ಬೆಂಗಳೂರು:ಕರ್ನಾಟಕದ ವಿದ್ಯುತ್ ವಲಯದಲ್ಲಿ ಪ್ರಸರಣ ಶಕ್ತಿ ಹಾಗೂ ಜಾಲದ ಸಾಮರ್ಥ್ಯವನ್ನು ಗಣನೀಯವಾಗಿ ಹೆಚ್ಚಿಸಲು ಇಂಧನ ಇಲಾಖೆಯು ಅತ್ಯಾಧುನಿಕ ಬ್ಯಾಟರಿ ಎನರ್ಜಿ ಸ್ಟೋರೇಜ್ ಸಿಸ್ಟಮ್ (BESS) ಯೋಜನೆಯನ್ನು ಜಾರಿಗೆ ತರುತ್ತಿದೆ. ಇಂಧನ ಮೂಲಗಳ ದಕ್ಷ ನಿರ್ವಹಣೆಗೆ ಪೂರಕವಾಗಿ ಕರ್ನಾಟಕ ವಿದ್ಯುತ್ ಪ್ರಸರಣ ನಿಗಮ ನಿಯಮಿತ ಈ ಬೃಹತ್ ತಂತ್ರಜ್ಞಾನ ಆಧಾರಿತ ಯೋಜನೆಯನ್ನು ಕೈಗೆತ್ತಿಕೊಂಡಿದೆ.
ವಿದ್ಯುತ್ ಪೂರೈಕೆಯಲ್ಲಿ ಏರಿಳಿತ ತಪ್ಪಿಸಲು ಹೊಸ ತಂತ್ರಜ್ಞಾನ:
ರಾಜ್ಯದಲ್ಲಿ ಸೌರ ಮತ್ತು ಪವನ ಶಕ್ತಿಯಂತಹ ನವೀಕರಿಸಬಹುದಾದ ಇಂಧನ ಉತ್ಪಾದನೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಆದರೆ, ಹಗಲಿನಲ್ಲಿ ಉತ್ಪತ್ತಿಯಾಗುವ ಹೆಚ್ಚುವರಿ ವಿದ್ಯುತ್ ಅನ್ನು ಸಂಗ್ರಹಿಸಿಡಲು ಸೂಕ್ತ ವ್ಯವಸ್ಥೆ ಇಲ್ಲದೆ ಪೋಲಾಗುತ್ತಿತ್ತು. ಹೊಸ ಬ್ಯಾಟರಿ ಸ್ಟೋರೇಜ್ ವ್ಯವಸ್ಥೆಯು ಹಗಲಿನಲ್ಲಿ ಸಿಗುವ ಈ ಹೆಚ್ಚುವರಿ ವಿದ್ಯುತ್ ಅನ್ನು ಯಶಸ್ವಿಯಾಗಿ ಶೇಖರಿಸಿಟ್ಟುಕೊಳ್ಳಲಿದೆ. ಸಂಜೆ ಅಥವಾ ರಾತ್ರಿಯ ಪೀಕ್ ಅವರ್ಗಳಲ್ಲಿ (ಬೇಡಿಕೆ ಹೆಚ್ಚಿರುವ ಸಮಯ) ವಿದ್ಯುತ್ ಲೋಡ್ ಹೆಚ್ಚಾದಾಗ ಅಥವಾ ಲೈನ್ಗಳು ಓವರ್ಲೋಡ್ ಆದಾಗ ಈ ಬ್ಯಾಟರಿಗಳಿಂದ ತಕ್ಷಣವೇ ಜಾಲಕ್ಕೆ ವಿದ್ಯುತ್ ಹರಿಸಲಾಗುತ್ತದೆ. ಇದು ಗ್ರಾಹಕರಿಗೆ ನಿರಂತರ ಮತ್ತು ಗುಣಮಟ್ಟದ ವಿದ್ಯುತ್ ಸರಬರಾಜು ಮಾಡಲು ನೆರವಾಗಲಿದೆ.
ಲೋಡ್ ನಿರ್ವಹಣೆಗೆ ಸಿಗಲಿದೆ ಬಲ:
ಸದ್ಯ ಪ್ರಮುಖ ವಿದ್ಯುತ್ ಉತ್ಪಾದನಾ ಕೇಂದ್ರಗಳು ಮತ್ತು ಪ್ರಸರಣ ಕೇಂದ್ರಗಳ ವ್ಯಾಪ್ತಿಯಲ್ಲಿ ಇಂತಹ ಆಧುನಿಕ ವಿದ್ಯುತ್ ಸಂಗ್ರಹಾಗಾರಗಳನ್ನು ಸ್ಥಾಪಿಸಲು ನೀಲನಕ್ಷೆ ಸಿದ್ಧಪಡಿಸಲಾಗಿದೆ. ಈ ಸಂಪೂರ್ಣ ತಂತ್ರಜ್ಞಾನ ವ್ಯವಸ್ಥೆಯನ್ನು ರಾಜ್ಯ ಲೋಡ್ ಡಿಸ್ಪ್ಯಾಚ್ ಸೆಂಟರ್ ಮೂಲಕ ಸುಲಭವಾಗಿ ನಿರ್ವಹಣೆ ಮಾಡಲಾಗುತ್ತದೆ. ಈ ಹೆಜ್ಜೆಯಿಂದಾಗಿ ಬೇಸಿಗೆ ಸೇರಿದಂತೆ ವಿದ್ಯುತ್ ಅಭಾವದ ಸಂದರ್ಭಗಳಲ್ಲಿ ಜಲವಿದ್ಯುತ್ ಅಥವಾ ಕಲ್ಲಿದ್ದಲು ವಿದ್ಯುತ್ ಮೇಲಿನ ಅತಿಯಾದ ಅವಲಂಬನೆ ಕಡಿಮೆಯಾಗಲಿದೆ.