೇಳೆ ಇನ್ನು ಉತ್ತಮ ಸೀಟಿಗೆ ಬಡ್ತಿ (Upgrade) ಪಡೆಯುವ ಆಸಕ್ತಿ ಹೊಂದಿರುವ ಅಭ್ಯರ್ಥಿಗಳು, ಮೂರನೇ ಸುತ್ತಿನ ಸೀಟು ಹಂಚಿಕೆಯ ಪೋರ್ಟಲ್ಗೆ ಲಾಗಿನ್ ಆಗುವ ಮೂಲಕ ಭಾಗವಹಿಸಬಹುದಾಗಿದೆ.
ವೈದ್ಯಕೀಯ ಆಕಾಂಕ್ಷಿಗಳಿಗೆ ಸ್ಪಷ್ಟನೆ:
ವೈದ್ಯಕೀಯ ಮತ್ತು ದಂತ ವೈದ್ಯಕೀಯ (Medical & Dental) ಕೋರ್ಸ್ಗಳ ಪ್ರವೇಶಕ್ಕೆ ಆಪ್ಷನ್ ದಾಖಲಿಸಿದ್ದು, ಎರಡನೇ ಸುತ್ತಿನಲ್ಲಿ ಎಂಜಿನಿಯರಿಂಗ್ ಸೀಟು ಹಂಚಿಕೆಯಾಗಿರುವ ಅಭ್ಯರ್ಥಿಗಳಿಗೆ ಕೆಇಎ ಮಹತ್ವದ ಸ್ಪಷ್ಟನೆ ನೀಡಿದೆ. ಅಂತಹ ಅಭ್ಯರ್ಥಿಗಳಿಗೆ ಸದ್ಯ ಸಿಕ್ಕಿರುವ ಎಂಜಿನಿಯರಿಂಗ್ ಸೀಟು ಇಷ್ಟವಿಲ್ಲದಿದ್ದರೆ ‘ಚಾಯ್ಸ್-4’ ಆಯ್ಕೆ ಮಾಡಬಹುದು. ಹೀಗೆ ಮಾಡಿದರೂ ಸಹ ಅವರು ವೈದ್ಯಕೀಯ ಕೋರ್ಸ್ನ ಎರಡನೇ ಸುತ್ತಿನ ಸೀಟು ಹಂಚಿಕೆ ಪ್ರಕ್ರಿಯೆಯಲ್ಲಿ ಯಾವುದೇ ಅಡ್ಡಿಯಿಲ್ಲದೆ ಭಾಗವಹಿಸಬಹುದು ಎಂದು ಎಚ್. ಪ್ರಸನ್ನ ವಿವರಿಸಿದ್ದಾರೆ.
ವೈದ್ಯಕೀಯ ತಾತ್ಕಾಲಿಕ ಫಲಿತಾಂಶ ಪ್ರಕಟ:
ವೈದ್ಯಕೀಯ ಮತ್ತು ದಂತ ವೈದ್ಯಕೀಯ ಕೋರ್ಸ್ ಪ್ರವೇಶಕ್ಕೆ ಮೊದಲ ಸುತ್ತಿನ ಎರಡನೇ ತಾತ್ಕಾಲಿಕ ಫಲಿತಾಂಶವನ್ನು ಪ್ರಾಧಿಕಾರ ಇಂದು ಪ್ರಕಟಿಸಿದೆ.
ಮೊದಲ ಸುತ್ತಿನಲ್ಲೇ ಎಲ್ಲ ವೈದ್ಯಕೀಯ (11,875) ಮತ್ತು ದಂತ ವೈದ್ಯಕೀಯ (2,684) ಸೀಟುಗಳು ಹಂಚಿಕೆಯಾಗಿವೆ. ಎಂಸಿಸಿ ಸೇರಿದಂತೆ ಇತರ ರಾಜ್ಯಗಳಲ್ಲಿ ಸೀಟು ಪಡೆದಿದ್ದ ಒಟ್ಟು 478 ಮಂದಿ ತಮ್ಮ ಕೆಇಎ ಸೀಟುಗಳನ್ನು ರದ್ದುಪಡಿಸಿದ್ದರು. ಆ ಸೀಟುಗಳನ್ನು ಸೇರಿಸಿಕೊಂಡು ಮತ್ತೊಮ್ಮೆ ಸೀಟು ಹಂಚಿಕೆ ಮಾಡಲಾಗಿದೆ ಎಂದು ಪ್ರಸನ್ನ ತಿಳಿಸಿದ್ದಾರೆ.
ಅಂತಿಮ ಫಲಿತಾಂಶ ಪ್ರಕಟಣೆ ನಂತರ ಪ್ರವೇಶಕ್ಕೆ ವೇಳಾಪಟ್ಟಿ ಪ್ರಕಟಿಸಲಾಗುವುದು ಎಂದು ಪ್ರಸನ್ನ ತಿಳಿಸಿದ್ದಾರೆ.